دە ساڵ لەمەوبەر: هەولێری من و هەولێری حیزب

03/03/2021

مەریوان وریا قانع

مەریوان وریا قانع
ئەگەرچی من لە سلێمانی لەدایكبووم و كەس و كارم خەڵكی ناوچەی سلێمانین، بەڵام لە ساڵی ١٩٧٥ەوە  ماڵی ئێمە لە هەولێر دەژین. هەندێك لە خوشك و براكانم لەو شارەدا لەدایكبوون و لەو شارەدا گەورەبوون. من تەنها خوێندنی سەرەتایی و ناوەندیم لە سلێمانی خوێندوە، خوێندنی دواناوەندیم لە ”ئامادەیی كوردوستان“ و زانكۆشم لە هەولێر تەواوكرد. لە ئێستاشدا نەك تەنها بەشێكی زۆری كەس و كاری من لە هەولێر دەژین، بەڵكو كۆمەڵێك هاوڕێ و دۆست و ناسراوی ئازیزشم خەڵكی ئەو شارەن. بڕێكی گرنگی گەشەكردنی كەسایەتی و بیركردنەوەشم، پابەستە بە ژیانی خۆم و كەسوكار و هاوڕێكانمەوە لەو شارەدا. هەندێك لەو مامۆستایانەی كاریگەری گەورەیان لەسەر ژیانی من وەك گەنجێك بەجێهێشتوە، خەڵكی هەولێر بوون و لە ”ئامادەیی كوردستان“دا وانەیان دەگوتەوە. لەزۆر ڕووەوە كەسایەتیی من قەرزار و دروستكراوی ئەو شارەیە.

ساڵی ١٩٨٢ كە خۆپیشاندانەكانی زانكۆ لە هەولێر دەستیپێكرد، دەیان و سەدان قوتابی خەڵكی ئەو شارە بەشدارییەكی چالاك و كاریگەریان لەو خۆپیشاندانەدا كرد، بەدەیان گەنجی قوتابخانە ناوەندیی و دواناوەندییەكان لەو خۆپیشاندانەدا بەشدرابوون. ڕۆژی خۆپیشاندانەكەش، دوای ئەوەی تەقە دەستیپێكرد و هێزەكانی بەعس پەلامار و بەر گولەیان داین، من ناچار خۆم لە ماڵێك نزیكی كۆلیژی كارگێڕیدا شاردەوە. ماڵێك كە نەمدەناسین و نەیاندەناسیم. بەحوكمی ئەوەش من لەكاتی خۆپیشاندانەكەدا كەوتبوومە چاڵێكی پڕ قوڕاوەوە، سەرتاپای جلەكانم تەڕ و قوڕاوی بوو. ئەو ماڵە بە ئەمەك و چاونەترسە، دەستبەجێ دەستێك جلی وشكیان بۆهێنام و جلە قوڕاوییەكانیان شۆریم. چاو خواردنیان بۆ دانام، كەسێكیان چووە بەر دەرگاكە و چاودێری هاتوچۆی سەرباز و ئەمن و دۆخەكەی دەكرد. تا دەرنگانێك لە ماڵەكای خۆیاندا گلیاندامەوە، كاتێكیش دڵنیابوون دۆخەكە هێمانبۆتەوە، تەكسییەكیان بۆگرتم و گەڕامەوە بۆ ماڵی خۆمان.

كاتێك زانكۆشم لە هەولێر تەواوكرد، من و چوار هاوڕێی هەولێریم لە زانكۆ، پێكەوە بووین بە پێشمەرگە. پێنج گەنج بووین من لەناویاندا نیوەم سلێمانی نیوەم هەولێری بوو، ئەوانیتر هەر چواریان گەنجی پڕ ورە و پڕ ئومێدی هەولێر بوون. لە ساڵانی پێشمەرگایەتیدا لەو پێنج كەسە سیانیان شەهید و دووانمان زیندوو ماینەوە. ساڵانێك دواتر من كەوتمە دەرەوەی نیشتیمان بەڵام هاوڕێكەی تر لە نیشتمان مایەوە. لە گەڕەكی خۆشمان لە هەولێر دیسانەوە دوو هاوڕێی تری من لەهەمان ساڵدا بوون بە پێشمەرگە، یەكێیكان كە ماڵەكەیان چەند ماڵێك لەولای ماڵی ئێمەوە بوو، شەهید بوو، ئەویتریان ئێستا وەك پیاوێكی پاك خەریكی پاراستنی كوردبوونی خۆیەتی. ئەو پێش بوونی بە پێشمەرگە بەعس گرتیی و لە زینداندا ئازارێكی زۆریان دابوو. كە بەربوو ڕاستەوخۆ هاتە ڕیزەكانی پێشمەرگەوە.

