ئه‌م هه‌مى مه‌لاقین

19/04/2021

مسته‌فا عه‌بدورەحمان ئه‌ره‌دنى
په‌یڤامه‌لاق په‌یڤه‌كا عه‌ره‌بیه‌ و ب واتایا زمانحلى, خوشرینكه‌ر, په‌سندار، خۆڤین، پێڤه‌نیس ...تاد, كۆ گه‌له‌ك په‌یڤن و هه‌مى تاك و هه‌لگر و هه‌ڤواتایا په‌یڤا (مه‌لاق)ن. ئه‌ڤ په‌یڤه‌ رۆژانه‌ به‌رگوھـ وچاڤێن مه‌ دكه‌ڤیت و دژى ئێك و دوو ب كاردئینین، بێى كۆ بزانین ب شێوه‌كێ ژ شێوه‌یان ئه‌م هه‌مى مه‌لاقین! چونكه‌ هه‌ر كه‌سێ رێكلام و په‌سنا تشته‌كى بكه‌ت و زێده‌ره‌وى تێدا هه‌بیت، ئه‌و دكه‌ڤیته‌ دخاناپه‌یڤا مه‌لاقیێدا، چ ئه‌و په‌سنكرن بۆ كه‌سه‌كى یان حزبه‌كێ یان ئاینه‌كى بێى جودایى یان كاره‌كى یان رێباز و ئایدیولوژیایه‌كێ یان دام و ده‌زگایه‌كێ بیت.

بۆ نمونه‌, مرۆڤ په‌سنا حزبه‌كێ یان ئاین و رێباز و ئایدیولوژیه‌كێ بكه‌ت یان به‌حسێ كه‌سه‌كێ جڤاكى و به‌رپرسه‌كێ بكه‌ت و په‌سندانه‌كا ب دره‌و و ریكلامه‌كا زێده‌ره‌وى بۆ بكه‌ت و دراستیێدا وه‌سا نه‌بیت و ئه‌و تشت نه‌ دناڤ حزب یان ئاینێ مرۆڤیدا نه‌بیت و به‌رۆڤاژى بیت، ئه‌و كاروكریار و په‌سندان ئه‌رد و ئه‌سمانان ژێك دویربن, ئها ل وى ده‌مى مرۆڤ ژى مه‌لاقه‌, چونكه‌ مرۆڤ ژى یێ خوشرینكرن و په‌سنداریێ ب شێوه‌كێ دیتر ژبۆ راكێشانا بالا خه‌لكه‌كه‌كێ دیتر بۆ رێبازه‌كێ دكه‌ت، به‌لێ ب نمره‌كا كێمتر ژ چینا دوویێ یا مه‌لاقان كۆ عه‌یار (24)ن.

 ئه‌ڤه‌ ب شێوه‌كێ گشتى, به‌لێ ب شێوه‌كێ تایبه‌ت هنده‌ك جوره‌ كه‌س هه‌نه‌، عه‌یار(24)ن دمه‌لاقیێدا و مه‌لاقیێ بۆ خۆ وه‌كۆ كاروپیشه‌ بكاردئینن, پتر ئه‌ڤ نڤێسینه‌ وان جوره‌ كه‌سان ڤه‌دگریت, چونكه‌ برێكا په‌سندان و ئاخفتنێن قه‌په‌ و سه‌ردابرنێ و حه‌ژێكرنه‌كا ب دره‌و و زێده‌ره‌وى  بۆ كه‌سه‌كى دكه‌ت  و ئارمانج ژێ خۆ نێزیك كرنا وى كه‌سى و راكێشانا بالا وى یه‌ بۆ لایێ خۆ، ژبۆ مه‌ره‌م و بابه‌ته‌كێ تایبه‌ت, چ یێ كه‌سوكى یان ئابورى یان هه‌ر تشته‌كێ دیتر بیت و تێدا كه‌سێ مه‌لاق بزاڤێ دكه‌ت، هه‌مى كێم وكاسیێن كه‌سێ به‌رامبه‌ر ڤه‌شێریت و خرابیێن وى بگۆهریت ب باشیان، واته‌ په‌سندانه‌كا مه‌زن و نه‌یا راسته‌قینه‌یه‌ بۆ كه‌سه‌كێ ده‌ست نیشانكرى بتنێ تا مه‌ره‌ما خۆ پێ دقه‌تینیت.

