مەبە بە كۆیلە‌ و ئالودەبوی تۆڕی كۆمەلایەتی

04/04/2021

ژوان ئەحمەد
تۆڕی كۆمەڵایەتی، دياردەیەكی نوێی كۆمەڵی ئێمەیە، بەڵام ئەگەرچی نوێیە، بەڵام تا گەردنمان تیایدا نغۆر بوین، بۆتە هۆی دابڕانی تاك، هەڵوەشاندنی خێزان، خراپ بونی خو و تەندروستی مناڵ و گەورە، بۆتە هۆی ئالودەبون.
زیاتر لە دەهەیەكە، تۆڕی كۆمەلایەتی بەكاردەهێنم، لەم دە ساڵەدا جگە لە فەیسبوك، لە هیچكام لە تۆڕەكانی تر نەمتوانیوە ئەكتیڤ یان بمێنمەوە، چەند جارێك ئینستاگرامم داناوەو دامخستوە‌و ئێستاش وەك فەیسبوك كردومە بە شوێنی نوسین، رۆژانە كاتژمێرێك تەرخان دەكەم ئەگەر كەمتر نەبێ زیاتر نیە، بۆیە بۆتە فاكتەرێك بۆ ئارام بونەوە و گوزارشت كردن لەو شتانەی رەنگە روبەرو نەتوانم بە هەموو هاوڕێكانمی بڵێم.

تۆڕی كۆمەلایەتی، دەكرێت كەناڵێك بێت تایبەت بە خۆت‌و تیایدا هاندەر بیت بۆ باشتر كردنی كۆمەڵ، بەشداربون لە پەرەپێدانی توانای ئەوانی دی، خۆپەروەردە كردن‌و گرتنی هاوڕێی نوێ، بەڵام تۆڕی كۆمەلایەتی هەرگیز خێزان نیە‌و جێی خێزان ناگرێتەوە.

بەڵام!
ئێستا ئێمە دەقاودەق ژیانمان گواستۆتەوە بۆ ناو تۆڕی كۆمەلایەتی، ئەلبومی وێنەكانمان كە جاران لە كەنتۆردا بوو پیشانی هەموو كەسێك نەدەدرا، ئێتسا چۆتە سناپ چاتەوە، مەتبەخ، ئوتومبێل، تاكی جلەكانمان، ماكیاژەكانمان، سەیران‌و گەشت، كۆبونەوەو میوانداری، تەنیا یەك شت ماوە بچێتە ناو تۆڕی كۆمەلایەتی ئەویش ژوری نوستنەكانمانە.

ئەوە ژیان نیە
ژیان لە فەیسبوك‌و تۆڕەكانی تردا نیە، چونكە ژیان لەم دونیا گریمانەییە وایە، خەڵك كێشە‌و كۆمێنتەكانتی خۆش دەوێ، بەڵام كەس هاوكارت نابن لە چارەسەری كێشەكانت چونكە ئەوانیش سەرقاڵی دونیا گریمانەییەكەی خۆیانن، بۆیە بگەڕێرەوە ناو خێزان ‌و كۆمەڵ.
تۆڕێ‌ كۆمەلایەتی بۆ پێشخستن‌ و هاوكاری ژیانی تۆیە، نەك بۆ ئەوەی بیكەیت بە ژیانی خۆت‌ و لێت بگۆڕێ‌ و پێت وابێ تۆ لەو ژیانەدا ئەتوانی بژیت
تۆڕێ‌ كۆمەلایەتی بەكاربێنە بۆ ئەوەی كاربكەیتە سەر خەڵك، نەك خەڵك سەرسام بكەیت بە ژیانە روكەشیەكەی خۆت، تۆ كە لە سناپ پێ ئەكەنی، تەنیا نیت؟ برینەكانی ناو خۆتت بیردەباتەوە یان بەو پێكەنینە دەتەوێ دایپۆشیت؟
تۆ ئەزانی لەودیوی شاشەی مۆبایلەكان چەند ماسك هەیە؟؟ چەند خەنجەر هەیە بۆ ئەوەی روحت بریندار بكەن؟؟ تۆیەك كە لە ماڵەوە گەورەیت، بۆچی سۆشیال مێدیا تا رادەی ساویلكەیی بێهێزی كردویت‌و ئەژنۆت دەشكێت كە كەسێكی تر دەبینی؟؟
برینەكانت، بۆشاییەكانی ناو روحت، تەنیاییت، لە سۆشیال میدیا چارەسەری نیە، بەڵكو ئەم تۆڕانە تەنیا برینەكانت گەورەتر‌و بەسوێتریان دەكات بۆیە بە باشی بەكاری بێنە‌و مەبە بە كۆیلەی.

سۆزداری چۆن بە ئیمۆجی دەكرێت!
ئێستا پەیوەندیەكان قورسترن، گفتوگۆ لەسەر پێكەوەبون لەجیاتی هەست بۆتە تێكست، نیگا‌ و ماچەكان بون بە ئیمۆجی‌ و نوسینی بێ روح ( موااااح).. هەستەكانیش بون بە نوسینێك لە ئەپدەیتی فیڵینگ‌ و ئەكتیڤیتی... 

