نامەک بۆ ولاتی

3 مانگ پێش ئێستا

 تریفە عەلی
سل نەبە! رەنگە یا خوشبا ئەگەر مە دگەل چیا و دول و نھالان ئاخفتبا و وان بەرسڤا مە دابا. ھندەک جاران ھەست دکەم ئەڤ خوەزایە ژمە تورەیە و چدی حەزناکت ئەم بچین ناڤا زەڤیێت وێ و رەنگە ھندەک جاران نەفرەتا لمە بکەت! مە زور ماندی کریە، وەک پاسەوانەکێ ماندی پیر دبینم، دەما لسەر سیسانا د سپێدەھیا دزڤریتە مال و حەزناکەت بەرێ خو بدەتە زارۆکێت خو، لەوما دبێژمێ بەری خو وەرنەگێرە ژتە حەزدکەم.

ژ حەزکرنا تە پرە دلی من، ژ ئاڤ و دار و نھالێت خو ب پرسە، ما قەی دلێ تە ژمن مایە، نە ئەزم من باخچەیێت تە تالان کرین! نە ئەزم ئەو نەوالێت تە فروتین، پێلین وندابوونێ ئەزا دچاڤێت تەدا دبینم، تو نزانی ئەز د روحا خودا چەند جارا گازیێن ئازادیێ دقێرینم
.
ئەو تەزبیێت ددەستی مندا، ھەر جارەک كەزوانکی بادەم، دبێژم ئازادی ئازادی و لدوماھیکێ سورەتا دەما سەر ئاخا تە یا دەلال و ئاڤا تەیا زەلال، چدی دلێ تە بلا ژمن نەمینت.
گازیا ھەیڤێ بکە و ژوێ بزانە ئەو کێلیا ئەز تە ھەمبێز دکەم، چەوا دین دبم گازیا چیا بکە و بینە جڤاتێ چەوا سالا ئەز ونداکرم ب عشقا تە، گازیا تەحتیکێن گوندێ مە بکە، چەوا نیسانوک لمە کوم دبوون، دەما مە د ستری و دگوتی: ولاتێ مە کوردستانە، جھ و  مەسکەنێ مە کوردانە..

سل نەبە،  نەکەڤە  رکا، رەک دخرابن.

مانە تە گوتبوو دی كەڤرەکێ بوتە کەم دیاری، ل سەر بنڤیسە، تە دینەکر زانم تو سلی، سیما کوترێن سەربانێ مە ددەی دەما دایکا من ژبیردکر گەنمی بدەتێ. وەرە ل درەنگیا ئێڤاران ئەمێ بکەڤن سەر چوکا و مال مال گەرن بۆ دلوپەکا بارانێ، دا ھەمی باژارێت تە ئاڤ بدەن، ھەمی ستێرێن تورە بزڤرینە ئاسمانی .ئەو فریشتێن ژ ئەسمانی تورە بووین و ھاتینە ئەردی دی دگەل نەورەسا ھنێرینە ئاسمانی.
کەس نەشێت وەکی تە من بکەتە پەپیک، بزانە من چی تەماعی دئاخا تەدا نینن، من تو دڤێی زەڤیەکا کێلایی و بارانەکا رژیایی، نە ئاخەکا ماندی و وەستیایی!!