مە گاز نەبوو و ١٧ ٪‏ ژ بەغدا دھات..!

13/04/2021

ئدریس بناڤی
بیرا من ل شەرێ ناڤخویێ دناڤبەرا یەكێتێ و پارتی دا ل سالێن 1994تا 1998ێ دھێت و پشتی قوربانیا سەدان كەسان و ھاتیە راوەستیان ژی، ژبلی ب ھزارا مالوێرانیا و دەردەسەری پەیدا بووین، خەلكێ مە وەسا ھزركرن كو پشتی پێكھاتنا ھەردوو حزبان، دێ دنیا بیتە شاما شەریف و دێ ژیانا وان ژڤی دەستی چیتە دەستێ دی و دێ خوش بیت.

لێ ئەو ھزر و خەیال ھەمی بەرۆڤاژی دەركەفتن و دگوتنێ (رێكەفتنناما ستراتیژی) دناڤبەرا ھەردوو حزباندا و (ففتی ففتی) پەیدا بوو و ھەمی تشت ھاتە لێكڤەكرن، ھەر ژ پلە و پوستان ھەتا دگەھیت زونا زەر و زونا كەسك، لێ ڤەرێژا ڤێ مالوێرانیێ تا ئەڤرو ژی یا بەردەوامە، كەس نەشێت بریارێن وێ زونێ لڤێ زونێ ب سەپینیت و بەروڤاژی ژی و ھەمی تشت د بەرژەوەندا ھەردوو حزباندا ما..

یا من دڤێت بێژم، ئەڤە زێدەترە ژ سالەكێ شاندێ ھەرێمێ دچیتە بەغدا و كەس چ ژ ناڤەروكا وان دان و ستاندنان نزانیت، بتنێ خەلكی ئەو ھزردكر ئەگەر ھەرێم و بەغدا پێكھاتن، ھەمی تشت دێ وەكی بەرێ زڤریت و ئاسایی بیت، بەلێ وەك دیار ئەڤ رێكەفتنە ژی دێ وەكی یا پشتی شەرێ برا كوژیێ بیت و ھەمی تشت دێ ھێتە لێكڤەكرن و بتنێ حزب مفادارن و كەس چ ژ سەروبەرێ ڤێ پێكھانێ نزانیت.

یا جھێ پرسیارێ:
بەری گازا ھەرێمێ بفروشن 17% داھاتێ ھەرێمێ ژ بەغدا دھات، لێ ئەڤرو یێ گازێ ژی دفروشن و 460 ھزار بەرمیل ژی رادەستكرن دگەل نیڤا پارێن گومركا و خالێن سنوری و بتنێ دێ 12.67%ێ فرێكەن، یا ژوێ ژی خرابتر دێ ھەر برینا موچەی 21%ێ بیت. ئەنجامێ ڤێ نڤیسینێ ژی، ژبلێ بەرژەوەندیێن حزبی كەس یێ مفادار نابیت.