پێناسە و ناسینی عەشق

1 مانگ پێش ئێستا

بێریڤان مەحمود
عەشق جوانیە، ترۆپكە، ئایینە، بیروباوەڕی پیرۆزی مرۆڤەكانە، بێدەنگیە تەنیایە، تەنانەت هێلانەی گەرمی ئارامی باوشی ترپەكانی دڵمانە،  عەشق تەنیا دووژمنێكە لە بەرامبەر ڕقدا دەوەستێتەوە ناهێڵێ ڕق گەورەكەین، كاتێ گەشتیتە ناوەڕۆكی عەشق هەست بە هەموو ووجودت دەكەیت دەزانی كە چ هێلانەیێكی گەرمی ئەم ژیانەیت، چ جوانیەك و خزمەتێكت بەخشیوە بە مرۆڤایەتی، چۆن لە ژێر بەرزی خۆرو زەردەی خۆردا پێدەكەنی و چ شەرمێ ڕووخسارو سەر كوڵمەكانتی داگیركردووە، تەنانەت ئاوێنەكان دەبنە تابلۆكێش و تابلۆیێكی پڕ نهێنی عەشقی ڕووخسارت دەكێشن، سرووشت و باڵندەكان باران دڵۆپەكانی سەر دەریاو دەریاكان درختەكان چیاكان هەموو دەبنە شایەتحاڵی عاشق بوونت. 

سەرەتای ناسینی عاشق بوونمان لەباوشی گەرمی دایكمان و ڕووخساری میهرەبانی ماندووی باوكمانەوە دەست پێدەكات، ئەو ئێوارە درەنگانە بوو كە لەبەردەرگای دیووی ناوەوەی باخچەی ماڵەكەمان چاوەڕوانی كولێرە تەنوریە گەرمەكەی دەستی باوكمان و دەم كردنی چای سەر لە ئێوارانی باخچە بچكۆلانەكەی دایكمان دەكرد
ئەو شەوە تاریكانەی هەریەكەو لە جێی خۆی بەدەم گێڕانەوەی چیرۆكێ یان كتێبەكانی دەستمانەوە لە ژێر ڕۆشنای ئەستێرەكاندا خەومان لێدەكەوت، خەمەكانمان بچووك بوون خەمی دووری باوشی گەرمی یەكمان نەبوو، تەنیا غوربەت و دوورێك بەرزای ئاسمان ژماردنی ئەستێرەكان بوو ڕاكردنمان بە دووای پەلكە زێڕینەوە بوو
هەموو شتێ بۆ ئێمە ناوی عەشق بوو، ئەو عەشقەی ناو عەشقی پیرۆزی مناڵیمان بوو چونكە تەنیا عەشقێكە دوور لە بەرژەوەندیەكانی ژیان گەورەدەبێ، ئەو ڕۆژەی دایك یان باوك دەمرێ عەشقیش بە هەموو جوانێكانیەوە كۆتای دێت ودەمرێ چونكە ئیتر جارێكی تر چیتر مناڵ نابینەوە.