لە مووچەی كابانی ماڵەوە تا سەری مەنهۆڵ (1)

07/04/2021

هۆشیار جەمال
بزوتنەوەی گۆڕان وەك حیزبێكی پۆپۆلیستی لە چركە ساتی دامەزراندنیەوە بە گوتارێكی توند و زمانێكی سادە و زۆربەی جار  بازاڕی هەڵمەتی میدیای دژی نەیارەكانی دەگرتە بەر و میدیاكەشی، لە جیاتی ئەوەی وەك میدیایەكی مۆدێرن ئیشەكانی بكات ناوی نابوو تۆپخانەكە!

ئەم بزوتنەوەیە ڕۆژگارێك بوو لە بارەی سیستەمی پەڕلەمانی و كاری پەڕلەمانییەوە گەورەترین هێرشی دەكردە سەر هەردوو حیزبی دەسەڵاتدار و پەڕلەمانی بە دیوەخان ناو دەبرد. بەتەنز و گاڵتە جاڕییەوە لە تۆپخانەكەیانەوە ئەیان وت "پەڕلەمانی كوردستان تەنها بە بابەتی لاوەكیەوە سەرقاڵە، وەك خەتەنە كردنی مێینە و یاسای قەدەغە كردنی جگەرە كێشان بووە بە كاری لە پێشینەیان".
 لە بەرامبەردا قسەی سەرزاری ئەم بزوتنەوەیە شەو و ڕۆژ چەسپاندنی عەدالەت و هەلی كار و  دامەزراندنی هاوڵاتیان، بڕینەوەی مووچە بۆ كابانی ماڵ و دابینكردنی ژیانێكی تایبەت بۆ خاوەن پێداویستی تایبەت بوو. ئەم گوتارانەی گۆڕان تەواوی هزری گەنجانی داگیركردبوو وە گەنجان ئامادەی هەموو قوربانیەك بوون لە پێناو ئەم بزووتنەوەیەدا و ئەوەی پێیان كرا كردیان.

بەڵام بزوتنەوەی گۆڕان هەر زوو دەستەكەی كەشف بوو كە خەون و ئاواتی كێكی دەسەڵاتە و گوتاریشیان چاكسازی و خزمەتكردنی خەڵكە. بەڵام ئایا وابوون؟ دەكرێت لێرەدا تەنها لەسەر چەند دروشمێكی كەمیان كاربكەین و بنووسین كە دڵۆپێكە لە دەریایەك بەڵێن كە بەگەنجە خێر لە خۆنەدیوەكانی كوردستانیان داوە.

یەكەم/ چەسپاندنی عەدالەت، ئەمە یەكێك بوو لە دروشمە هەرە زەقەكەی بزوتنەوەی گۆڕان كە هەموو قۆناغی ئۆپۆزسیۆن و تەنانەت ئەو كاتەی لە دەسەڵاتیش دەكرابوون. ئێستاش كە بە دەست و قاچ و هەموو هێزیانەوە كە (هێزێكی لاوازە) دەستیان بە حكومەتەوە گرتووە و باری لاری بۆ ڕاست دەكەنەوە بە ڕۆژ پشتیوانی دەكەن و ڕازین و بە شەو دژایەتی دەكەن، لە سەر جۆرێك لەم گوتارانە بەردەوامن كە دۆخی كوردستانیش سەلماندویەتی كە نوێنەرانی گۆڕان نەیان توانیەوە بەردێك بكەنە سەربەرد، چ جای چەسپاندنی عەدالەت.

دووەم/  هەلی كار و دامەزراندن وێردی سەرزاری ئەم بزوتنەوەیە  بوو، بەڵام كە گەیشتن بە دەسەڵات نەك هەر نەیان توانی هەلی كار  و دامەزراندن لە كەرتی گشتی و حكومی بۆ گەنجان و لاوان بڕەخسێن، بەڵكو لە دابەشكردن و وەرگرتنی پۆستەكانی حكومەت و حیزبیشدا گەندەڵی كراو بە پێی تەكەتول و باڵباڵینە و خزم خزمێنە پۆستەكان دابەشكران و كەسی شیاو لە جیاتی شوێنی شیاو، بە ڕۆژ ڕەوانەی خواروی گردەكە كراو بە شەویش لە پەیجە سێبەرەكانیانەوە تیرباران دەكران.

سێیەم/ بڕینەوەی مووچە بۆ كابانی ماڵ و ژیانی شایستە بۆ خاوەن پێداویستی تایبەت دروشمە زێڕینەكانی بزوتنەوەی گۆڕان بوون كە یەكەمیان تەنها ئاسەوارێكی كە مابێت ئێستا وەك تەنز هاوڵاتیان دەیدەنەوە لە ڕوویاندا و ناشتوانن پاكانە بكەن  بەوەی لە پەرلەمان و لە كاتی ئۆپۆزسیۆن بوون یەكێتی و پارتی ڕەتیان كردۆتەوە. ئەوسا نەكرا خۆ ئێستا وەزیری دارایی و وەزیری كاروباری كۆمەڵایەتی گۆڕانن بۆ كاری لەسەر ناكەن؟ 
ژیانی شایستەش بۆ خاوەن پێداویستی تایبەت كە دروشمێكی تریانبوو بوو بە تۆزی بەربا، چونكە بەناوی چاكسازییەوە مووچەی بەشێكیان بڕا و یەك دیناریش مووچەیان بۆ زیاد نەكرا.

لە دوای ئەمانەش لە پەڕلەمانی كوردستاندا، كە ئەوان بەڵێنیان دابوو بیكەنە شوێنی بەرگری كردن لە هاوڵاتیانی كوردستان لە دۆسیەی نەوت و غاز و مووچە و لێبڕینی موچە و ئایندەی منداڵانی كوردی تێدا بكۆڵنەوە و یاسای هەمەچەشن و تایبەت دەربكەن و جگە لە پەرلەمانتارەكانی خۆیان هەموو پەرلەمانتاری حیزبەكانی تریان بە نەخوێندەوار و پارە خۆر و ژیانی شاهانە تۆمەتبار دەكرد، بەڵام ئێستا كە لە حكومەتدان ئەگەر كەسێك باسی ئەم قسانەیان بۆ بكات پێكەنییان بە قسەكانی دێت و لە دواین داهێنانیاندا پێشنیاریان كردوە لە جیاتی قەباغی مەنهۆڵ سەری مەنهۆل بەكاربێت!


ماویەتی....