‏میدیای داڕماو

03/04/2021

 ئارەزوو نوری
 رۆژ نیە وتارێك یا نووسینێك لەسەر بێ ئیتیكی میدیای كوردی و نەنگییەكانی بەرچاو نەكەون.. زۆربەی كات وەرگرو ناوەندە زانستییەكانی بواری میدیا گلەییەكی زۆریان لەكەناڵ و میدیای كوردی بەگشتی هەیە.. 

گەر میدیایەك ئەرك و پیشەی رۆشنبیركردن، گواستنەوەی هەواڵ و زانیاری دروست و بەسوودو هۆشیاركردنەوەی كۆمەڵگە و خزمەتكردن بێت؛ بەڵام پێچەوانەی ئەوانە ئەركی خۆی بەجێ بگەیەنێت، دەبێ چ ناوێكی جگە لەمیدیا لێ بنرێت؟ میدیایەك ئاستی خۆی بۆ لایك و كۆمێنتی نەشیاوو بێ ئەرزش داگرتبێت تەنها بۆ ئەكتیڤ بوون.. پێویستە چ ناوێكی شیاوی بۆ دابنرێت؟ 
میدیایەك؛ هەواڵە گرنگ و پێویستەكانی ناوچەو دەوروبەری خۆی پشت گوێ بخات و هەواڵێكی بێ ئەرزش لەوپەڕی دونیا بكاتە گرنگترین هەواڵەكانی رۆژ، میدیایەك گوێ بە ئیتیكی پیشەو لادان لەبنەما یاساییەكان نەدات و منداڵێكی خوار تەمەنی یاسایی بدوێنن و بخرێتە سەر شاشەو بۆ ناوزڕاندن و تەشهیر.. 
میدیایەك هێندەی لەنێوخۆیان دژایەتی یەكتر دەكەن و هەواڵەكان بە ویستی خۆیان ئەتك بكەن، میدیایەك هەڵسوكەوتی نەشیاوو و هەواڵی سێكسی و تایبەت و چوونە نێو ژیانی تایبەتی كەسایەتییەكان لەڕێی میدیاكارەكانی ئەنجام بدات بێ رەچاوكردنی تەمەنی وەرگرانی!
میدیایەك دراماكانی نزیك هەزارو پێنج سەد زنجیرەبێت، كلتوورێك دوور لەكلتوری میللەتەكەت رۆژانە دەرخواردی وەرگر بدرێت بە هەموو جۆرە ژەهرو نادروستییەكەوە، تەنانەت لە وەرگێڕانی فیلم كارتۆنەكانی بۆ زمانی كوردی كۆمەڵێك دەستەواژەی خراپ و جنێو زیاد دەكرێن و لەهەڕەتی تەمەنی منداڵی وشەی خراپ و نەشیاویان فێر دەكرێت.. 

سەرباری هەموو ئەمانە رۆژانە مۆدێلێك بە قاقاو رەفتارو جلوبەرگە نەشیاوەكانی سەر شاشەكانیان تەنیوە.. دەی میدیایەك هەموو خەسڵەتێكی پێچەوانەی بنەما پیشەیی و یاساییەكان بێت و كەس پەسەندی نەكات، بۆ دەبێ بەناوی میدیای تەندروست بە میللەت بفرۆشرێتەوە.. 
دەی ئێستا كاتی ئەوە نەهاتووە بۆ راستەڕێكردنی میدیای كوردی ناوەندە زانستییەكان، بەشەكانی راگەیاندن و رۆژنامەنووس و شارەزایانی میدیا بێنە دەنگ و داوای سنووردانان بۆ ئەو هەموو پێشێلكاریە بكەن؟.