دوو گەنجە تیرۆریستە”كوردەكە”ی لەندەن

بڕوا بەرزنجی
چەند هەفتەی پێشو، دوو گەنجی كورد، كە خەڵكی هەرێمی كوردستانن لە هەرێمی سەسسێكسی باشوری ڕۆژئاوای لەندەن، بەتۆمەتی تیرۆریستبون دەستگیركران.
وەك ڕۆژنامەنوسێك هەواڵەكەم بۆ گرنگ بو، وەك كوردێك وەڵامی پرسیارەكانم لەبارەی ئەوان كێن و چۆن و بۆ هاتن بۆ ئەم وڵاتەو بۆ بون بە تیرۆریست!، لەلام گرنگتربو. 
لەگەڵ هاوڕێیەكم وەستابوم، كاتێك دوو پۆلیسی ئەنتەرپول هاتن و وتیان تۆ فڵان كەسیت وتی بەڵێ، وتیان دەمانەوێت قسەت لەگەڵ بكەین. وەك دوایی زانیمان ئەوان ماوەیەك بو چاودێری برادەرەكەی منیان كردبو، لە دورەوە هاتبون بەس ئەیانزانی ئەو لەو شوێنەدایە لەگەڵ من و  هەمو شتێكیان لەبارەی دەزانی. ئەوان بۆیە هاتبون، چونكە چەند ساڵێك پێشتر, ئەو هاوڕێیەیی من هاوكاری ئەم گەنجە كوردەی كردوە كە ژمارە مۆبایل و ئەنتەرنێتی مانگانەی هەبێت، بۆیە بەناوی خۆیەوە بۆی  دەكاتەوە، چونكە ئەو ێشتا مافی پەنابەری نەبوە. بەهەرحاڵ، كێشەیەكی گەورە نییە بۆ هاوڕێكەمان، چونكە باگراوندێكی پاك و یاسایی هەیە لای حكومەت، ئەو كارەیشی وەك ئینسانێك و كوردێك كردوە .
ئەو گەنجەی دەستگیركراوە لەگەڵ هاوڕێیەكیتری، ناوی “م، ح‌ خەڵكی هەڵەبجەی تازەیەو لێرە خۆی كردوە بە كوردی ڕۆژهەڵات‌ ئێرانی‌ و تەمەنەكەی كەم كردۆتەوە. بەڵام وەك هاوڕێكانی دەڵێن كە هاتوە ٢٠ ساڵ بوەو ئێستا ٢٥ ساڵ دەبێت.
دوایی هاتنی ئەو دوو پۆلیسەو زانینی ئەو هەواڵە، زۆر حەزمكرد بزانم بۆ دوو گەنجی كورد كە لە تاو سوكایەتی گەندەڵی هەڵدێن و لەڕێگایش تا دەگەن بێجگە لە ئەگەری بەهێزی مەرگ، سوكایەتی قاچاخچی ، لێرەیش كەیسی درۆ تا مافی پەنابەرێتی وەردەگریت، بۆ دەبێت خەون و پڕۆژەو ژیانیان، وەك كوردێكی دڵشكاو و بێ ماڵ، تیرۆریست بون بێت!؟
لەگەڵ زۆر كەس قسەمكرد كە لەنزیكەوە ناسیویانەو لە ئیش و كار لەگەڵیان بوە، لە هەوڵیشدام ئەگەر وەك ڕۆژنامەنوسێك ڕێگەپێدراوبێت لە بەندیخانە بیبینم و بچمە دادگایكردنەكەیشی كە مانگی داهاتوە. 
ئەوەی من لەو كەسانەوە دەستم كەوت، كورتەی چیرۆكەكەی ئەوەیە كە ئەم گەنجە كوڕی خانەوادەیەكی هەژاری هەڵەبجەی تازەیە، لە تەمەنی بیست ساڵی یان كەمتر دەگاتە بەریتانیاو تەمەنی خۆی مناڵ دەكاتەوەو ناوی خۆی دەگۆڕێت و خۆی دەكات بە ئێرانی، هەمو ئەمانە بۆ ئەوەی مافی پەنابەرێتی وەربگرێت. بە قسەی یەكێك لەو كوڕە كوردانەی كە هاوتەمەن و هاوشاری بون، دەڵێت پێش ئەوەی مافی پەنابەرێتیش وەربگرێت، هەر لە ژێر چاودێری پۆلیسابوە، ئەو وتی”چونكە ڕۆژێك چو بۆ لەندەن، پۆلیس تەلەفونیان بۆ كردبو پرسیاریان لێكردبو لە كوێیت؟ وتبو لە شارەكەی خۆمم ، وتبویان بۆ درۆ دەكەیت تۆ لە لەندەنیت! “.
