رووتكردنەوە لە زیندانەكانی توركیا

2 مانگ پێش ئێستا

كارزان گلی
هیچ كەسێك ناتوانێت ئینكاری ئەوە بكات، كە زیندانەكانی توركیا پڕییەتی لە ئەشكەنجە و لێدان و رووتكردنەوەی ئافرەتان، بەڵام ئەم دیاردەیە لە سەردەمی ساڵانی نەوەدەكان و هەشتایەكاندا لە ترۆپك بوو و ئێستا كاڵتر بووەتەوە، بەڵام هەر بوونی هەیە، بە تایبەت بۆ زیندانیانی سیاسی كە زۆربەیان كوردن.

ماوەیەكە لەناو پەرلەمانی توركیا، قسە لەسەر رووتكردنەوەی ئافرەتان دەكرێت لەناو زیندانەكاندا، واتە وەكوو سزایەك و سووكایەتی پێكردن رووتیان دەكەنەوە.
بەڵام دەسەڵات و وەزارەتی دادی توركیا هەموو ئەو دەنگۆیانەی رەتكردەوە، تەنانەت باسیان لەوە كرد، پێشتریش و بەر لە هاتنە سەر دەسەڵاتی ئاكەپە، رووتكردنەوەی ئافرەتان لە زیندانەكاندا بوونی نەبووە و درۆیە.
لە بەرامبەر ئەو گوتانەدا، گۆرانیبێژی بەناوبانگ و سۆسیالیست، سێلدا باغجان لە پێگەی خۆی لە تویتەر لەبارەی رووتكردنەوەی ئافرەتان بۆچوونی خۆی دەربڕیوە.
ئەو دەڵێت ”لە توركیا ٣ جار زیندانی كراوم، هۆكاری زینیكردنیشم بە هۆی گۆرانییەكانم بووە، كە سیاسی بووە و بە مەترسی بۆ ئاساییشی ناوەخۆ لێكیان داوەتەوە. لە هەر ٣ جارەكەدا، لە زیندان رووتیان كردوومەتەوە“.

ئەم گوتەیەی سێلدا، وەكوو بەڵگەیەكی حاشاهەڵنەگر سەلماندی كە رووتكردنەوە لە زیندانەكانی توركیا بوونی هەبووە و هەیە.
لە ٢٠١٥ كاتێك سوپای توركیا بۆ لەناوبردنی پەكەكە هێرشی بۆ سەر جیزرە دەستپێكرد، لەوێ كوردەكان ئافرەتەكانیان بەر لە هاتنی سوپای توركیا گواستبووەوە بۆ شوێنێكی تر، چونكە ترسیان هەبوو دەستدرێژییان بكرێتە سەر.

سەربازەكان لەسەر دیواری ماڵە كوردەكان نووسیبویان ”بەداخەوە ئافرەتە جوانەكانی كورد، كاتێك ئێمە هاتین ئێوە لەوێ نەمابوون“
دەرپێی ئافرەتەكانیان دەرهێنابوو و بە تەنافەوە هەڵیانواسیبوو، ئەمەش وەكوو سووكایەتییەك بۆ ئافرەت.