لە دەسەڵات برایەتی و ئامۆزایەتی ناخوات

04/04/2021

مەحمود یاسین كوردی
رۆژنامەی واشتن پۆستی ئەمریكی هەواڵی دەستگیركردنی (شازادە حەمزە) برای شا عەبدوڵڵای ئوردن و ٢٠ كەسی دیكەی بڵاوكردەوە كە گوایە بە نیاز بوون كودەتا بكەن.

ئەسڵی بابەتەكە پەیوەندی بە دەسەڵات و ناكۆكی قوڵ هەیە كاتێك لە ساڵی ١٩٩٩ شا حوسێن مرد، عەبدوڵڵای كوڕی هاتە شوێنی ئەویش حەمزەی زڕبراكەی كرد وەلی عەهد(جێگری خۆی)، تا ساڵی ٢٠٠٤ كاتێك شازادە حوسێنی دووەمی كوڕی بووە ١٠ ساڵ راستەخۆ براكەی بە نامەیەك لە سەر كارلابرد و كوڕە ١٠ ساڵەكەی كرد جێگری خۆی بەڵام تا ساڵی ٢٠١٢ دەست بەكارنەبوو چونكە باڵغ نەبوو.!
ئیتر بۆیە دوای  ١٧ ساڵ شازادە حەمزە ویستی حەقەكەی خۆی بە كودەتا بە سەر برا گەورەكەی و برازاكەی وەربگرێتەوە، بەڵام فریا نەكەوت.!

بۆ زانیاریتان پێشتریش شا حوسێن بۆ هێنانە پێشەوەی عەبدوڵڵای كوڕی دوای ٣٠ ساڵ حەسەنی برای لە پۆستی وەلی عەهد لابرد. 

بۆیە لە سیاسەت و دەسەڵاتداری بەرژەوەندی و هێزو نفوز هەیە نەك خزمایەتی، بۆیە ئەگەر برا بیەوێ كودەتا بە سەر برا گەورەكەی لە وڵاتێكی ئارام و كەم كێشەی وەكو ئوردن بكات، بێگومان ئامۆزاكانیش لە هەرێمی كوردستان ناچاربن كودەتا دەكەن، ئەوانەی لە دوای خوێندنەوەی ئەو پۆستە دەڵی ئەو خەونەی ناحەزان نایەتە دی بابچن مێژووی میرنشینی سۆران و بابان بخوێنەوە لە سەر ناكۆكی و شەڕو ململانێی كوڕو باب و ئامۆزاو مام و برازا.