بەڵام لەگەڵ گومانی پۆلیس و چاودێرییان لەسەری، دەستتێوەردانیان نەكردوە لە پڕۆسەی مافی پەنابەرێتییەكەیی و دواتر مافی پەنابەرێتیشی وەرگرتوە.
  ئەوان پێكەوە لە سوپەرماركێتێك كاریانكردوە، كە ڕۆژانە دەستیان بە مەشروب و بەراز كەوتووە، دواتریش كە چونەتە ماڵەوە، ئەمان چەند گەنجێك زۆر شەو دانیشتون و مەشروبیان خواردۆتەوە. ئەویش وتویەتی” پێكەكەی منیش تێبكەن و سەهۆڵی تێبكەن بۆم با ساردبێت، با نوێژی خەوتنان بكەم دەستپێدەكەم”
واتە مەشروبی خواردۆتەوە و نوێژیشی كردوە، لەبارەی بیركردنەوەی و قسەكانی لەبارەی دین و ئایدۆلۆژیایی سیاسی، هاوڕێیەكیتری وتی‌ ئەو زۆرجار لەسەر مەشروب خواردنەوە، كە مناقەشەمان بكردایە، دەیوت خوێنی هەموتان حەڵاڵەو سەربڕینتان جیهادە”. 
بەقسەی هاوڕێكانی، ئەو زۆر گوێی لە مەلاكان گرتوە، بەتایبەت “مەلا كرێكار‌، دیارە هەر لەژێر ئەو كاریگەریەش كە لە كوردستان بوە لایەنگر و دەنگدەری گۆڕان بوە. چونكە مەلا كرێكار، پشتگیری بزوتنەوەی گۆڕانی دەكرد. زۆر بڕوای بە قسەی ئەو مەلایانەیش بوە كە ئێرە وەك خاكی كوفر و كافران دەناسێنن. بۆیە هەمیشە لە ڕاڕایی و گومانابوە. ئەو پێویستی بە ئیش بوەو ئیشی حەڵاڵ و حەرامی كردوە، لە هەمان كاتدا بڕوای بەجیهاد بوە. 
بەپێی بەدواداچونەكانی من، ئەو و هاوڕێكەی تۆمەتەكەیان بەسەرا ساخ بۆتەوە كە لە هەوڵی كاری تیرۆریستیا بون، پەیوەندیان بە گروپە تیرۆریستییەكانەوە كردوە و ئەم گەنجەیان كە زیاتر من ئاگاداری چیرۆكەكەیم ویستوێتی گروپی تیرۆریستی تایبەت بە كوردەكان دروستبكات. هەمو گفتوگۆكان و پەیوەندییە ئۆنلاینیەكانی لە بەردەستی پۆلیسی ئەنتەرپوڵدایە. دیارە كەیسەكەی پەیوەندی بە گروپە تیرۆریستییەكانی عێراق ق سوریاو ئەوروپاوە هەیە، بۆیە پۆلیسی ئەنتەرپول بەدواداچونی بۆدەكات. هەروەك بڕیارە مانگی داهاتو لە شاری مانچستەر دادگایی بكرێن. لە هەوڵدام تا بچمە دادگاییەكەی، حەزدەكەم تا كۆتایی لەگەڵ چیرۆكی ئەم كوردە قوربانیەدا بڕۆم، كە بەبڕوایی من قوربانی دەستی بێ پەروەردەیی و گوتاری سیاسی و سەلەفی دینی لە كوردستان، كەلەم ساڵانەدا تەواو گەشەی كردوەو حكومەتی هەرێم و وەزارەتی ئەوقافیش مزگەوتەكانی یاوەتە دەست ئەم ڕەوتە. هەروەك بانگخوازە ئیسلامییەكانی سەر بەهێزە ئیسلامییەكان، كە بەشێكن لەم گوتارە توندڕەوە تاریك و دژە ژیان و دژە زانست و خۆراوا. ئەوان خۆیان و ماڵ و منداڵیان لەسەر عەقڵی مسوڵمانی هەژاری كورد، بە باشی دەژین و باوەشیانكردوە بە ژیاندا. ئەوان كاسپییەكەیان لەسەر قسەكردنە بەناوی خوداوە ئەگەرنا لەو دۆخە ئابورییەی كوردستاندا یەكی چەند ژن و چەندان منداڵیان هەیە، خانو سەیارەی باش، منداڵەكانیان لە زانكۆی باش، ئەمە بەچی بە مەلایی و بانگخوازی بۆ خودا، تەنها!.
