سەدەی سمت و سلیكۆن!

2 مانگ پێش ئێستا

عەتا شەمێرانی  
لەم ساڵانەی دواییدا قسەی زۆر لەسەر وەزیفە و ڕۆڵی سمت دەكرێت لە دنیای ئێمەدا، زۆرێك وایدەبینن كە سمت لای ئێمە بۆ پۆزلێدانە! بۆ تێگەشتن لەم دیاردەیەو دەركەوتەكانی، پێویستە بگەڕێینەوە بۆ زانستی"سمت ناسی" و خوێندنەوەیەكی زانستییانە بۆ ڕۆڵ و مەهامەكانی سمت بكەین. بەم جۆرەش دەگەینە ئەو دەرئەنجامەی كە ئەم بەشەی مرۆڤ چەندین ڕۆڵی گرنگی هەیە كە دەكرێت بەم جۆرەی خوارەوە پۆلێنیان بكەین :
 
سمت وەك سپۆنسەر 
پیاوێك بۆ ئەوەی لە تۆڕە كۆمەڵایەتییەكاندا بناسرێت و ئەكتیڤی بەرز بێت، پێویستە شەرم وحەیا فڕێبات و جنێو فرۆشێكی لاكۆڵانی بێت، شەو و ڕۆژ جنێو بەداروبەرد بدات. بەڵام بۆ كچێك ئەوەندە بەسە لەسەرلا ڕەسمێكی سمتی بڵاو بكاتەوە. لە شەوی دووەمدا بەكون فەیەكونێك ئەبێتە شاجوانی شاجوانان.دواتر لەكەناڵە ئێچدییەكاندا ئەبێتە(ڕووداوی ڕۆژ)و بە ئەڤینی لە (ژن و ژیان)دا (تاوتوێ)ی خەونەكانی دەكەن!

سمت وەك سیڤی و بڕوانامە: 
كوڕێك یان كچێكی ئاسایی بۆ ئەوەی ئیشێكی دەسكەوێت پێویستە سیڤییەكی دەوڵەمەند ئامادە بكات كە چەندین زمان بزانێت و شارەزایی كۆمپیوتەر بێت و ئەزموونی هەبێت، بەڵام بۆ كچی سمت بەرز، تەنها ئەوەندە بەسە لەڕۆژی بینینی بەڕێوەبەردا عەزییەكی تەسك لەبەر بكات و بە كەمێك مەكرونازەوە خۆی بكات بە ژووری بەڕێوەبەردا.
 
سمت وەك مەسعەد:
 زۆرجار دەتەوێت بە قادرمەیەك یان بینایەك یان بە هەورازێكدا سەربكەویت ئەگەر تەنها خۆت بیت زۆر ماندوو دەبیت بەڵام ئەگەر سمتێكی جوان لە پێشتەوە بڕوات هیچ هەست بە ماندوی ناكەیت و وەك ئەوەیە بە مەسعەێكدا سەركەوتبیت(لێرەدا سودەكەی بۆ غەیری خاوەنەكەیەتی ).

سمت وەك تاپڕ: 
كاتێك ڕاوچییەك دەڕوات بۆ ڕاو دەبێت تاپڕێكی پێبێت بۆ ئەوەی نێچیرەكەی پێ ڕاوبكات، بەهەمان شێوە كچیش ئەگەر خاوەنی سمتێكی بەرزو جوان بێت باشتر لە بازاڕو دائیرەو شوێنە گشتییەكان ئیشەكانی دەڕوات بەڕێوەو ئامانجەكانی دەپێكێت.

سمت وەك فێراری و لامبۆرگینی:
بە حوكمی ئەوەی پارە زیاتر لەدەست پیاواندایە ئاسانتر دەتوانن سەیارەی گرانبەها بكڕن و پۆزی پێوە لێبدەن ،بەڵام كچانیش دەتوانن بە بونی سمتێكی بەرزو خڕ بەهەمان شێوە پۆز لێبدەن.

سمت وەك سیلەی ڕەحم :
ئێستە خەڵك بەهۆی بەرژەوەندییەكەوە نەبێت سەردانی یەكتر ناكات ، بەڵام هەر ماڵێك كچێكی سمت خڕیان هەبێت دائیمەن میوان و خزم و كەس و كاریان زۆرە !
 
سمت وەك ئامێری مۆسیقا :
زۆر جۆری هەڵپەڕكێ و ڕەقس كردن هەیە زیاتر بە سمت دەكرێت، كاتێك ڕاقیسەكە سمتی دەجوڵێنێت تەماشاكەر هەست دەكات بولبولێك لەناخیدا گۆرانی دەڵێت .
  
ئەمە بەشێكی زۆر كەمی سودەكانی سمتە و پێویست ناكات هەمووی بنوسین، بەڵام لێرەوە بۆمان دەردەكەوێت سمت سەروەتێكی نیشتمانیە و جیاوازی نییە ئەگەر بیرە نەوتێكت هەبێت یان سمتێكی پڕو خڕ !
 
وەك دەبینین ئەم بەشەی كچان ڕۆڵێكی زۆر گەورەیان هەیە لە ئاراستەكردنی ڕوداوەكاندا بۆیە مافی خۆیانە نەك سلیكۆن بەڵكو پڕیكەن لە ئسفەنج و خوری و تەنانەت جل و بەرگی كۆن! تانەدان لە كچان بەوەی تەنها گرنگی بە سمتیان ئەدەن وەك تانەدان وایە لە كوڕێك كە هەوڵی بڕوانامە دەدات یان ڕاوچییەك كە بڕنەو هەڵدەگرێت.

هەتا ئێرە مەسەلەكە ڕوونە. بەس ئەوەی ڕوون نییە ئەوەیە بۆچی پیاوی كورد ئەوەندە گرنگی بەم بەشە ئەدات و چاوی لەسەرە؟!