ب شێوه‌كێ گشتى مه‌لاقى ئێشه‌كا ره‌وشتى دومدرێژه‌ و ئێك ژ جورێن شێرپه‌نجه‌یێ یه‌ و تێدا هه‌مى  بنه‌مایێن ره‌وشتى دهێنه‌ به‌زاندن و بن پێكرن و ژناڤبرن, چونكه‌ كه‌سێن مه‌لاق ل دویڤ به‌رژه‌وه‌ندیا خۆ دبه‌زن و بزاڤێ دكه‌ن بێى ره‌نج و زه‌حمه‌ت تشته‌كى بده‌ست خۆڤه‌ بینن، هه‌ر چه‌نده‌ ئه‌و نه ‌ژ هه‌ژى و هێژاى وى تشتى نه‌, به‌لێ د ئاماده‌نه‌ هه‌ر تشته‌كى لسه‌ر خۆ قه‌بیل بكه‌ن بتنێ بگه‌هنه‌ وێ ئارمانجێ، چونكه‌ نه‌خودان (عزه‌ نفس)ن.
چ سنور بۆ مه‌لاقیێ نینن و كه‌سێن مه‌لاق چه‌ند بهێنه‌ پاشڤه‌برن، هه‌ر وه‌كۆ چ نه‌ و پتر ل كارێ خۆ رژد دبن و دبنه‌ پێڤه‌نیس (لصقه‌) و گه‌له‌ك د شاره‌زانه‌ د هه‌لبژاردنا په‌یڤ و گوتن و په‌سندانێ دا.

ژلایه‌كێ دویڤه‌ ترسنوك نه‌ دوێره‌كن و نه‌راستگونه‌ د ئاخفتنێن خۆدا به‌رامبه‌ر هه‌ر كه‌سه‌كى, دیسان نه‌كه‌سێن زیره‌ك و سه‌ركه‌فتی خودان شیانن,  به‌رده‌وام چاڤێ وان لده‌ستێ كه‌سێن دیتره‌ و لسه‌ر حساب و شیانێن كه‌سێن دیتر خۆ دگه‌هیننه‌ مه‌ره‌ما خۆ، ئانكۆ وه‌كۆ (ماشوتان ب دارێ ڤه‌ هه‌لدچن و به‌لگێن وێ دخوت تا دچنه‌ سه‌رى), دناخێ خۆدا نه‌ د ئارامن, ژیانا وان هه‌مى شه‌پڕزه‌ی و كرێتى  و دوددلى یه‌, ژ رابوری و پێشه‌رۆژا خۆ دترسن و ب وێ رازى نابن یا وان هه‌ى, له‌وما بزاڤێ دكه‌ن مافێن كه‌سێن دیتر بخون.

كرمێ جڤاكى نه‌ و جڤاك دبیته‌ قوربانیێن وان ژبه‌ر ره‌فتارێن وان یێن كڕێت و پیس و دبنه‌ ئه‌گه‌رێ دووبه‌ره‌كیێ و جڤاكى به‌ره‌ف نه‌مانێ دبه‌ن, چونكه‌ دبیت ب مه‌لاقیێ پوسته‌كى و جهه‌كێ گرنگ ب ده‌ست خۆڤه‌ بینیت و ببیته‌ كه‌سه‌كێ وێرانكه‌ر، ژبه‌ر كۆ كه‌سێن هه‌ژى ژ گوره‌پانێ رادكه‌ن و ئه‌و ل شوینێ دروونن.