سێكس و كۆچ

2 مانگ پێش ئێستا

مەریوان وریا قانع
س: درەو 
هەموو كۆچ و سەرهەڵگرتنێك شێوازێكە لە ڕاكردن لە كۆمەڵگا خۆیشی، خۆڕزگاركردنە لەو سیستمە فەرهەنگیی و ئەخلاقیی و دینیی و ڕەمزییانەی لەو كۆمەڵگایەدا هەن و سەپێنراون. واتە  لە پشتی دیاردەی كۆچكردن و سەرهەڵگرتنەوە تەنها هۆكاری سیاسیی و ئابووریی ئامادەنین. تەنها هەستكردنیش بە دۆڕاندنی ئەگەرەكانی پێشكەوتنی كۆمەڵایەتیی و نەبوونی دڵنیایی پاڵنەرنین.  لە پشتی كۆچكردنەوە جۆرێك لە وەڕسبوونیی هەمەلایەنیش ئامادەیە، كە لە گشتێتی ئەو كۆمەڵگایە و لە فەرهەنگ و دین و ئەخلاقیاتی باڵادەستەوە، سەرچاوەدەگرێت. بڕێك لە كۆچبەرانی دونیای ئێمە لە هەموو ئەو شتانە بەسەریەكەوە ڕادەكەن. با لێرەدا نموونەیەك لەسەر چۆنیەتی ڕێكخستنی ژیانی سێكسی بهێنمەوە كە وادەكات، بەشێك لە گەنجان، پشتبكەنە ئەو كۆمەڵگایە و بەرەو شوێنێكی تری جیهان بڕۆن كە پێیانوایە ژیانی سێكسی لەناویدا بە شێوازێكی كراوەتر ڕێكخراوە.

بەر لە هەمووشتێك دروستكردنی ژیانێكی سێكسی گونجاو لەمڕۆكەی هەرێم و بەشێك لە ناوچەكەدا، بۆ ژمارەیەكی گەورە لە گەنجان زۆر زەحمەت و ناكردە بووە. بێكاریی و بێدەرامەتیی و بێشوێنی دۆخێكیان دروستكردوە زۆرینەی گەنجانی ئەو وڵاتە توانای دروستكردنی ژیانی هاوسەرگیریان نەبێت و تەمەنی هاوسەرگیریكردن لە پەنجا ساڵی ڕابردوودا لە ١٥ ساڵی و ٢٠ ساڵییەوە بەرزببێتەوە بۆ سەرو ٣٠ ساڵی. ژمارەیەكی زۆریش هەر نەتوانن هاوسەرگیریی بكەن و ژیانێكی پێكەوەیی دروستبكەن. لە كوردستاندا دەیان هزار گەنج هەن، كچ و كوڕ، كە تەمەنیان لەسەرو سییەكانەوەیە و توانا و ئەگەری دروستكردنی هاوسەرگیریان لەبەردەمدا نییە. تەمەنی هاوسەرگیریی و هەبوونی ژیانێكی سێكسی ڕێكخراویش، لەزۆربەی حاڵەتەكاندا، دواكەوتوە بۆ نزیكی سی ساڵ. هەموو ئەمانە بڕێكی زۆر لە بێزاریی و هەستكردن بە تەنهایی و دروستبوونی وێنەی نێگەتیڤی لەسەر خود خۆی دروستكردوە، (هەستكردن بەوەی كەس تۆی ناوێت) تا بە ئاستی ڕقبوونەوە لە خود و لە ئەوانیتر، دەگات. ئەم دۆخەش لە كاتێكدا دروستبووە كە بەشێكی گەورەی فەزای گشتیی و ژیان ناو فەرهەنگیی بەرخۆریی لە وڵاتەكەدا، لەسەر بە سێكسیكردنێكی هەمەلایەی مۆدێلە خواستراوەكانی ژیان، كاردەكات. لە پەیوەندیدا بە ژیانی سێكسییەوە وڵاتەكە گۆڕانیی گەورە و چاوەڕواننەكراوی بەخۆیەوە دیوە. 

