بیخوێنەرەوە ڕەنگە لەدێڕێكدا خۆت ببینیت!

2 مانگ پێش ئێستا

عەتا شەمێرانی
-هەر ئەو ئاوە كوڵاوەی پەتاتەیەك هەڵدەوەشێنێت، ئەتوانێت هێلكەیەكی شل و شێواویش توند و تۆڵ بكاتەوە.
هیچ گرنگ نیە بارودۆخی چواردەورمان چۆنە، گرنگ ئەوەیە كە ناوەڕۆكی خۆمان چی تێدایە!
-هەندێك كەس بە حەسرەتی ژیانێكەوە وڵات جێ دێڵن و هەندێكیتر بە حەسرەتی وڵاتەوە شیعر دەنوسن!
-سینگڵەكان بە خەونی هاوسەرگیری و خێزاندارەكانیش بە هیوای ساتێك زگورتی بوونەوەن! 
-هەندێك كەس بە حەب و دەرمان ڕێگری لە دروست بوونی منداڵ دەكەن و هەندێكیش بە حەب و دەرمان هەوڵی دروست بوونی منداڵ دەدەن.
-خاوەن كارەكان لەدەستی قورسی ئیشەكەیان دەناڵێنن و بێ كارەكان لەدەست نەبوونی ئیش! 
-هەژارەكان لەدەست ژیانێكی ناخۆش و دەوڵەمەندەكانیش حەسرەت بۆ ئاسودەیی ژیانی فەقیرەكان دەخۆن! 
-خەڵكی ئاسایی ئەیانەوێت بەناوبانگ بن و هەر كە ناوبانگێكیان پەیدا كرد خۆیان لە خەڵكی ئاسایی دەشارنەوە! 
-ڕەش پێستەكان حەزیان دەكرد سپی بونایە و سپیەكانیش بۆ ئەوەی تۆزێك ڕەش ببنەوە لە كەنار دەریاكاندا ڕائەكشێن و خۆیان ئەدەنە بەرتیشكی هەتاو.
-سەیری هۆڵەكانی لەش جوانی بكەن نیوەی كێش دادەبەزێنێ و نیوەكەیتر بەحەسرەتی زیاد كردنی كێشیان لەوێن.
-هەندێك كەس لە دەست قسەیەكی ناخۆشی دایك و باوكیان دەگرین و هەندێكیشیان بەحەسرەتی بینینی دوبارەیان فرمێسكی خوێنین دەڕێژن!!
-ئێمە هەمووان بەدوای خۆشبەختیدا دەگەڕێن و بێئاگان لەوەی تەنیا ڕێسای خۆشبەختی ئەوەیە كە قەدری ئەوانە بزانین كە هەمانە.