خوێندكاران لەنێوان بڕیاری دایباب و خواستی خۆیان لە هەڵبژاردنی كۆلێژ و پەیمانگەدا

د. ئەڤین فەتاح حاجی
قۆناغی دوازدەی ئامادەیی لە سیستمی پەروەردەی هەرێمی كوردستاندا یەكێكە لە قۆناغە هەستیارەكان، كە دۆخێكی تایبەتی دەروونی بۆ قوتابیان و كەسوكارەكانیان دێتەپێشەوە، هەر لە كاتی دەوام و هەوڵدان و كۆشش بۆ هێنانی نمرەی بەرز تا كاتی گەڕانەوەی نمرە و پڕكردنەوەی فۆرمی زانكۆ و پەیمانگەكان، لەم وتارەدا تیشكێك دەخەینە سەر رۆڵی دایباب لە هەڵبژاردنی كۆلێژ و پەیمانگە بۆ منداڵەكانیان.

‎ئەوەی تێبینیمكردووە لە ماوەی رابردوودا دایباب بەپێی پێویست رۆڵیان نەبینیوە لە هاوكاریكردنی منداڵەكانیان بۆ هەڵبژاردنی كۆلێژ و پەیمانگەكان و خواستی خوێندكاران بە كەمی لەبەرچاوگیراوە.

‎لەگەڵ ئەوەشدا رێژەیەكی بەرچاو لە خوێندكاران دیدگایەكی روونیان نییە بۆ داهاتوو و ناشزانن بۆ دەبێ لەم بەشەدا بخوێنن، تەنانەت خوێندكاری وا هەیە گەیشتووەتە قۆناغی كۆتایی زانكۆ و پەیمانگە نازانێ داهاتووی چییە. هۆكارەكەشی بەشێوەیەكی سەرەكی بۆ دایباب دەگەڕێتەوە، چونكە هاوكارێكی باش نەبوون بۆ منداڵەكانیان.

‎دایبابی وا هەیە حەزدەكات منداڵەكەی لەو بەشە بخوێنێت كە خەونی خۆی بووە، بەڵام بە هەر هۆكارێك لە هۆكارەكان نەیتوانیوە و دەیەوێ لە رێگەی منداڵەكەی ئەم حەز و ئارەزووەی دابمركێت. ئەگەریش لێی دەپرسی: بەڕێز ئەو منداڵەت باش نابێت بەو شێوە ئاراستەی بكەی»، یەكسەر وەڵام دەداتەوە: «ئەمە حەزی من بووە، بەخۆم دەزانم داهاتووی باشە».
 

بەشێوەیەكی گشتی تێگەیشتنی دایباب بۆ كار و پیشە و پسپۆڕی منداڵەكانیان جیاوازە، یانی هەموو هاوكارییەكانی دایباب بۆ ئەوەیە كە منداڵەكانیان چۆن بتوانن بە زووترین كات و بە كەمترین تێچوو ببنە خاوەنكار و هێزی كۆمەڵایەتی خۆیان، كە ئەمەش لە چەند بەشێكی زانكۆ پەیمانگەكان بەدیدەكرێت، بۆیە لە ئەنجامدا خێزان دەبنە هۆكارێك بۆ تێكدانی باڵانسی زانكۆ و پەیمانگەكان لە لایەك و لەلایەكیتریشەوە زۆربەی بەشەكانی زانكۆ و پەیمانگەكان بەبێ خوێندكار ماونەتەوە و زۆر بەشیش بە سەدان كەس داواكاریان بۆی پێشكەشكردووە، بۆیەش بەشێوەیەكی روون دەردەكەوێت كە خواستی خوێندكاران بەشێوەیەكی گشتی فەرامۆشكراوە و حەز و خواست و ویستی دایباب زاڵە بەسەر دۆخەكەدا، لە ئەنجامدا داهاتووی منداڵەكە، داهاتوویەكی نادیارە.

* راگری پەیمانگەی تەكنیكیی گەشە