بەرپرسەكان و خەلكی ئاسایی

1 مانگ پێش ئێستا

زەبەنگ بەهادین 
جیاوازیمان لە چیدایە، كێ‌ باشترە لە كێ، كێن ئەوانەی پلەیان بەرزە و كێن ئەوانەی ئەوان بە لەخوار خۆیان دەزانن، كێن ئەوانەی پلەكان دەبەخشنەوە، ئایا مرۆڤەكان هەموو یەكسانن یان یەكسانی بوونی نییە و تەنها لە جیهانە خەیالێیەكەی ئەفلاتون دا هەیە.

كاتێك دەچیتە رێستۆرانتێك یان نەخۆشخانەیەك تەنانەت لە سەیرانگاكانیش دەبینی شوێنێك جیاكراوەتەوە بۆ بەرپرسەكان یان پارە دارە نا هوشیارەكان، شوێنی دانیشتنی جیا شوێنی ئوتۆمبیلی جیا، مامەلەی جیاواز، بەرزكردنەوەی بەرپرسەكان و پارەدارە نا ژیرەكان نزمكردنەوەی كەسانی ئاسایی، جیاكردنەوەیان بە بەرزكردنەوەیەكی وەهمی و خەیالاوی.

لە كۆمەلگای كوردی گرێی دەرونی بەرپرسە لە خۆ باییەكان و دەولەمەندە بوغراكان هێندە زەق بووە بە ئەستەم چارەسەر دەكرێت، بەشێك لە توشكردنی كۆمەلگایە بەشێكی دی لە خۆ نەبینینی خۆیانە و ئەو هەموو گرێ دەرونیانەی كە سالانێك زۆر لە ناویان دروستبووە.

لە هەر ولاتێك جیاكاری زۆر كرا رق و كینەی تاكەكان بەرامبەر یەكدی زیاد دەكات، چ پێویستە كەسێكی دەوڵەمەند یان بەرپرس بە ئۆتۆمبێلێكی گرانبەها هاتوو چۆ بكات یان نەخۆشخانەی تایبەتی هەبێت یان خوێندنگای گرانبەها و تایبەت، كێشە ئەوەیە ئەم گرێ دەرونیە و ئەم ناساخی مێشكە لە باوانەوە دەگوازرێتەوە بۆ وەچەكا ن، سەرنجامەكەشی دابەشبونی كۆمەلگاو دابرانی تاكەكانێتی لە یەكدی.

بەپێی ئاین جیاوازی تەنها لە نێوان زانا و نەزان هەیە، واتا كەسانێك كە زانست و بیر و هۆشمەندییان زۆرترە لەچاو كەسانێك كە نیانە وەك لەم فەرمودەیەدا لێرەدا نیشانەی پێدراوە ( قل هل یستوی الدین یعلمون و الدین لا یعلمون)، بە پێی زانست و دەرونناسی تەنها لە ژیری و عەقلدا جیاوازی هەیە لە نێوان تاكەكان. لە فەلسەفەشدا هیچ جیاوازیەك نییە لە نیوان مرۆڤەكان. كەواتە كێن ئەوانەی ئەم جیاوازیانە دەخولقێنن وە لە پێناوی چیدایە؟.

دروستكردن و قەبەكردنی جیاوازی نێوان تاكەكان دەگەرێتەوە بۆ چەند هۆكارێك لەوانە هەست بە كەمبونی كەسی خۆ بە زلزان، بە واتا ئەم جیاوازییە دروست دەكات و پلە و پێگەیەكی تایبەت دەدات بەخۆی بۆ پركردنەوەی ئارەزوەكانی خۆی و شاردنەوەی كەم و كوریەكانی. لە ڕوویەكی دیەوە تاكی لاواز ئەو جیاوازیە بەرجەستە دەكات بە نوشتانەوەی خۆی و قبولكردنی بەرز بوونەوەی ئەو بە هۆی نەزانینی خۆی هەلبەت لە نەزانین و ترسەوە ئەو ئەم كارە دەكات بۆیە ئەمەش دەبێتە پالنەر تا كاكی بەرپرس یان دەولەمندە بوغراكە زیاتر خۆی لە بەرزتر ببینێت و پێ بنێ بەسەر چینەكانی ژێرەوەدا.
دەبێت تاكەكانی كۆمەلگا ووشیار ببنەوە رێگە نەدەن بەو شێوەیە ئەو جیاكاریە زەق بكرێتەوە و گەشەی پێبدرێت، هەڵبەت ئەمە دەبێت بە هەولی هەموان بێت و بە هاوكاری میدیا و راگەیاندنەكان بۆ ئەوەی بتوانین كۆمەلگایەكی تەندروستمان هەبێت.