فێری دەوڵەتداری ببن

1 مانگ پێش ئێستا

سەرتیپ وەیسی كەریم
تازە بە تازە دكتۆر رەهێڵ، بڕیكاری وەزیری تەندروستی دەڵێت: دۆخی توشبون بەكۆرۆنا لەناوەندەكانی خوێندن لەپەروەردەو زانكۆكان زیادیكردوە، بۆیە ئەگەرێكی زۆر هەیە لیژنەی باڵای روبەڕوبونەوەی كۆرۆنا بڕیار بدات بۆ ماوەیەكی كاتی دەرگای خوێندنگەو زانكۆكان دابخرێنەوە.

زۆرمان وت: ئەو كارەی ئێوە كردووتانە بێ پلان و دیراسەنەكراوە، ئەوەش پەیوەندی بە سەقافەت و عەقڵیەتی حوكمڕانیەوە ئێوەوە هەیە، چونكە ئێوەی وەزیری تەندروستی و پەروەردە؛ وەكو دوو كادیری حزبی بێ ستراتیژ و بێ بەرنامەن‌، نازانن ئیدارەی قەیران بدەن و لە ژێر كاریگەری سۆشیال میدیا و هاش و هوشی خەڵكن!!
باسی وەزیری خوێندنی باڵا هەرناكەم، چونكە‌ یەكێكە لە خراپترین وەزیرەكانی مێژووی كابینەی حكومەتی هەرێمی كوردستان و بە‌ رێككەوت بۆتە وەزیری خوێندنی باڵا، بۆیە چاوەڕێی هیچی لێناكرێت !

باشە بەو هەموو عەقڵەی خۆتانەوە باسی خۆپارێزی و رێككاری تەندروستیتان لە نێو ناوەندەكانی خوێندن دەكرد، كە ژمارەیان یەك لەسەر سێی دانیشتوانی هەرێمە ( یەك ملیۆن و 700 هەزار قوتابی و مامۆستا)؟!
 
‌ئێستا ژمارەی توشبووان بە كۆڕۆنا چەند ئەوەندە بۆتەوە ( بەشێكی پەیوەندی بە كردنەوەی ناوەندەكانی خوێندن و بەشەكەی دیكە پەیوەندی بە هۆكاری دیكەوە هەیە)‌، لەبری ئەوەی وەزیری تەندروستی پلانی بۆ ئیدارەدانی ئەو قەیرانە هەبێ ، هەستاوە بەو بەیانییە لە واڵەكەی خۆی پۆستێكی كردوە و دەڵی: ئەم رێبازە لە بیر ناكەین پەیمانە
رێی بارزانی و كوردستان یان نەمانە. 

 دیارە جەنابی وەزیر گومانی لە پارتیبوونی خۆی هەیە و هێشتا هەر دەیەوێ ماستاو بكات، بۆئەوەی لە خولێكی دیكە بمێنێتەوە؟!
كورە عەیبە عەیب! ئیوە پیاوی دەوڵەتن وەرنە دەرەوە لە بەرگی حزبی و ببنە بەشەر، بڕۆن لە بەعسییەكانەوە فێری دەوڵەتداری بن؟!