سیستەمێ پەروەردێ بەرەڤ پاشەڕۆژەکا تاری!!!

19/04/2021

جەمیل شێلازی
جارێ وەک یا رۆھن و ئاشکەرایە، ئەڤە بۆ دەمێ چەندین ساڵانە سیستەمێ پەروەردێ بەرەڤ لاوازییێ ڤە دچیت و ساڵ و بۆ ساڵێ خرابترە و گەلەک جار سویچا دکەنە ستۆیێ مامۆستایی، لێ مخابن (٨٠%)ێ دزڤریت بۆ سیستەمێ خراب و سەمیانێن قۆتابی. ئەڤا دی دبیت ژ نوی سویچێن مامۆستایی بن، لێ ھەتا نھۆ ژی گەلەک جار دێ بینین ھەمییێ د سەرێ مامۆستایی را دشکێنن، لێ دێ ڤێ ھەمیێ دەینە لایەکی و تنێ بەحسێ ڤان دوو ساڵێن سەردەمێ کورۆنایێ کەین، کا پەروەردە د چ رەوشدایە و پاشەڕۆژا وێ بەرەڤ کیڤە؟؟

پشتی کو جیھان ھەمی تۆشی ڤی ڤایرۆسێ کوژەک بووی و ھەموو سەکتەرێن ژیانێ ئێفلیج کرین، ھەلبەت ل ھەر وەلاتەکی ھندەک پێنگاڤ گرتنە بەر ژ بۆ بەرسینگرتنا وێ نەخۆشییێ، ھەلبەت مە دیت ل ھەرێما کوردستانێ ژی دبیت د ھندەک پێنگاڤان دا چاڤ دانە وەلاتێن پێشکەفتی و ھەمان پێنگاڤ گرتنە بەر، بێیی کو ئەو ئاسانکاری ھەبن بۆ گرتنەبەرا وان پێنگاڤان، ئێک ژ وان پێنگاڤان د بوارێ پەروەردێ دا ئەلکترونیکرنا سیستەمێ خواندنێ، کو ھەر ل دەستپێکێ بۆ ھەمیان خۆیابوو بریارەکا شاش بوو، لێ ھەر چاوابیت ساڵا (٢٠١٩ – ٢٠٢٠) یا خواندنێ ب دویماھی ئینا، بێیی کو پرۆگرامێن پێتڤی د ھەر قۆناغەکێ دا بھێنە تەمامکرن، کو گۆمان تێدا نینە ئەڤ چەندا ھە بوو ئەگەرێ قۆناغ ل دویڤ قۆناغێ باجا وێ چەندێ بدەت و ب تایبەت قۆناغا ئێکێ سەرەتایی کو دبیت (٢٠%)ێ ژی قۆتابی پیت نە وەرگرتن، کو ئەڤە بۆ بارەکێ گران لسەر ملێن قۆناغا دوویێ ل ساڵا (٢٠٢٠ – ٢٠٢١)ێ، چونکە قۆتابی دەربازکر بێیی تشتەکی وەربگریت.

 لێ یا خرابتر دیسان د ئەڤ ساڵەدا ھەمان شاشی ھاتەڤە دووبارەکرن، بەلکو ھێشتا خرابترژی، چونکە یێن پار ھەر چنەبیت وەرزەک ب تەمامی خواند، لێ ئەڤ ساڵە خۆ چارێکەک ژی ژ وەرزی نەھاتە خواندن، ھندەک نمرە ھاتنە دانان، کو راستی ھیچ بنەمایەکێ زانستی بۆ وان نمران نەبوویە، لێ دیسان یا ژ ھەمییێ خرابتر جارەکا قۆناغا ئێکێ سەرەتایی یە ھیچ تشتەک نەوەرگرت. چ پێنەڤیت ئەڤەژی دێ دەربازبنە قۆناغا دوویێ و تشتەکی نزانن و یێن قۆناغا دوویێ ژی دێ چنە قۆناغا سێیێ بێیی کو تشتەکی بزانین، چ پێ نەڤێت ژ وێرێ وێڤە ژی بۆ دەمێ (١٨) ساڵێن خواندنێ ئەڤ دوو بەرەبابە بوونە گرێیەک دناڤ سیستەمێ پەروەردێ دا کو ھیچ ڤەکرنەک بۆ نەبیت، ئانکو دێ دوو بەرەبابێت فاشل دبوارێ فێرکرنێدا کەڤنە دناڤ جڤاکی دا وەکو مرۆڤێن کورە، کو ئەڤە بخۆژی ھەمی دێ زڤریت بۆ بریارێن شاشێن وەزارەتا پەروەردێ ددەتن.

ئەرێ ئەڤ بریارا نھۆ وەزارەتا پەروەردێ و لیژنا روی ب رویبوونا کورۆنایێ داین، کو سیستەم ببیتە ئەلکترۆنی و ئونلاین، ما نە بریارەکا شاش و فاشلە، باشە ئەمێ دبینین ھەرێما کوردستانێ یا د چ رەوشا لاوازا کەھرەب و پێتڤیێن خواندنا ئەلکترۆنیدا دنالیت، ما قەت ھزر تێدا ناکەن قۆناغێن دەستپێکێ دێ چاوا خواندنا ئەلکترۆنی بەنە سەری، مامۆستا رۆژانە بۆ ماوێ (٨٠) خولەکان ما دگەل ڤی زارۆکی ژ بۆ فێربوونا پیت و ژماران، ئەڤجار ھەر ژ گرتنا دەستێ وان فێرکرنا وان بۆ رێکین نڤێسینێ و...ھتد، ئەرێ ئەڤ زاڕۆکێ ھە چ ژ سیستەمێ ئەلکترۆنی و ئەنترنیتێ دزانیت؟! دێ چ ژێ فێربیت؟!

ئەگەر وەزارەتا پەروەردێ لسەر ڤێ بریارا خۆ یا رژدبیت، کو خواندن ب رێێا ئەلکترۆنی و ئونلاین بھێتە خواندن، دێ بێژین بلا فاتحەکێ لسەر سیستەمێ خواندنێ بخوینن و دی ھندەک بەرەباب پەیدابن کو ھیچ تشتەکی نەزانن بەلکو وەکو کەسێن نەخویندەوار، دێ وەلاتی بەرەڤ جیھانەکا تاری بەن.