ئەو شۆڕشە گەورەیەی ژن كە بەڕێوەیە!

5 مانگ پێش ئێستا

محمد خۆشناو
گێچەڵكردن بەشێكە لەبەكارهێنانی ستەم و تونووتیژی و دیاردەیەكی ناڕەوشتیە، گێچەڵ ئاشكراكردنی ئەخلاقی كەسەكەیە و جۆرەهایە: گێچەڵی سێكسی، گێچەڵی وەزیفی، گێچەڵی خێزانی، ئەمە ئەوەیە كە كەسەكە پێگەی خۆئ بۆ دەستدریژیكردنە سەر ئەوەكەی دیكە بەكاربهێنێت و ئەو پێگەیە لەوانە دەسەڵات یا توانایی بێت، پێگەی وەك سەرۆكی خێزان كاتێك گێچەڵ لەمیانی بەكارهێنانی توندووتیژی دژ بەئەندامانی خێزانەكەی بكات یا جاری وا هەیە كوڕەكان گێچەڵ بەرانبەر باوكیان دەكەن لەمیانی ناردنیان بۆ خانەی بەساڵاچووان، ئەمانە هەمووی بە بەكارهێنانی ئەو پێگە و دەسەڵاتە دەبێت كە كەسەكە هەیەتی…مەسەلەی ڕەوشت جیاناكریتەوە لە تەنگوچەلەمەكانی ژیان وەك: پاروەنانی ژیان، جیاوازی چینایەتی، ترس و دلەڕاوكێ لە ئایندە…هتد ئەمانە هەمووی هۆكارن بۆ گێچەڵكردن.

پەتای گێچەڵ ترسناكترە لە كۆڕۆنا و شێرپەنجە چونكە هەرەسی ڕەوشتی و ئایینیە، ئێستا گەورەترین كێشە و گیروگرفت كە ولاتەیەكگرتووەكانی ئەمەریكا و هەندێك لە وڵاتانی ئەوروپی گیرۆدەی بووە بریتیە لە گێچەڵی سێكسی، ئیستا ترس لە ئافرەت بۆتە نەخۆشیەك لەگەڵ زۆربەی پیاوانی ئەو سەردەمە و لە زۆربەی وڵاتانی جیهاندا دایە، ئیمڕۆ ئەگەر گیچەڵ بە ژنێك بكەیەت و سكاڵات لێبكات چارەنووست بەندینخانەیە.

لەكۆندا خانمانی ئەمەریكا و ئەوروپا دووچاری چەندان جۆری گێچەڵ دەبوونەوە، ئەوان لەترسی شەرم و ناوبانگی خۆیان بێدەنگیان هەڵدەبژارد، بەڵام لەناكاو ئەو ئاراستەیە بەتەواوی گۆڕا.
لەو جیهانەی ئێمەدا چەندان شۆڕشمان بینی یا خویندۆتەوە، شۆڕشە میللیەكانی وەكو شۆڕشی فەڕەنسا و بەلشەفیەكان لە ڕوسیا و ئیسلامی لە ئێران، كە ئەمانە ڕژێمەكانیان لە پاشایەتی گۆڕی بۆ كۆماری و، دەیان كۆدەتای سەربازی ئەمەریكای باشوور و هەندێك لە وڵاتانی عەرەبی ڕوویدا كە ڕژێمەكانیان گۆڕانكاریان بەسەردا هات، دوا شۆرشی میللیش بەهاری عەرەبی بوو كە ماڵویرانی و كارەساتی بەدواداهات، بەڵام شۆرشی ئەمجارە شۆڕشێكی سپیە كە ژنانی وڵاتەیەكگرتووەكان و ئەوروپا بەرپایانكردووە و تەختوتاراجی چەندان سومبولی سیاسی و هونەری و راگەیانكاری ناسرا و بەناوبانگ-یان هێناوەتە خوار، پێش هاتنی كۆرۆنا «كیفن سبییسی»ی ئەكتەری بەناوبانگی هۆلیۆد بەهۆی تێوەگلانی لە گێچەلی سێكسی پیشاندانی فیلمەكانی لە هەندێك پێگەی بەناوبانگی ئەلكترۆنی قەدەخە كران و ڕیسوایانكرد، هەر چەند ساڵیك لەمەوبەر سەرۆكی بانكی نێودوڵەتی بەهۆی گیچەڵی سێكسیەوە لەكار لابرد،  لەكاتی هەڵبژاردنەكانی پێشووی ئەمەریكا لە ویلایەتی ئەلاباما كە لە نەوەدەكانەوە بەئیمتیاز ویلایەتی كۆماریەكان بووە و وێرای هەموو هەوڵەكانی ترەمپ، پالێوراوی دیموكراتەكان بردیەوە چونكە پێشبڕكێكەرەكەی بە گێچەڵی سێكسی تاوانبار كرابوو، سێ ساڵ زیاتر لەمەوبەر « جان كڵۆد ئەرنۆ»ی فەڕەنسی تەمەن ٧٢ ساڵ كە ئەندامی لیژنەی خەڵاتی نۆبڵ بوو، لە لێژنەكە دەریانكرد لە ترسی ناوبەنگی خەڵاتەكە چونكە بە گێچەڵی سێكسی تاوانبار بوو، «ولیەم كوزی» كە باشترین كۆمیدی وڵاتەیەكگرتووەكان بوو بەهۆی ئەوەی چراگە سەدەیەك لەوەوپێش كارێكی ئابڕووبەرانەی بەتۆبزی لەگەڵ ژنێكدا كردبوو لە تەمەنی«٨٠» ساڵیدا بەكەلەپچەكراوی خرایە بەندینخانە كە لەوانەیە تا دواهەناسە ژیانی لەوێ كۆتایی پێبیت، ژنان بەشانازی و دڵنەوایی سەیری ئەو حوكمەیان كرد ، هەروەها دەیان لە كەسایەتی دیكە بەدەیان ملیۆن دۆلار سزا دران و خرانە بەندینخانە.

