واز لەم ئەتوارە بێنن

05/04/2021

عەزیز ڕەئووف
هەر كە نوسینێكم لە پەیج و ئەكاونتەكەم دادەبەزێنم، دەستبەجێ پەیجە سێبەرەكانی یەكێتی و پارتی وەریدەگرن و هەریەكەیان بە ئارەزووی خۆی وێنەی بۆ دروست دەكات و وا نیشاندەدا كە نوسینەكەم لەگەڵ هێزی بەرامبەر و پارت و بەرپرسی حزبی نەیاری ئەوی ترە. 
تكایە ئەم ئەتوارە ناشرینە تەرك بدەن، نوسینی من بۆ هێز و گروپ و لایەنێكی دیاریكراو نیە و ئەوەی من مەبەستمە هەردوو لایەنی سەرەكی و لایەنەكانی تریش دەگرێتەوە. نوسینی من بۆ هیچ كەستان نابێت و بە دەنگی بەرز ڕایدەگەیەنم لای من حزب و گروپ و لایەنە كوردیەكان لە كورستانی باشور هیچ جیاوازیەكیان نیە و كاتێ قسە لەسەر بەرپرسان دەكەم مەبەستم لە كۆی بەرپرسانە و كاتێكیش باس لە كوڕە لاسارەكانی حزب دەكەم، بێ جیاوازی مەبەستم هەموو پارتەكانە و ئیشی من نیە بكەومە نێو ئەو شەڕە ئیعلامیەوە كە بەشەو لەسەر یەك مێزن و لە حكومەت بەیەكەوە كێك دەخۆن و بە ڕووكەشیش شیر و تیر لەیەك دەسوون بۆ ڕازیكردنی ڕەش و ڕووتەكەی دەوروبەرتان.
 ئێوە دەتوانن عەوام هەڵخەڵەتێنن بەڵام دڵنیابن ئێمە لەو مەعدەنە نین بە تاڵە مویەكیش بێت جیاوازی لەنێوان ئێوەدا بكەین.
واز لەم ئەتوارە بێنن و چیتر نوسینی ئێمە مەبەن بەمەبەستی دژایەتی درۆزنانەی بەرامبەر.