ڕێکەفتنێن دختۆران و سیندا ب خودێ !

شڤان فەتاح عەبدی
هەر کارەکێ مرۆڤ ئەنجام ددت، مەرەما سەرەکی ژێ قازانجە، لێ یێ دختوران ل پێشیێ مرۆڤایەتی و پاشی قازانج، کارێ وان گەلەک یێ پیرۆزە ژبەرکۆ ب رزگارکرنا ژیانا مرۆڤان ڤە گرێدایە ژ نەساخی و مرنێ ..

ئەڤرۆ ئەو ئەرکێ پیرۆزێ تژی مرۆڤایەتی ل دەڤ ڕێژەیەک ژ دختۆران کەتییە بەر گۆمانێ، ژبەر بلندی یا بهایێ پلێتێ و نەشتەرگەریان و ئەوان ڕێکەفتنێن دناڤبەرا کۆمپانیێن ئینان و فرۆتنا دەرمانان و دەرمانخانان و دختۆران دا ..!!
فرۆتن و مەشاندنا چەند جۆرێن دەرمانان ژ ئالیێ دختۆران ڤە بەرانبەری کۆژمەکێ پارەی و گەشتێن ئەورۆپا وەکریە، ئێدی بهایێ دەرمانان بڕێژەیەکا بەرچاڤ بلند ببت، ژبەرکۆ ئەڤە هەمی ل سەر هەژمارا نەساخێ هەژارە، چەند دەرمانێن زێدە بۆ نەساخی دئێنە نڤیسین بتنێ دا بێنە مەشاندن، بێی کو نەساخی پێدڤی پێ یان پێدڤی ب وێ ڕێژەیا زێدە یا دەرمانان و دڤێ قەیرانێ دا کارەساتە ....
زێدەباری قەیرانا دارایی و چەوانی یا پەیداکرنا پارێ دەرمانان، ئەو دەرمانە و دەرزیک هەمی دچنە دلەشێ نەساخی دا و دویرنینە ببنە ئەگەرێ نەساخیێن جوودا! زێدەباری کۆ ڕێژەیا هەری مەزن ژ دەرمانێن مە ب ڕێکێن قاچاخ دهێن و دویرنینە د بسەرڤەچووی و د باش نەبن !

ئەرێ ئەو چ یاسا و ئایین و وژدانە ڤێ قەبیل دکت؟، ما ئەوان دختۆران سیندا خوە ژبیرکریە کۆ ئەو کارێ خوە ب دلسۆزی و ب وژدان و ئیخلاس ئەنجام دن؟ مانە خودایێ مەزن کرینە دیدەڤان ل سەر وێ سیند و سۆزێ؟، ما راستە پارەی چاڤێن وان تاری کرینە؟!

ئەرێ ئەڤ زەنگینبوونا ژ نیشەکێ ڤە دەرئەنجامێ ڤان ڕێکەفتنانە؟، ئەرێ ئەو هەمی قوتابیێن دڤێن ببنە دختۆر ژبەر ئەرکێ وان یێ مرۆڤایەتی یە یان زەنگینبوونا وانە؟، ئەرێ وەزارەتا ساخلەمیێ و سەندیکایا دختۆران ئاگەهی ژڤان ڕێکەفتنان نینە یان ب مافێ وان دزانن؟ ...
پێدڤی یە ئەو دختۆر ل خوە بزڤرن و تۆبە کن و سیندا خوە ل بیرا خوە بینن و ب هەمی دلسۆزی کارێ خوە یێ تژی مرۆڤایەتی دویر ژ ڕێکەفتنێن نهێنی ئەنجام دن و بارێ نەساخی یێ گران، ل سەر سڤک کن ...