وڵاتی ئەی رەقیب و مۆدێلەكان

05/04/2021

ڤینۆس فایەق
هیچ شتێكی ئەوێم پێ نەبوو، یەكەمجار كە لەبەردەم لێكۆڵەرە هۆڵەندیەكە بۆ یەكەم پرۆسەی "پرسیار و وەڵام" دانیشتم، زۆر بە فەخرەوە گوتم من لە كوردستانەوە هاتووم، ئەو كوردستانەی كە هەموو جەستەی بەدەست دڕندەترین دیكتاتۆرەوە هەلاهەلایە.. دەمتوانی ناوی دەیان شۆڕشگێڕ و رۆشنبیری ژن و پیاو لە مێژووی كورد بەرم بۆ ئەوەی وێنەی میللەتەكەم لە خەیاڵدانی لێكۆڵەرەوە هۆڵەندیەكەدا بكێشم. ئاخر زۆرێك لە ئێمەی كورد لە دەرەوە خەریكی كێشانی وێنەیەكی شەرەفمەندانەی میللەتی كوردین بۆ ئەوەی بە دیواری خەیاڵدانی جیهانی دەرەوەی كوردستانیدا هەڵواسین..

" لەناو فڕۆكەكەدا كابرایەكی ئینگلیز لامەوە دانیشتبوو، كە گوتم من كوردم، گوتی: واتا خەڵكی هەڵەبجەی؟ هەستم بە شانازیی كرد، هەڵەبجەی جەرگسووتاو، بەو سەخاوەتە بوەتە ناسنامەمان لەناو فڕۆكەكانیشدا لەگەڵماندایە.". هاوڕێیەكم ئەمەی بۆ گێڕامەوە.. 

كچی ژنێكی هاوڕێشم كچی بوو، بۆ ناو دەگەڕان، پێشنیاری "مینا"م بۆ كرد لەسەر ناوی مینای قازی محمد، یان "مەستوورە" لەسەر ناوی مەستوورەی ئەردەلانی.. كچەكەی نەك نەیدەزانی ئەو ناوانە كێن، بەڵكوو پێكەنینی پێهاتبوو.. ئاخر كچانێك هەن لە سۆشیالمیدیا تەنها سێلفی و مێز و خوانەكانیانە كە لە تورك و فارسەوە وەریانگرتوون دادەنێن و تەنها گوێ لەو گۆرانیانە دەگرن كە هەمووی موزیكی توركی و عەرەبیە، لە كوێ دەزانن حەپسەخانی نەقیب و خانزادی میری سۆران و عادیلەخانم و لەیلا قاسم كێن. ئەو رەسەنایەتیەی ئێمە شانازی پێوە دەكەین، كچە مۆدێلەكان خەریكی شێواندن و سڕینەوەی مۆركە رەسەنە كوردایەتیەكەین.. 

تورك و فارس نەك هەر كەلتوورەكەیان پاراستوە، بەڵكوو هەناردەی كوردستانیشیان كردوە بۆ شێواندنی هەموو ناسنامەكەی.. دیاردەی مۆدێلەكانیش بەشێكە لەو فاكتەرە دروستكراوانەی كە مەبەست لێیان شێواندنی تەواوی كەلتوور و ناسنامەمانە.. 

ئێمە كە گوێگرتنمان لە سروودی ئەی رەقیب و واوەتەن تەزووی نەتەوایەتی بە گیانماندا دەبرد، وەختێ كتێبەكانی لیوەی فێری كوردایەتی دەبووین بە دزیەوە دەستاودەسمان پێدەكردن و دەمانخوێندنەوە، كورد لە گەرمەی كوردایەتی و نیشتیمانپەروەریدا بوو، ژنان "ساك"ی بێ قۆڵ و لە سەروو ئەژنۆیانەوە لەبەركردوە، و "پێڵاوی پاژنەعانە"یان لەپێدا بوە و چەندین جۆری قژ لوولكردن و خۆ رازاندنەوەش هەبوە، بەڵام ئەوەی نەتەوەیی بوە وەكوو خۆی بە رەسەنی هەبوە و دەستكاری نەكراوە.. ژنان مامۆستا و قسەكەر و هونەرمەند خەباتگێڕیشیان تێدا بووە.. داگیركراویش بووین، خاوەنی كەلتوور و خەسلەتە كوردەواریەكەی خۆمان بووین و هەمیشە شانازیشمان پێوەی كردوە.. 

ئێ من ناڵێم كۆمەڵگا بچەقێت و نەچێتە پێشەوە و گۆڕانكاری نەبێت، دەڵێم كەلتوورەكەت بەرز راگرە و بەلاساییكردنەوە مەیشێوێنە.. ئەوەی ئیستا روودەدات پێشكەوتن نیە، سڕینەوەی ناسنامەیە.. چ میللەتێك بەئەندازەی میللەتی كردو تەرە و بێبەریە لە ئەسل و رەسەنایەتی خۆی.. كە دەڵێم با ئێمە گەردوونی بیربكەینەوە مانای ئەوە نیە خەسلەتە نەتەوەییەكان لە خۆمان داماڵین، بەڵكوو بە ئەقڵ گەردوونی بیر بكەینەوە، میللەتەكەمان بە شتە رەسەنەكانیەوە بەرینە ریزی میللەتانی دونیا، نەك بە رووكەش.. لەو كاتەی هەندێ كەس گۆڕانكاری و پێشكەوتن لە جوانكاری دەرەوەدا دەبینن، كەچی ئەوروپیەكان خەریكی پاچكارین لەسەر ناخ و هزری ئادەمیزادەكان بكەن.. 

كە ژنێك لە تیڤیەوە بڵێت: "من نامەوێ بە دینار شاباش بكرێم دەمەوێ بە دۆلار شاباش بكرێم" ئیتر رادەچڵەكم.. كە رۆژانە ئەو هەموو بەناو " كچی مۆدێل" ە دەبینم بەو هەموو نەشتەرگەری جوانكاریەوە دەردەكەون جگە لە ناشرینكردنی كۆمەڵگا هیچ ئیشێكی تریان نیە و، لە سۆشیالمیدیاكاندا نوێبەرایەتی كورد دەكەن، تووشی شۆك دەبم، دەگەڕێم بۆ ئەو مەودایەی نێوان ئەی رەقیب و بوون بە مۆدێل، و دەپرسم چی لێهات؟.. وەختێكیش نمونە باڵاكانی ئێمە مامۆستا و شاعیر و شۆڕشگێڕەكان بوون، بۆ نەوەكانی ئیستا بوەتە مۆدێلەكان. ئەو كات لەگەڵ ئەی رەقیب فاممان دەكردەوە، ئیستا لەگەڵ راپەر و مۆدێلەكان..