مەبەست لە گێچەڵ بریتیە لە قۆستنەوەی لاوازی قوربانیەكە و ئیبتیزازكردنی تا ئەوكاتەی بە ملكەچی بۆ سەرۆكەكەی كۆتایی دێت، هەروەها بریتیە لە قۆستەنەوەی ئەو بارودۆخەی كە سنوورێك بۆ توانای رەتكردنەوە و بەرهەڵیستیكردنی كچەكە یان ژنەكە دادەنێت.

ترسناكترین شت لە گێچەلیپێكردن ئەوە كە پاساو بۆ گێچەڵفرۆش بێنیەوە لەژیر پەردەی شاردنەوە و ئابڕوچوون، هەروەها ئەو شیزۆفرینیا ئایینیە ڕەگوڕیشە داكوتاوەی مێژوو گەورەترین كارەساتە كە ڕەوایی بە گێچەڵكردن و دەستدریژیكردنە سەر ئافرەتانی ئایننەكانی دیكە دەدات، لێرەوە كەسی گێچەلكار بریتیە لەو دەردراوی بیر و بەرهەمی فتوای تێكدەر و خاپوركەر و پێشێلكاری عەقلەكان و گێچەڵكردنە بە ویژدان و سۆز و هەموو پیرۆزیەك، یا پاساوی خۆرزگاركردن لەو تاوانە بە هێنانەوەی نەخۆشی دەروونی دێننەوە، ئەمانەی ئەم پاساوانە دێننەوە زۆر تاوانبارترن لەو كەسانەی گێچەڵیان كردووە.

ژن بەهەموو جوانی و ڕەسەناتیەوەی: دایك، بەخێوكار، هاوژین، كچ، خوشك لەزۆربەی كۆمەلگاكاندا بەجیاوازی كلتووری دووچاری ئیهانە و توندووتیژی و پەڕاوێزخستن دێت…ئێستا ژنان لە ئەوروپا و ئەمەریكا ئابڕووی گێچەڵكەری سێكسیان بردووە و لەسەر كار لایانداون. 
لەسەر ژن پێویستە ئەگەر دووچاری ستەم و گێچڵ بێت بڵێت«نا» چونكە ژن بوونەوەرێكی لاواز و پشتگوێخراو نیە بەڵكە زۆر بەهیز و زیاتر بەپیتە، ئافرەت بەخشش و ئارامگر و پەروەردەكارە، جێگەی ڕێز و ڕێزلێنانی بێمەرجە و، نابێت ئێمە وایلێبكەین پشتی لە دیوار و زۆڵم و توندووتیژی و سایكۆلۆجی بكات.

ئێمە ڕۆژانە ئەو ئابڕوبردنانە دەبینین كە سەدان هەزارن بەروەڕووی  گەورە سیاسەتمەداران و هونەرمەندان و بزنسمان و ڕاگەیانكار لەسەرانەسەری جیهاندا بە كوردستانیشەوە، ئەوانەی گێچەڵیان كردووە یا دەستدریژی سێكسی و لاقەیان كردووە، تەدمیری ژیانی ئەو بەستەزمانانەیان كرد و،   بەداخەوە توانیان بە زەبری سامان و نفوز و دەستڕۆیشتنیان یا بەهەڵپەرستی پارێزەرەكانیان ڕێگەی دادگاییكردن و لێپرسینەوە بگرن، تاكە چارەسەر بۆ ڕوبەڕووبونەوەی دیاردەی گێچەڵكردن و بچووكردنەوەی بریتیە لە ئاشكراكردن و ڕاشكاوی و ڕوونی، كە تێیدا مافی قوربانی بەتەواوەتی پاریزراو بێت.

ئەی ژن… جوانترین بونەوەری سەرزەمین! وەك شاژنێك بیر بكەوە لە ترس و شەرم و فەشل مەترسە، با هەنگاوەكانت بەرەو نەبەردیت ببات، سڵاو هەموو سڵاو بۆ ئەو ژنەی كە ئابڕووی ئەو نامەردە گێچەلفرۆشە دەبات و تەختی دەلەرزێنێت، سڵاو بۆ ئەوانەی  كە ناترسێن و نایشارنەوە و لێناگەڕێن كێشەكە بەداخراوی بمینیتەوە…چونكە ئەمە قەیرانێكە هەڕەشە لەژیانی ژن دەكات.