بدۆرێن یان بیبەنەوە، بڕواتان بە دیموكراسی هەبێت
5 مانگ پێش ئێستا
)سۆقرات(
سامبایۆ دی سوزائۆلیفیرا، ناسراو بە (سۆقرات) ئەستێرەی دیاری هەشتاكانی هەڵبژاردەی نیشتمانی تۆپی پێی بەرازیل و سیاسەتمەداری بەرهەلستكاری حكومرانی دكتاتۆری سەردەمی كودەتای دوای ساڵی ١٩٦٤ ی بەرازیل، كە لەهەمان كاتدا پزیشكێكی مرۆڤ دۆست بوو، خاوەنی ئەو وتەیەیە كە دەڵیت: (بدۆرێن یان بیبەنەوە ، بەڵام بڕواتان بە دیموكراسی هەبێت)
ئەوە تێروانیی ئەو گەنجە رۆشنفكرە سیاسییە بوو بۆ وەرزش، سامبایۆ دی ئۆلیفرا بۆیە ناسراو بوو بە (سۆكرات) كاریگەری لە فەلسەفەكانی فەیلەسوفی یۆنانی ( سۆكرات ) وەرگربوو، هاوكات بروای بە تیزە فەلسەفییەكانی گرامشیی هەببووە، ئەو لە ناوەراستی ساڵانی حەفتاو هەشتاكانی سەدەی رابردوو، لە ناو خۆی ولاتەكەی وەرزش و فتبۆڵی كردبووە بنەما و رەمزیی پێكەوەیی بۆ خەباتی دیموكراسیی، بە جۆریك كاری پزیشكیی و سیاسەت و وەرزشی ئاوێتەكردبوو، هەمیسە دوپاتی دەكردەوە وەرزش لای من بۆ خۆ دەوڵەمەند كردن و ناوبانگ پەیداكردن نییە ، بەڵكو چالاكییەكی مرۆفایەتییە.
سۆقرات بەو جۆرە بەرهەڵستكاریی لە دژی حوكمی ئەنجوومەنی سەربازیی بەرازیل دەكرد، كە ساڵی ١٩٦٤ بە هاوكاریی ئەمریكا كودەتایان بەسەر حكومەتی هەڵبژیردراوی بەرازیل دا كرد بوو، دوای ئەو كودەتاییە كە تا ساڵانی هەشتاكان حوكمرانییان كرد، هێندەی نەمابوو بەرازیل بكەویتە ناو قەیرانی دژوار و فەوزایی سیاسیی كوشندە، بەلام بە هۆی خەباتی چەپ و مەدەنییەكان توانیان وڵات لە لێواری دارمان دەرباز بكەن، كە ئامرازێكی گرنگی ئەو خەباتە مەدەنییە وەرزش بوو، كە ئەستیرەیەكی دیاری وەك سۆقرات سەركردایەتی خەباتە وەرزشییەكەی دەكرد .
كەواتە هەوادارانی بەرزیل نیگەران مەبن، وەك سۆكرات دەڵیت ( بدۆرێن یا بیبەنەوە، برواتان بە دیموكراتی هەبێت).
بەهرۆز عەلی