سەردەمی ماسك و بێ بەهایی!!

07/04/2021

سۆزیار بەختیار
چ سەردەمێكە تیایداین، ڕێز، خۆشەویستی جەوهەر، گرنگیپێدان، جوانی ناخ... چەنەها شتی تر فەرامۆش كراون.. ئەمەك و دڵسۆزی بوەتە مۆدێل و تەرزێكی كۆنكە زۆر بە زەحمەت ئاوڕی لێ ئەدرێتەوە.
مرۆڤەكان هێندە ڕوی جیاوازیان بۆ پەیدا بووە هەر ڕۆژێك بە ڕویەكی تر دێنە بەردەممان تەنها هۆكاریش بۆ ئەمە بەرژەوەندی خودە..!
ئەم ڕوانە وەك ماسك وان هەر ڕۆژێك یەكێكیان ئاشكرا و پیس دەبێت، بەڵام لەگەڵ هەڵاتنی رۆژێكی نوێ، مرۆڤەكانیش ماسكێكی نوێ دەپۆشن، تا تاریكیەكانی ناخیانی پێ بشارنەوە!
وا دەكات كاتێك مڕۆڤێك ئەناسی سەرەتا ماسكێك بەكاردێنێت تا بۆ ئەو بەرژەوەندیەی مەبەستیەتی بەكارتبێنێن بەڵام دواتر چی ئەبینیت هەر ئەو كەسەیە.؟

كاتێك تاك بیر لە بەرژەوندییە خودی و تایبەتەكان دەكاتەوە، چ ماددی و مەعنەوی، چاوی چ شتێكی تر دەبینێت جگە لە خۆی؟  تەنانەت هەندێ كات ئاماددەیە خۆی بكاتە بكوژ لە پێناو بەرژەوەندیەكانیدا بێ ئەوەی بیر لە هیچ شتێكی دەوروبەری بكاتەوە، بیر لە هەست و سۆز و بەرژەوندی كەسانی چواردەوری بكاتەوە..!

من ئەپرسم: مرۆڤێك ماوە كە بەرژەوەندخواز نەبێت؟
زۆر ئەستەمە لەم سەردەمی ماسكەدا، مرۆڤێگەلێكی زۆر بدۆزیتەوە بەرژەوەندی ئاراستەی نەكات، بەڵام لەگەڵ ئەوەشدا مرۆڤانێكی تایبەتمان هەن وەك دایك و باوك كە دەتوانێت بەرژەوەندی خۆیان وەلا بنێن لە پێناو دڵخۆشكردنی یاخود پڕكردنەوەی پێداویستی هەستی و ماددی ڕۆڵەكانیان، بەڵام ئەمەشیان ڕەها نیە!

مرۆڤەكانی سەدەی بیست و یەك، زۆر كەم ناخی بەرامبەریان لا مەبەستە، تەنها بە ڕوكەش یان ڕواڵەتی كەسەكان بڕیار لەسەر ئەو كەسانە،دەدەن،  هێندە نابەرپرسانە بڕیار لە كەسی بەرامبەر ئەدەن بەلایانەوە گرنگ نییە ئایا ئەم مرۆڤە هاوتا و هاوشانی ئەو نیە؟ ئایا هەردوكیان وەك یەك نەخولقاون؟
ئەفڵاتوون (پلاتۆ) دەڵێت; (دوڕوو ئەو كەسەیە كاتێك لێت ڕازی بێت جۆرە ستایشێكت ئەكات كە لە تۆدا نییە، كاتێكیش لێت ناڕازی بێت بەجۆرێك سەڕزەنشتت ئەكات كە لە تۆدا نییە )!

ئێمە ئێستا لە سەردەمی مرۆڤە ماسكدارەكان و بێبەها بونی بەهاكاندا دەژین، وەك وتراوە، ئێستا شێوە گرنگترە لە ناوەرۆك، هەستە ساختەكان بەرچاوترن لە هەستی ناخ، مرۆڤە ساختەكان بەرچاوترن لە مرۆڤە راستەقینەكان، بۆیە هەمووی ماسك دەپۆشێت، بونەتە بوكەڵەی بەرژەوەندی و لەگەڵ خۆیاندا بەرامبەرەكانیش لەسەر خەرەندی بێبەهایی لەناو دەبەن!