زمانڤانییا دادوەری

16/04/2021

زێمار سەعدوللا بامەرنی
زمانڤانییا دادوەری ب زمانڤانییا یاسای و زمانڤانییا دادگەھی ژی دھێتە نیاسین. زمانڤانییا دادوەری لقەکێ نوییە د زانستێ زمانڤانیێ و حقوقێدا. کو ھاریکارە بۆ چارەسەرکرنا ھندەک کێشێن تایبەت ل دادگەھان. بڤی رەنگی دشێین بێژین زمانڤانییا دادوەری زانستەکە کو ئاگەھداری ل سەر ھەمی کارکرنێن زمانی و ئاستێن وی ھەیە. مینا (دەنگسازی، دیارکرنا ناسنامێ). ھونەرێن دارشتنا دەقێن یاسای و حقوقی، واتاسازی، شروڤە و راڤەکرنا دەقی ب تایبەتی ئەو یاسایێن ل دادگەھان دھێنە یکارھینان و دەقێن یاسایینە. ب واتایەکا دی بیاڤێ کارکرنا زمانڤانییا دادوەری ژ لایەکیڤە زانستێ زمانییە و ژلایەکێ دیڤە پێدڤیاتیێن دادگەھێن یاسای و حقوقییە.

زمانڤانییا دادوەری ڤەکولینێ ل وان بابەتان دکەت، کو پەیوەندی ب یاسایێڤە ھەبیت ب رێکا ب کارئینانا بەلگێن زمانی د ڤەکولینا تاوان دا.

زمانڤانییا دادوەری د بیاڤێن جوراوجورێن دادوەریدا کاردکەت مینا: (بکارھینان و جێبەجێکرنایاسایێ، بابەت و پرسگرێکێن یاسای ، دانانا یاسایان ، دانان و دارشتنا بەلگە و یاسایێن حقوقی، چارەسەرکرنا سکالایێن حقوقی و بادەکێن دادگەھی.....).

واتە ب مفا وەرگرتن ژ بنەمایێن زمانڤانیێ و ب کارئینانا تەکنیکێن مینا (شروڤەکرنا گوتارێ، شروڤەکرنا دان و ستاندنێ) ب مفاوەرگرتنێ ژ(تیورێن گشتی یێن زمانی و کردەیێن ئاخفتنێ) نێرین و بوچونێن خوە پێشکێشی دادگەھێ دکەن، داکو دادگەھ چارەسەرکرنا بادەیەکا دیارکریدا مفای ژێ وەربگریت.