خوای قەبیلە و خوای خەڵك

23/03/2021

مەزن جەمیلە
ئەگەر چاوێك بە تەوراتدا بخشێنیت، لەوە تێدەگەیت، كە خوا لە تەوراتدا، خوای خەڵكی نییە، تەنها خوای قەبیلەیەكە، تەنها لەگەڵ ئەوانیش دەدوێ و بۆ ئەوان هەیە.
ئەم ڕۆژانەش كە گوێم لە باس و خواسی ئیسلامییە سیاسییەكان دەبێت سەبارەت بە نەورۆز، تەواو هەست بە زەوتكاری خوا لەلایەن ئەو تاخمەوە دەكەم، خوا تەنها بە هی خۆیان دەزانن، قەبیلە نییە و تاخمە، دیسانەوە هەر مۆنۆپۆلكردنی خوایە.

 ئەگەر لە هاوكێشە گەورەكە بڕوانیت، خوایێك هەیە، كە مرۆڤەكانی دروستكردووە، ئەو مرۆڤانەش هەستاون شارستانییەت و بۆنە و جەژنیان سازداوە، كە خوا خاوەنی مرۆڤەكانە، كەواتە خاوەنی لێكەوتەكانیشیانە، بەهاریش هی خوایە و شارستانیییەتیش هی خوایە، بۆنەكانیش هەر هی خوان، كەوابوو هەر بۆنەكانی تۆ بۆنەی خوا نین، بۆنەی تریش هی خوایە، خوا هەر خوای تۆ نییە، خوای ئەوانیشە، خۆ ئەگەر قەرارە خوایەكەی تۆ تەنها خوای خۆت بێت و خوای خەڵكی نەبێت ئەوە شتێكی ترە، سا بۆیە گەورەیی خوا لەوەدایە كە هەموو ڕەنگەكان لەخۆی بگرێ و قبوڵی بێت،  نەوەك وەك ئەتۆ یەك ڕەنگ و یەك دەنگی قبول بێت و تەواوی مرۆڤ و بۆنەكانیان لە قاڵب بدات. 

ئەم زهینیەتی كافركردن و ڕەتكردنەوە و سڕینەوەیە، هەمان ئەو زیهنییەتەیە كە ئێزیدی دەكات بە كەنیزەك و كاكەیی بە پیس دەزانێت، هەمان ئەو زیهنییەتەیە كە میزۆپۆتامیای دایكی شارستانییەتی كردووە بە كەلاوە، كە مرۆڤەكان تێیدا لە بری ژیانێكی ئارام و نیان، كەم ئەندام و هەتیوو و بێوەژن و ژنكوژراو و بێ دەرەتانن، زیهنییەتێك كە بۆ مەرگ دەژی و ڕقی لە ژیانە، چاكەی مرۆڤێك وەرناگرێت ئەگەر لە حزبەكەی ئەودا ئەندام نەبێت!