پێڵاو تێگرتن

01/04/2021

كەمال چۆمانی
نەوەی نوێ و دامەزرێنەرەكانیان، بە سەرۆك و ئەندام پارلەمانەكانیشیانەوە، سەرسامی دۆناڵد تڕامپ بون و هێشتاش هەر سەرسامی ئەون. هەر لە بنەڕەتەوە ئەو حیزبە كە دامەزرا، بەشێكی زۆری لەژێر كاریگەریی ئەو رەوتە پۆپیولیستەی تڕامپ بو. هەمو كردەكانی ئەو حیزبە لەلایەن سەرۆكەكەیەوە ئاراستەدەكرێ، ئەو خۆی دوا بڕیاردەرە و هەر خۆشی بڕیاردەدات تەنانەت ئەندام پارلەمانەكانیش چی بڵێن و چ كردە\ئاكتێك بكەن؛ بۆیە، تێگرتنی پێڵاو لە سەرۆكایەتیی پارلەمان رێك ئەوەیە كە حیزبەكە لە پێناویدا دروستكراوە. 

كارێك بكە ئەوانیدی نەیكەن، كارێكی ئاسان بەڵام لای خەڵك بە پاڵەوانێتیی هەرە گەورە تەماشابكرێت. هەوڵبدە هەموان ئیحراج بكەیت بۆ ئەوەی بڵێی شتێكمان كردوە كەس نە جورئەتی دەكا، نە تواناشی هەیە. 

ئەو رەوتە پۆپیولیستە لێدانێكی هەرە گەورەیە لە ئۆپۆزسیۆن. لە راستییدا هیچ كەس هێندەی یەكێتیی و پارتیی سود لەو رەوتە پۆپیولیستە نابینن كە لە بەرگی ئۆپۆزسیۆندا كاردەكات.

پێڵاوتێگرتن یا تێنەگرتن لای من كێشەیەك نییە، ئەوەی كێشەیە ئامانجەكانی پشت پێڵاوتێگرتنەكەیە؛ كاتێك ئامانج دەبێتە خۆنیشاندان و ئامرازێك بۆ گەوجاندن، ئەوە مەترسییە چونكە پڕۆژە و كاركردن و رێكخستن و لێگەڕینت لەبیردەباتەوە و ئەوەندە بەسە هەر جارناجارێك كردەیەكی لەو جۆرە بكەیت و خۆت فڕێدەیتەوە ناو هەمو ماڵێكەوە.

نەوەی نوێ ئەگەر، بۆ نمونە، رەوتی دیموكراتە پرۆگرێسیڤەكان و چەپ\سۆشیالیست دیموكراتەكان لە ئەمریكا كاری تێكردبوان نەك رەوتی رەگەزپەرستی پۆپیولیست و راستی دۆناڵد تڕامپ، لەبری خۆنیشاندان بە پێڵاوتێگرتن، پڕۆژە و پۆڵسی و دیبێیت و گفتوگۆی جدیی و كار و رێكخستنی خەڵك و كامپێین\هەڵمەت و كاری كۆڵێكتیڤ\هەرەوەزیی و بەكۆمەڵ و پێشخستنی فیكرێكیان دەكردە سەرمەشقیان.