سی ساڵ دیموكراسی یان دیكتاتۆریی، لە كوردستان!؟

1 مانگ پێش ئێستا

رێبوار عەلی 
بۆ وەڵام ئەم پرسە گرنگە، شیكاریی زۆری دەوێت! بەڵام كەسێك لە دوای ساڵی ١٩٩١ وە لە كوردستاندا ژیابێت و لێی دوور نەكەوتبێتەوەو دەستوپەنجەی لەتەك یەكێتی و پارتی نەرمكردبێت، بە ئاسانی وەڵامی دەست دەكەوێت، كە دەسەڵاتی هەرێمی كوردستان هەرچییەك بووبێت، دیموكراسی نەبووە، چونكە یەكێك لە بنەما سەرەكیەكانی دیموكراسی دەستاودەستكردنی ئاشتیانەی دەسەڵاتە، كە ئەوانە نەیان كردووە.
ئەم كارەشیان لە رێگەی سێ پیلانی وردومەحكەمەوە ێەنجامداوە:
١-  فرتوفێڵ و تەزویر لە هەڵبژاردنەكان.
٢- یەكلاكردنەوەی كێشە سیاسیەكان، بەهێزی چەكداریی.
٣- گەندەڵی و فەساد، لە بەڕێوەبردنی هەرێمەكەدا.
پارێزگاریان لە دەسەڵات و مانەوەی خۆیان كردووە. كەواتە بە دڵنییاییەوە، دیموكراس و لیبڕاڵ نەبوون.

دەسەڵاتێك بەتامی دیكتاتۆریی:
دیكتاتۆریی سیستمی فەرمانڕەوای پۆلیسیی و مانەوەیە لە دەسەڵاتدا تا ئاستی بۆگەنكردن و گەندەڵبوونی رەها.
باری دیكتاتۆریی، نواندنی جۆراوجۆری هەیە، ئەوەی كوردستان لە مۆدیلی فەرمانڕەوا بنەماڵەییەكانی نیودورگەی عەرەبییە، بە دیوەخراپەكەیدا...
٣٠ ساڵ شەڕی ناوخۆو گەندەڵیی.
٣٠ ساڵ دەتاودەستنەكردنی دەسەڵات.
٣٠ساڵ فرتوفێڵ لە هەڵبژاردن.
٣٠ ساڵ شكڵی بوونی دامودەزگای دیموكراسی.
٣٠ ساڵ بەرتەسككردنەوەی ئازادیەكان، كە بەخوێنی سەد ساڵ قوربانیدانی گەلێكی چەوساوە بەدی هاتبوو.
٣٠ ساڵ رەفتارو كردار و كلتوریی نامرۆڤانە.
ئەمە پوختەی ٣٠ ساڵ دەسەڵاتی پارتی و یەكێتیە!
لەناوچەكەدا واباوبووە، هەر ٣٠ساڵێك جارێك گۆڕینی نەخشەی سیاسی بووە لە رۆژهەڵاتی ناوەڕاست. هێزە نێودەوڵەتی و هەرێمیەكان بەوردی لە ناوچەكەدا پەیڕەویانكردووە، بەتایبەت لە هەرێمێكی مۆلەقدا ئەم ئاڵوگۆڕكێیە ئاسانترە.
با دەسەڵاتدارانی هەرێم چەند ساڵێكی تریش بەرگەبگرن، بەڵام ناڕەزایی میللەت لەلایەك و لەلایەكی ترەوە لە گەڵ یەكەم جوڵانی دامەكەدا دەكەون !
بەڵام پرسیاری گرنگ لێرەدا ئەوەیە كێن ئەو هێزانەی جێگەیان دەگرنەوە؟
هەرێمی كوردستان لە ناو نەخشەی سیاسی هەریەك ئەمریكا و ئێران و توركیادایە، ئەوان هەتاكو ئەم ساتەش بڕیارە چارەنوسسازەكانی عێراق و كوردستان یەكلادەكەنەوە، دوابڕیاری سیاسی لەم هەرێمەی ئێمەدا لەدەستی ئەواندایە و وەك كارتی فشار لە ناو سێگۆشەی (ئەمریكا-ئێران-توركیا)دا بەكار دەهێنرێت.
لەناو هەرێمی كوردستان و تەنانەت لە ئاستی عێراقیشدا، هێزێكی گەورەی نیشتمانی نیە، لەدوای گۆڕانكاریەكان دەستبگرێت بەسەر بارودۆخەكەدا و هاوڵاتیانی وڵاتەكە متمانەی پێبكەن، چونكە ئۆپۆزسیۆنەكەی لاواز و پەرتەوازەیە.
ناچار هێزە نێودەوڵەتی و هەرێمایەتیەكان لەسەر لایەن و كەسانێك مامەڵەدەكەن كە بەرژەوەندی هاوسەنگی ئەوان بپارێزێت، دورنیە ئەوانیش هێزێك هەڵبژێرن بتوانێت لە رووی سەربازی و ئابوریەوە جێگەی یەكێتی و پارتی بگرێتەوە!
كەواتە قۆناغە نوێیەكە بۆ داهاتوو، هەم هێزی ئامادەكراو و هەم هێزی خاوەن پێگەی جەماوەری و ئایندەسازی دەوێت، كە نیشتمان بەرەو لەنگەری ئارامی ببات و شوێنەواری ٣٠ساڵ دیكتاتۆری دەسەڵاتی دوو بنەماڵەی یەكێتی و پارتی بسڕێتەوە.
یەكەم دەركەوتنی ئەو هێزەش، لایەنی كەمی دەبێت جیاوازبێت لە یەكێتی و پارتی و هەرگیز نمونەی ئەوان دووبارەنەكاتەوە.
-لە سیستمی حیزبایەتی.
-لە شێوازی فەرمانڕەوایی.
-لە ئاكارورەفتاری كوردایەتی.
-لە ئەقڵی بنەماڵەیی و میراتگری سیاسی.
رێبوار عەلی