لە ژیانی ئاسایی، زۆربەمان یەكەم ماچ، یەكەمین گوڵ، یەكەمین نامەمان لای خۆمان هەڵگرتوە، بەڵام تۆ لە سناپ چات هێشتا زەردەیەكت بۆ ئیمۆجی ماچەكە نەكردوە، هێشتا گفتوگۆكەت بەتەواوی نەخوێندۆتەوە، راستەوخۆ دەسڕێتەوە و شوێنەواریشی نەماوە....

تۆڕی كۆمەلایەتی شوێنێكی پارێزراو نیە بۆ ماچەكانت، هەستەكانت، بۆ رازو نیازەكانت، بەڵكو مەترسیدارترینە بۆ یەكتر قبوڵ كردن‌و پارێزراوی‌ و جێگیری پەیوەندیەكان، رەنگە  لایكی یەكێكی تر، ئیمۆجیەك، پێكەنینی یەكێكی دیكە بە ووشە سەرتاپای دڵت وەك شوشە بشكێنێت... بیریشت نەچێت، دڵشكان لەو دونیا گریمانەییە زۆر ئاسانترە لەوەی بتوانی روبەروو دڵێك بشكێنی.
جاران بۆ ئەوەی دەست لێك بەردەی دەریایەك فرمێسك دەڕژا، ئێستا هیچی ناوێ تەنیا بلۆك كردن‌ و ریموڤ كردنێكە‌ و دوای چەند خولەكێك بیردەچێتەوە

دایكایەتی و باوكایەتی پێدانی مۆبایل و نێت نیە
جاران مناڵەكانتان پڕ بون لە توانا‌و ئینێرجی، ئەو یاریانەی دەیانكرد هەمیشە پڕ جوڵە‌و پێكەنین بون، بوار بۆ وەستان‌و دانیشتن نەبوو، بۆیە مناڵ زیاتر تێكەڵ‌و كۆمەلایەتی تر، كەمتر قەڵەو‌و خەمۆك بون.. ئێستا یاریەكانیان بردۆتە ناو ئایپاد ‌و مۆبایلەكانتانەوە، لەوێ رادەكەن، شەڕ دەكەن، پێدەكەنن، هەر بەو شێوەیەش چاو و دڵیان لەدەست دەدەن!

تۆ دایكی، تۆ باوكی، خێرە رێگە ئەیەیت ئایپاد‌و مۆبایل مناڵەكەت بۆ پەروەردە بكەن؟؟؟
چۆن دڵت دێت ئاوەها بە هێواشی مناڵەكەت بكوژیت؟!

گەنج گەورە نابێت
تۆڕی كۆمەلایەتی هەرگیز مرۆڤ گەورە ناكات، تۆ ببینە:
ئەوەی لە تۆڕە كۆمەلایەتیەكان بەناوبانگ بون، هیچیان مرۆڤە گەورەكان نین، بەڵكو ئەو مرۆڤانەن كە گرگنن، گرێیان هەیە، كەسانێكن سەدان ماسك دەپۆشن، تۆش دەكەن بە ئامراز بۆ ناوبانگ‌و گەورە بون!
تۆ ئەبینی بەهجەت یەحیا‌ و عەدنان‌ و خالید رەشید ‌و نەریمان بابان‌ و دەیان بەناوو سەنگی تر لە تۆڕی كۆمەڵایەتی بن؟؟
هەستت كردوە  كە بەختیار عەلی ‌و توانا ئەمین‌ و دەیان گەورەی تر لە تۆڕی كۆمەلایەتی هێندەی فڵان كچی رتوش بە فیلەر‌ و بۆتۆكس ‌و كونتور فۆڵەوەر‌ و فانی هەبێ؟؟
بۆیە تۆڕی كۆمەلایەتی تەنیا گەوجەكان بە تۆی ئامرازی لایك، گەورە دەكات.

تۆڕی كۆمەلایەتی ماڵ نیە، خێزان نیە، كۆمەڵگە نیە... كە چارەنوست هەر ئەم خێزان‌ و كۆمەڵگەیەیە بۆیە ئێستا بگەڕێرەوە ناوی‌ و بەراستی چاكی بكە نەك لەناو تۆڕی كۆمەڵایەتی.!

ئامۆژگاریەك لە خۆمانەوە بۆ خۆمان
بۆ تۆی هاوڕێ ‌و دۆست، كە هاتی بۆ سەردانم، ئەرك بكێشە نە ئینتەرنێتەكەت بێنە، لای دەرگاش تكایە مۆبایلەكەت بخەرە گیرفانت‌ و دەری مەهێنە چونكە تۆ هاتوی بۆ دیداری من نەك پێكەوە دانیشین ئیمۆجی‌ و فیڵینگ بگۆڕینەوە‌ و پۆپ جی بكەین... ئەگەر پێت خۆشە لە حەوشە دێمە دەرەوە‌ و هەلوكێن ‌و فڕیوەشت لەگەڵ ئەكەم... تەنیا مۆبایلەكەت دەرمەهێنە!!