ئەوەیشی دەبێتە قوربانی ئەم بەرداشی ئایدۆلۆژیا ئیسلامییە، منداڵی هەژار و بێ پەروەردەیە. هەمو ئەو كەناڵە پەروەردەییانەی هەیە، لەژێر كاریگەی ئەم گوتارە تاریكە سەلەفییەدایە، ماڵ، كۆمەڵگە، مزگەوت، میدیا و دیجیتاڵ میدیا. چیرۆكی “م،ح” چیرۆكی گەنجێكی دڵ شكاوە، لە خێزان و وڵات و حكومەت و حزب ، ئیتر دەبێتە نێچیری ئەو مەلایانەی كە خۆیان سەد و یەك كێشەی دەرونیان هەیە لەگەڵ ژیانا، ئەو لە بەینی ژیان و جیهاد بۆ خودا یاریدەكرد، تا كەوتە هەڵە گەورەكە، ئەو ئێستا كە زیندانە، هیچ ڕێكخراو و مەلا و بانگخوازێك ناتوانێت یەك دەقە ئازادی بۆ بەدەستبێنێتەوە، ئەو خودایش ئەبەد وەڵامی ناداتەوە، چونكە ئەو كاری بۆ خودا نەكرد، كاری بۆ قاچاخچییەكانی بەناوی خوداوە كرد! ئەو ئێستا لەبەردەم ڕەحمی یاسا و مافی مرۆڤی ئەوروپیدایە، ئەو ماف و یاسایەیی هەرچەند گومانی تیرۆری لەسەر بو، بەڵام ڕێگرییان نەكرد لەوەی مافی پەنابەرێتی وەرگرێت و ماڵ و موچەو خوێندن و نەخۆشخانەی خۆڕایی پێبدەن!.
بۆیە دەبێت حكومەت و یاسا و خەڵكی ڕۆشنبیر و ئازادی خواز، خۆیان لەگەڵ ئەم شەپۆلی سەلوفیەت و تاریكیەدا بەبێ لایەن نەزانن و بە ئاشكرا ڕەخنە بكرێن و سنوریان بۆ دابنرێت. تۆ بێ هیچ سنورێك ڕۆژانە دەیان فتوایی كافر بون و بێ ئەخلاق بون و فەسادبون دەبەخشیتەوە، بێ ئەوەیی بیر لە كاریگەرییە فیكریی و پەروەردەییەكانی بكەیتەوە، تا گەنجی لەم جۆرە، كە خۆیی بێ وڵات و بێ ماڵ و بێ حكومەت و بێ پەروەردەو بێ خەون، پێی وابێت دەبێت خودا و مسوڵمانان و زەوی ڕزگاربكات لەو ئافاتەی بانگخوازان باسی دەكەن. بەڵام ئەوان خۆیان زۆرینەی كۆیلەی حزب و ڕێكخراو و شێخەكانیانن و لەبەر ژن هێنان و تموحی ژیان، بەس زمانیان چالاكەو نەخۆیان و نەمنداڵیان لە واقعا بڕوایان بەجیهاد و ئەو قسانە نییە كە باسی دەكەن. تكایە هەرچی دەڵێیت بەرپرسیارێتییەو ئاگاداری دەم و بیركردنەوەتانبن.!