نامەیەكی كراوە بۆ بەرێزان (ماهیر حەسەن و ئەحمەد جۆڵا)

06/04/2021

زەبەنگ بەهادین 
هونەر یەكێكە لە پایە گرنگەكانی نەتەوەكان، هەموو نەتەوەیەك بۆ ناساندنی كلتور و پێگە و شارستانیەتی هونەر دەكاتە ئامرازێكی سەرەكی، لە ناو نیشتیمانیش هونەر كۆڵەكەی زیندو راگرتنی رۆشنبیری و پێشكەوتنە بە مەرجێك ئەو هوونەرە سوودبەخش و جێگر بێت هەر لە سینەما و دراما و شانۆ و بەرنامە تەنز ئامێزەكان.

هەر یەك لە هونەرمەندان ئەحمەد جۆلا و ماهیر حەسەن پێگەیەكی گەورە و دیاریان هەیە لە ناو هونەری كوردیدا، هەم خزمەتی هونەر هەم خزمەتی كۆمەڵگایان كردوە، جێدەستیان بۆ هەمیشە دەمێنێتەوە ئەویش بە مەرجێك بتوانن پارێزگاری لەو پێگە و رێزە بكەن كە هەمیشە كۆمەلگا هەیبووە بۆیان.

دەبێت هونەرمەند كاتێك كارێك دەكات دیدبینی تەواوی بۆ ئەو كارە هەبێت هەمیشە كاری داهاتو هەڵبژاردنی قورسترە لە كاری پێشتر لەبەر ئەوەی دەبێت سەنگینتر بێت، پێوانەی كاری هونەرمەند بە زۆری نییە زۆر جار زۆری بۆریە، دەبێت دانسقە و هەلبژاردە بێت تا تامی بینین بهێڵێتەوە لای بینەر وە سوودی خۆی بگەیەنێت لە پای ماندووبوونی. 

قسەی من لەسەر بەرنامەی پەتریپۆتە، لە بینی چەند ئەڵقەیەكی ئەم بەرنامەیە هەستم بە بێزاریەكی زۆر كرد هەستم ئەكرد لە ساڵانی نەودەكان و دوو هەزارەكانم، هەستم دەكرد بە دیار بەرنامەی بەرنامە و كەشكۆڵەوە دانیشتوم، ئەمە كێشەیە مرۆڤ لە ساڵی 2021 بێت و مێشكی بابەتی كۆنتر ببێنێ بە دووبارەی بە جۆرە دووبارەیەك كە سوودی نییە.
هەموو ئەو كێشانەی لەو بەرنامە كۆنانە باسكرا بوون ئێستا ئەمان دووبارەی دەكەنەوە بێئەوەی سوودی هەبێت، دەسەلاتی ئێستا لەو كێشانەدا نەماوە بگرە گەورەتر بووە، دزی ئێستا لە جاران قەبەتر بووە، گەندەلێ پێكانی زیاتر بوون بەم جۆرە بەرنامانە هیچ لە بابەتەكە ناگۆرێت، ئێستاش بۆ چەندەها جار سەیری ماڵەكەی مەعروف  دەكەمەوە درامایەك هەمیشە چێژ لە بینینی دەبینی، كە ئەو درامایە دەبینی لات نەنگە ئەو هەموو توانایەی ئەم دوو هونەرمەندە خەفە بكرێت لە بەرنامەیكی وەك پەتریپۆت.

پێویستە هەر یەك لە ماهیر حەسەن و ئەحمەد جۆڵا بیر لە كارێكی وەك ئەو درامایە بكەنەوە كە سوودی زۆرترە بۆ كومەلگا و بۆ هونەر، نەك دووبارەی بابەتە كۆنەكان بكەنەوە، دەبێت بزانین كۆمەڵگا ئەمرۆ پێویستی بە چ بابەتێكە ئەوە نیشان بدرێت تا گەشە بە هونەر بدرێت و رەنگدانەوەی هەبێت بۆ هەمووان، تەنها دراما لەم ماوەیە بینەری بووم سوودی هەبوو بۆ كۆمەلگا درامای چەرخ و فەلەك بوو بە ستایلێكی تەنز ئامێز كۆمەلی لایەنی كۆمەلایەتی خستبووە روو كە دەكرێت تاك پەندی لێوەربگرێت.

توانای هەردوو هونەر مەند ماهیر حەسەن و ئەحمەد جۆڵە زۆر لەوە زیاترە خۆیان سەرقال بكەن بە پەتریپۆتەوە، پێشنیار دەكەم بەو هونەر و نمایشە جوانەیان درامایەك پێشكەش بكەن كێشە كۆمەلایەتیەكانی ئەمرۆ بەرجەستە بكات و ببێتە میوانی هەموو مالێك.