زارۆكێن ئەڤرو نە یێن دوھی نە؟!!

سەید وەعدوللا
زارۆك وەكی ھەڤیری یە و چاوا تە دڤێت دێ وەسا دەرئێخی، ئەگەر تو خەمێ ژ پەروەردەیا وی وەربگری و بۆ ببیە رێنیشاندەر، ئەو دێ فێری كارێن باش بیت و دێ شێت پشت بەستنێ ل سەر خوە كەت، كەس نینە ژی سەربور د ژیانێ دا نەبن و بزانیت زارۆكێن باش چاوانن و زارۆكێن خراب ژی چاوانن، ھەولبدە ژ وان ئەزموونێن ژیانا خوە زارۆكێ خوە فێر بكەی، رەوشتێن باش، ئەتەكێتێن ژیانێ و پەروەردەییا باش كو ئەڤێن ھەنێ باوەریێ لدەف وی دروست دكەن و باوەری بخوە بوون، دێ وی ل ھەمی كێشان دەرباز كەت.

ئەڤێن ل سەری رەنگە ئەو جورێ پەروەردێ و چاڤلێكرنێ بیت، ئەڤێ بۆ نفشێ بەری نوكە باش، لێ نوكە چ فەرە بھێتە كرن، ئایا ھەمان پەروەردە یان جورەكێ دی؟ دڤێت ژبیرنەكەین ئەڤ قوناغا ئەم تێدا دژین كو ب قوناغا تەكنەلوجیایێ دھێتە ناسكرن، گەلەك بلەز یا دەباز دبیت ژ وێ ئەوا ئەم ژێ ھزر دكەین، بویە دڤێت پەروەردەیا تە بۆ زارۆكی ژی ھەمان لەزاتی بیت، ژبەركو تشتێن خراب یێ دھێنە د ژیانا وی دا و یێن باش ژی و یا گرنگ ئەوە ئەم بزانین دێ چاوان ئەڤ زارۆكە شێت خوە دگەل جیھانا نوی گونیجینیت بێی كو كارتێكرنێ ل سەر ئایندێ وی بكەن.