ئەو هەولێرەی من دەیناسم هەولێری ئەم خەڵكە پاك و ئازا و پڕ ئومێدەیە، شاری خەڵكانێكی هێمن و ئارام و دڵسۆز، بەڵام چاونەترس و ئامادە بۆ قوربانیی. شارێك هەم ژیان تیایدا هێمن و هەم توڕەبوون تیایدا شتێك لە هێمنی تێدایە، شارێكە پڕە لە برین بەڵام تەنانەت هێمن لە تیماركردنی برینەكانیشدا. 
ئەو هەولێرەی من دەیناسم بەشێكی زیندووی مێژووی هاوچەرخ و بەشدارێكی چالاكیی ژیانی سیاسیی كۆمەڵگای ئێمەیە. 
هەولێری من شارێكە خەمەكان و ئومێدەكانی، كارەسات و بەختەوەرییەكانی، فرمێسك و پێكەنینەكانی بەشێكی دانەبڕاوبووە لە خەم و ئومێد و كارەسات و بەختەورەیی و فرمێسك و پێكەنینی ناوچەكانی تری كوردستان. 
ئەم شارە یەك كوردبوون دەناسێت، كوردبوونی شار و ناوچەكانی تری كوردستان، یەك شوناسی هەیە، شوناسی ناوچەكانی تری كوردستان و یەك خەونیشی هەیە، خەونی هەموو شوێنەكانی تری كوردستان.

ڕاستە ، لە ١٧ شوباتەوە، سلێمانی بریندارە، شار و شارۆچكەكانی دەوربەری توڕە و دڵشكاون، خوێن لە شەقام و كۆڵان و گۆڕەپانەكانی دەڤەركە دەچۆڕێت. بەڵام هەولێریش بریندار و دڵشكاوە. من گومانم لەوە نییە هەولێر بە قووڵی خەمبارە، لەدڵەوە خەمێكی گەورە لە سلێمانی و ناوچە گڕگرتوەكانی تری كوردستان دەخوات. هەولێر شارێكە هەمان ئەو خوێنە بە گیانیدا دەڕوات كە بە گیانی شارەكانی تری كوردستاندا دەڕوات، هەمان توڕەیی و دڵشكان و نائومێدی لەناودایە، كە لە شوێنەكانی تری هەمان نیشتیماندا هەیە. من ئەم شارە باش دەناسم، دەزانم ئەوانەی منیان لە خۆپیشاندانەكانی ساڵی ١٩٨٢ دا لە بەعس شارداوە، ئەو هاوڕێ و دۆستانەی من كە بوون بە پێشمەرگە و شەهیدبوون، ئەو قوتابیەی گەنجانەی چونە سەرجادە و بەردیان گرتە دڕندەیەكی وەك بەعس، ئەوانە نین كە هەینی ڕابردوو لەسەر شەقامەكان بە وێنەی سەرۆكی پارتی و ئاڵای حیزبەكەوە سەمایان دەكرد. ئەوانە نین كە گاڵتەیان بە ئازاری شار و ناوچە خەمبارەكانی تری كوردستان دەكرد، سوكایاتییان بەو خوێنە دەكرد كە لە لەشی نیشتیمانی ئێمە دەڕژێ. ئەوەی بینیمان وێنەیەكی ساختەی هەولێر بوو، كۆپییەكی تەزویری شارەكە، شارێك بە نهێنی دەگریی،. ئەوەی بینیمان نمایشێك بوو لە نمایشە خراپ و درۆیینەكانی حیزب. ئەوەی دیمان هەولێر نەبوو، بەڵكو وێنەی تەزویركراوی هەولێری ناو میدیاكانی دەسەڵات، بوو. ئەمڕۆكە هەموو شارەكانی كوردستان بەشێكی دانەبڕاون لە جوگرافییەكی بریندار، لە خەونێكی دیلكراو، لە مەیدانێكی گەورە بۆ ئازادییەكی چاوەڕوانكراو.

هاونیشتیمانیانی ئازیز، ئەوەی دیمان هەولێر نەبوو، شاری هاوڕێ شەهید و دۆستە ئیرادەگەرەكانی من نەبوو، ئەوەی دیمان سوكایەتیكردن بوو بە هەولێر. هەولێری دەرهێنەرە فاشیل و بێهونەرەكانی حیزب بوو،
هەولێری هاوڕێ شەهیدەكانی من، هەولێری ئەو ماڵەی منی لە بەعس شاردەوە، نەبوو.

٢٧-٢-٢٠١١
ئەم نووسینە ١٠ ڕۆژ دوای خۆپیشاندانەكانی ١٧ شوبات نووسراوە. لەو ڕۆژانەدا پارتی لە هەولێر كۆمەڵێك خەڵكی هێنابووە سەر شەقامەكان بۆ گاڵتەكردن بەو شار و شارۆچكانەی بەشێك لە دانیشتوانەكەیان لەسەر شەقامەكان بوون و ناڕەزاییان دەردەبڕی بەرامبەر بە دۆخی هەرێمی كوردستان و بەو سیستمە سیاسییەی دروستكرابوو.