بۆ نموونە، تا ساڵانی هەفتای سەدەی بیستەم، ئەوەی لەسەر سێكس لە دونیای ئێمەدا بوونی هەبوو، تەنها گوتارەكانی ناو گۆرانی و حیكایەتە فولكۆلریەكان و ئیرۆتیكای ناو شیعری غەزەل و هەندێك ڕووكاری شەرمنانەی ناو ئەدەبیاتی هاوچەرخی ئێمە، بووە.  لە پاڵ كۆمەڵێك تێكست لە مێژووی ئیسلامدا كە تیایاندا قسەكردن لەسەر سێكس بابەتی سەرەكیی بوو. ئینجا كۆمەڵێك نوكتە و دەستەواژەی سێكسیی ناو زمان لە بەكارهێنانی ناو ژیانی ڕۆژانەدا. سێكس لەم قۆناغەدا گرێدراوە بە ووشە و دەنگەوە و ئەم گرێدانەش ئەو ژێرخانە گوتارییەبوون كە  خەیاڵ و نمایشكردن و  باسكردنی ڕۆژانەی سێكسی، ئاراستەدەكرد.
بەڵام لەگەڵ پەیدابوونی وێنەدا، دۆخە دەگۆڕێت. لەگەڵ هاتنی تەلەفیزیۆن و هاتنی گۆڤارە پڕ وێنەكانی ئافرەتان و گۆڤارە ڕووتەكانی وەك پلەی بۆی دا ژینگەكە دەگۆڕێت. وێناكردنی سێكس لە ڕێگای زمانەوە دەگوازرێتەوە بۆ بینینی لەڕێگای وێنەوە، لە وێنەشەوە بۆ ناو فیلم و بەرجەستەبوونی لەسەر شاشە. لەگەڵ دروستبوونی سینەما و بەتایبەتیتر لەگەڵ هاتنی فیلمی ڕووت و ئیرۆتیكیشدا، دۆخێكی تەواو تازەتر لە پەیوەندیدا بە ژیانی سێكسییەوە، دروستدەبێت. ئەوەی لەگەل تەلەفییزیۆن و سینەما و گۆڤارە ڕووتەكاندا دێتەكائەوە، ساتەوەختێكی تەواو تازە و سەرەتایەكی تەواو نوێ و جیاوازە لە پەیوەندیی مرۆڤەوە بە ژیانی سێكسییەوە. سێكس دەبێت كردەیەكی ئاشكرا و توانای بینین و سەیركردنی دێتەكایەوە. زۆرینەی ئەوانەی لە ساڵانی چل و  پەنجا و شەستدا لەدایكدەبن، لە هەفتاكان و هەشتاكاندا. دەكەونە ناو ئەم دونیا تازەیەوە كە تیایدا سێكس، بە بەراورد بە نیوەی یەكەمی سەدەكە.. بە شێوەیەكی جیاواز لەناو ژیانی كۆمەڵایەتیی و تاكەكەسیدا ئامادەیە.

بەڵام لە سەرەتای ساڵانی دوو هەزارەوە دۆخێكی تەواو تازەتر دێتەكایەوە جیاواز لەوەی لە ساڵانی هەفتا و هەشتادا لە ئارادابوو. فۆرمە تازە و جیاوازەكانی تەكنۆلۆژیای پەیوەندیی و خودی كۆچكردن خۆیشی ڕۆڵێكی گرنگ لە هاتنەكایەی ئەم دۆخە تازەیەدا، دەبینن. تەلەڤیزیۆنی ساتالایت، هێڵەكانی ئینتەرنێت، پیشەسازی فیلمی ڕووت بە ڕادەیەكی بەرفراوان بڵاودەكەنەوە و دەیخەنە بەردەستی زۆرینەیەكی گەورەی ناو كۆمەڵگا. بەشێكی گرنگیی ئابوریی بەرخۆرییش دەبێتە ئابورییەكی ئیرۆتیكیی، گرنگیدان بە لەش و نمایشكردنی وەك جەستەیەكی سێكسی لەناو ڕووبەری گشتیدا، دەبن بە بەشێكی تازەی ناو ژیانی تاكەكەسیی بەشێكی بەرچاوی كۆمەڵگا. بەرنامەكانی ناو تەلەفیزیۆن و سایتەكانی ئینتەرنێت و بەشێكی بەرچاوی سۆشیال میدیا پڕدەبن لە ئاماژە و وێنە و زمانی سێكسیی. ئەم گۆڕانانە وادەكەن ئابورییەكی نوێی چێژ بێتەكایەوە و فۆرمێكی تایبەت لە نارسیزمی بەرخۆرانە دروستببێت، كە تیایدا حەز و ویست و خواستی تاكەكەسیی دەبێتە یەكەی سەرەكیی ناو ئەو ژینگە نارسیستییە. ئەوەی لەم دۆخەدا نارسیزم دروستدەكات گەشەكردنێكی هێواش و لەسەرخۆی ”كولتوری من“ نییە لە وڵاتەكەدا، بەڵكو هاتنەكایەیەكی لەپڕ و بەرفراوانی ئابوریی لەزەت و چێژە لە ئاستە جەماوەریەكەیدا. 

