دەرمان بۆ مە یێن بووینە چەرەز و کیسکێ تووتنێ

نەجمەددین نێروەیی
ل جھێ کیسکێن توڤکا و قپەقپا وان ل سەرێ کولانێ و ل جھێ فتەفتا قورمێن جگاران و کیسکی لبەر شویتکێرا، کیسکێن دەرمانان یێن ل دیوانا خالەتان و لبەر پشتێن خالۆیاندا بووینە مێھڤان.
کیسکێ دەرمانا یێ ل دەستێن جامێریدا و د ڤرڤرینیتە بەر جامێرێن دی و دبێژیت: کا تامکەنە ڤان دەرمانان، بۆ من یێن ل ڤلان جھی ھاتین، خۆ نە یێن ھەوەژی دەرمانن، و ژ لایەکێ دی ڤە خاتینا ویژی ل دیوانا جیرانان و لبەر دەرگەھی روونشتی یە و ل جھێ کیسکێ تۆڤکا، کیسکێ دەرمانا یێ ل دەستی دا و قپە قپا وانە و ئێشا تە ھەبیت، چارە ل نک خالەتێ یە و ھەر وێ گاڤێ حەبەکێ ب داعویرە!

ئەڤ خەلکە وەھا یێن نەخۆش بووین یان یێن نەخۆش کرین، کۆ ھندی ھند یێن چووینە نەخۆشخانا و دەڤ نۆژداران، و نۆژدارێن شریکێن کومپانیانژی ب گورەی وان کومپانیان و دەرمانێن وان، ھند ئەڤ دەرمانێن گێچ یێن داینە ڤی خەلکی و بێ مفا، ئێدی خەلک ھەر بخۆ بوویە نۆژدار و کیسکێن دەرمانێن ئێک د ڤرڤریننە بەر ئێکدۆ و ل ھەڤ دگوھرن.

ئەڤ بێ رەوشەنبیرییا خەلکی د بکارئینانا دەرماناندا، ھەر ژ وەھا نەھاتی یە و چەندین پرسان د ئازرینیت و ئەڤ چەندە ژی ئەگر ھەنە و پێدڤی یە کار بۆ بھێتە کرن کۆ ئەڤ دیاردەیە نەمینن و زیانێن مەزن یێن ماددی، ساخلەمی و جڤاکی ل پشت ھەنە.
خەلک ژی د نەحەق نینن، ھەر مالەکێ کوگەھەکا دەرمانان ھەیە، ھەکە ڤێ گاڤێ ل ئاڤ تەزینکا ھەر مالەکێ بنێری، ھند تشت تێدا نینن، ھندی ھند یا تژی دەرمانێن جیاوازە، ھەر خەلکەکێ سلاڤ کرە نۆژدارەکێ، دێ تەلیسەکێ دەرمانان دەتە دەست و ب دەتە کرین.

پێدڤی یە حکومەت دیڤچوونا ڤان بابەتان بکەت و ژ ئەگەران بگەریت، ئایا نۆژدار ئەگەرن و ژ ئاستێ پێدڤی نینن کۆ چارەیەکا دروست بدەنە خەلکی، یان بۆ وانژی بازرگانی ل پێشیا ھەر تشتەکێ یە، ژ لایەک دن رەنگە ئەڤ دەرمانە بەس رەنگ و گێچ بیت و بتنێ ناڤ ھاتبنە گوھرین و کارتێکرن وەکۆ یەک بیت، یان بەلکۆ خەلک ھەر ل مالێن خۆ وەھا زانستێ وان زێدە ببیت و ھەر ل مال بووینە نۆژدار و ب دەھان پرسێن کۆ بێ بەرسڤ ماینە و دمینن!

ب ڤی سەروبەری و یا ئەز دبینم، وەکۆ چەوا ل وەختەکێ بەس مزگەڤت زێدە دکرن و ل ھەر گەرەکەکێ سێ مزگەڤت ھەبوون و بتنێ بۆ نڤێژێ رێزا ئێکێ تژی دبوو، وەھا نھاژی دێ بەس نەخۆشخانە ل ڤان باژێر و گوند و کومەلگەھان ھێنە زێدە کرن، لێ جیاوازی دگەل مزگەڤتان، رەنگە نەخۆشخانە دێ بسەرکەڤن و ئەڤ خەلکە ھەموو ھێدی ھێدی یێن ب رەنگێن جیاواز نەخۆش دبن و یان نەخۆش دکەن.

ترسا من ئەوە ل چەند سال و دەمێن داھاتی، دەما مرۆڤ ب شەڤبێری و سەرەدان قەستا مالەکێ بکەت، ل جھێ ئینانا چەرەزا و کێشانا تووتنا خالۆی، حەبێن پاراسیتامول ژ دەرمانێن سەرەکی بن پێشکێشی مرۆڤی بکەن.