بە كاڵاكردنی ئافرەت لە تیڤیەكاندا

2 مانگ پێش ئێستا

ئەرسەلان رەحمان
ئافرەت دەتوانێت ببێت بە نووسەر بە بێژەر، بە ڕۆژنامەنووس، بە مامۆستاو ئەندازیارو پزیشك . بەهەر شێتك كە خۆی بتوانێت ببێت ،بەڵام نەك ئەوەی شایستەی كارەكە نەبێ و بە مێیینە بوونی پڕی كردبێتەوە باشتر بڵێین بە جسمی پڕی كردبێتەوە .

ئافرەتێك كە ڕۆژنامەنووسە یان بێژەرە لە كەناڵێك ئەو پەڕی مافی خۆی و ئازادی خۆیەتی، بەڵام ئەو دەبێت لەسەر تیڤی و لەكاتی شۆوی میدیایی بێژەر بێت نەك مۆدێڵ، ڕۆژنامەنووس بێت نەك ئەكتەری فیلمی ورژێنەر وە ئەوەی وای كردووە لەو كەناڵە وەرگیرێت توانایی و زانایی خۆی بێت نەك دەمووچاو و سینگ و سمتی، ئەوەشی وای لە بەڕێوبەری كەناڵەكە كردووە لەوێ وەریگرێت ئەقڵ و بیركردنەوەی بێت نەك شەهوەت و چێژ !

پێویستە بزانین كەناڵی ڕاگەیاندن جیاوازە لە باڕو یانە شەوانەكان، ئافرەت لە یانەی شەوانە عەرزی سینگ و سمتی دەكات، وە كارێكی تا ڕادەیەك نۆرمەڵ و ئاسایشە ،چوونكە ئەوەی لەوێ وەریگرتووە لەبەر جسمی ڕووتی وەریدەگرێت وە ئافرەتەكە خۆشی ئەوە دەزانێت ،بەڵام گواستنەوەی شێواز و سیستەی یانە شەوانەكان بۆ كەناڵەكانی ڕاگەیاندن ئەوەیان كارەسات و هەڕاجكردنی ئافرەتە !
یانی مەبەستم ئافرەتێك كە هەواڵ دەخوێنێتەوە چ پێوێیستە نیوەی سینگی و لایەكی سمتی و نیوەی ڕانی پیشانی  بینەر بدات !
چ پێویست دەكات ئافرەتێك هیچ بەهرەیەكی تێدانیە جگە لە ڕووتی و جوانیەكی هەڕاجكراو نەبێت، بێیت و بیكەیت بە فیگەری دیاری شاشەو وەك پاڵەوانێك نمایشی بكەیت !
یانی هەر بەڕاست بابەتێكی پزیشكی یان وەرزشی یان هەواڵێكی سیاسی لەنجەولارو قاچی ڕووتی بۆچیە؟ 

كەناڵە كوردیەكانی لەوپەڕی فەشەلی و پاتاڵی خۆیانن جا چ لەوەی هونەرمەند و شاعیری بلوری و فیلەریان كردە پاڵەوان یان چ لەوەشی شاشەی كەناڵەكانیان لە ناوەندێكی میدیاییەوە گۆڕی بۆ نمایشی ئافرەت و جەستەی سلیكۆن كراو!