خاڵێك گرنگە لێرەدا هێمایەكی خێرای پێبكەم ئەوەیە لە ساڵانی هەفتاوە پەیوەندییەكی پتەو و ڕاستەوخۆ و بەرچاو لەنێوان سێكس و دەسەڵاتدا دروستدەبێت، مرۆڤ بۆئەوەی سێكسی هەبێت، بە تایبەتی لە ژینگەیەكدا كە گوتاری دینیی وردە وردە دەبێتە ژێرخانی گوتارە ئەخلاقییەكان و نەبوونیی و هەژاریی تازەش لەناویدا دروسدەبێت، دەڵێم لە ژینگەیەكی لەو بابەتەدا بۆئەوەی دەستت بە سێكس بگات پێویستە لانیكەم خاوەنی بڕێك دەسەڵات بیت. ئاخر یەكێك لە كۆڵەكە سەرەكییەكانی ئیشكردنی دەسەڵات مۆنۆپۆڵكردنی تواناكانی پیادەكردنی ئازادانەی ژیانی سێكسیی خۆیەتی.

ئەم ژینگە تازەیە لە ڕووە دینییەكەیەوە ژینگەیەكی سەلەفیی و ژینگەی باڵادەستی گوتاری ئەخلاقیی ئیسلامی سیاسییە. هەم گوتارە سەلەییەكە و هەم گوتارە ئەخلاقییەكەی ئیسلامی سیاسیی لەسەر داپۆشین لەشی ژن و لەسەر لێكدابڕانی نێر و مێ و دروستكردنی سنوور لەنێوانیاندا كاردەكات. ئەم گوتارە دینییە تەواو پێچەوانە و دژ بەو ژینگە سێكسییە نوێیە كاردەكات كە لەگەڵ گەشەی تەكنۆلۆژیای پەیوەندیكردن و لەگەڵ فۆرمی تازەی خانوبەرە و هەندەسەی نوێی شارەكانەوە، هاتۆتەكایەوە.  كە دیسانەوە دەستگەیشتن بەمانەش گرێدراون بە توانای ئابوریی و بە هەبوونی بڕێكی تایبەت لە فۆرمە جیاوازەكانی دەسەڵات لە كۆمەڵگادا. 

سەلەفیزم و ئیسلامی سیاسیی و ئەو فۆرمانەی دینداریی كە لەوانەوە هاتوون و بەناو كۆمەڵگادا بڵاوكراونەتەوە، وەك میكانیزمێك بۆ كۆنترۆڵكردنی ئەم دۆخە نوێیەی ئامادەگی سێكس لەناو ژیانی تاكەكەسیی و دەستەجەمعیدا كاردەكات. ئەم دیندارییە تازەیە لە ئاستی گوتاردا، لەسەر لە نكوڵیكردن لە دروستبوونی ئەم جیهانە نوێ و پڕ لە وێنە و نمایشی سێكسییە، كاردەكات.  لە ئاستی چارەسەریشدا پێشنیاری فرەژنی دەكات، لەكاتێكدا زۆرینەی هەرەزۆری گەنجانی وڵاتەكە توانای هەبوونی یەك هاوسەریان نییە، چ جای زیاد لە هاوسەرێك. 

هاوشان بەمانە دروستبوونی نوخبەیەكی دەوڵەمەند لە هەرێمدا كە هەم لەناو هەرێم خۆیدا ڕووبەرێكی گەورە و تایبەتیان بۆ چێژی سێكسی خۆیان دەستەبەركردوە، ئیتر لە ئوتێلی پێنج ئەستێرەیی گرانبەهاوە بیگرە، بۆ هەبوونی باخ و باخات لە دەرەوەی شارەكاندا، هتد... هەم لەڕێگای سەفەركردنەوە بۆ وڵاتانی دەرەوە و كڕینی سێكس، بۆ نموونە، لە شارە گەورەكانی وەك بەیروت و ئەستەنبوڵ و شوێنانی دیكەدا. 

ئەم ژینگە تازەیە، ژینگەیەكی پڕ لە دڵشكان و بێبەشیی، ژینگەی فۆرمی تازەی ژیانی سێكسیی و شێوازی تازەی دینداریی و  تەكنیكی نوێی كۆنترۆڵكردنن، بڕێكیتر لەو هۆكارانەن پاڵ بە بەشێك لە گەنجانەوە دەنێن بۆ كۆچ و سەرهەلگرتن.