قۆپی كردن لەنێوان شەرم و شانازی!

1 مانگ پێش ئێستا

لەنجە ئەحمەد
لەم ساڵانەی دوایدا، وردە وردە و بە ئاشكرا شكانی پایە بەهێزەكانی كۆمەڵگە دەبینین، بەشێكی بەهۆی كرانەوەی لەپڕ و بێ پێشەكی خەڵك بەڕووی تەكنەڵۆجیا دەگەڕێتەوە و بەشێكیتریشی بەهۆی گەشەسەندنی كۆمەڵَگا و فراوان بوونی جوگرافیا و زۆربوونی ژمارەی دانیشتوانە. 

بێگومان گەلێك هۆكاریتر وای كردووە مرۆڤ كەمتر وابەستەی داب و نەریتەكانی كلتورەكەی خۆی بێت و دووركەوێتەوە لە هەڵسوكەوتی ئاسایی كە رۆژانێك جێی شەرمەزاری بوون كەچی لە ئێستادا بە شانازییەوە باسی لێوەدەكەن. لێرە و لەوێ رۆژانە دەبینین و دەبیستین كە چەند ئاكار و خووی ناشرین نۆرماڵیزە كراون و زۆرجار وەك شانازی و باوەڕ بەخۆبوونیش نیشان دەدرێن. 

با لێرەوە بچینە ناو  تەوەری سەركی بابەتەكە، كە قسەكردنە لەسەر گزی كردن (قۆپیە) كە لەهەر بوارێكدا بێت كردەوەیەكی ناشرین و قێزەونە و شانازییەكردن پێوەی مانای ئەوەی هەنگاوێكیتر بەرەو نەمانی مۆڕاڵ و داڕمانی بەهاكانی كەسایەتی ناو كۆمەڵگەی كوردی دەنێین. لەوەش كارەساتتر ئەوەیە مامۆستایەكی زانكۆ باس لە سەردەمی تەلەبایەتی خۆی دەكات كە چۆن لە پۆلی دووی ناوەندییەوە بە قۆپیە قۆناغەكانی بڕیوە و لەسەر شاشەی تەلەفیزیۆن جۆرەكانی قۆپی كردن باس دەكات بۆمان! كە وەك رێپیشاندەری خوێندكارانە بۆ تاقیكردنەوەی ئەو رێگایانەی كە گرنتی سەركەوتن و دەرچوون دەدەن لە تاقیكردنەوە. ئەوەی بارەكە نالەبارتر دەكات ئەوەیە كە رێنماییەكارێك و فیگەرێكی دیاری ناو سۆشیاڵ میدیا، مامۆستای زانكۆ و خاوەن پەیمانگایەكی فێربونی زمان و وانە وتنەوە، شانازی بە گزی كردنەوە دەكات، لەكاتێكدا قسەی زۆری لەسەر بنیاتنانی تاك و بەرەو پێش چوونەوە هەیە و ئەو كەسەش كارەكتەرێكی بەرچاوی بواری پەروەردە و فێر كردنە، ئەم شانازی كردن و بەپێكەنین و خۆشیی و گەشییەوە گێڕانەوەی بەسەرهاتەكانی قۆپیەكردن و جۆرەكانی تامێكی جیاواز دەبەخشێت بەو خوێندكارانەی كە ویستیان لەسەر گزی و قۆپی كردن هەیە، وتەكانی ئەو وەك كەسێكی سەركەوتوو لە قۆپی كردنەكە رێخۆشكەرێكە بۆ كۆپی كردنی شێوازی قۆپیەكردنەكەی ئەو  و رێنیشاندەرێكی باشیشە بۆ خوێندكاران كە گزی كردن نەك عەیبە نییە بەڵكو دەتوانن لە پاشەڕۆژدا بە پێكەنینەوە و وەك ئازایەتییەك بە ئاشكرا و بۆ خەڵكانێكی زۆر باسی بكەن ، ئەمە زەنگێكیتری خەمناكە كە دەری ئەخات كە شەوەزەنگی پەروەردە و فێركردن نزیكترە لەوەی چاوەڕێی لێدەكرا، زەنگێكی خەمناك بۆ ئەوانەی لە مەترسی دۆخەكە تێدەگەن و خەمگین بەدیار گۆڕانكارییە ناباو و نەباشەكانی كۆمەڵگەوە دانیشتوون و لەتوانایاندا نیە بەر بەو هەموو گۆڕانكارییە لەپڕ و نەشیاوانە بگرن. 

زۆر گرنگە لەمەترسی ئەم بارودۆخە ئاگادار بین و درك بەوە بكەین كە بەرەو نشێو و لادان بەڕێوەین. ئەركی هەمووشمانە لەهەر پێگە و جێگەیەكدا بین ڕێگری بكەین لە داڕمانی بەها جوانەكانی كۆمەڵگەكەمان و هەوڵ بدەین ئەوكەسانەی بە ئاشكرا لەو بەهایانە ئەدەن سەرەكۆنە بكەین و نەهێڵین ببنە مۆدێل و نمونە بۆ تاكەكانی كۆمەڵگە.