ببورە (دكتورە دیلمان) دڤێت ئێكەم جار ل سیستەمێ حكومەتێ بزڤرین

20/04/2021

مستەفا سالح بامەرنی
دكتورە دیلمان دگوتارا خوە یا بناڤێ (ئەو كچا ل یانێن شەڤان چەندین جار دەستدرێژیا سكسی ل سەر ھاتیەكرن و ئاگەھ ژ خوەنە!)، كو د (راونگە و رەخنە)دا بلاڤكری، بابەتەك ئازراند، ھەر چەندە بەرێ كێشێ ڤەگەراندە بابەتەكێ جڤاكی، بەلێ وەك پرسیار، ئایا ئەم بۆ چارەسەركرنا كێشێن ژڤی رەنگی ل جڤاكی بزڤرین، ئەرێ مە جارەكێ ھزركریە كێ دەست ل پشت ڤان یانێن شەڤان ھەیە؟ ئەرێ خودانێ یانێ لكیڤە، ھاتە دادگەھكرن و چەند سزا بۆ دەركەفت و دەستووریا كارێ وی ژێھاتە ستاندن یان ئەو جھـ ھاتە داخستن یان نە؟ بەرسڤ بكورتێ نەخێرە!!
پێنەڤێت یا دیارە دناڤ وان وەلاتێن زەنگین دا و خەما وان جڤاكێ وان نەبیت، دێ ئەڤ كارێن ھەنێ زێدە دناڤدا ھێنە دیتنێ، ژبەركو دەستھەلات دزانیت ئەگەر ڤان ئالاڤان زێدەنەكەت، دێ خەلك پرسیارا مافێن خوەكەت و دێ پسیارا دەلیڤێن كاری كەت و پسیارا جھەكی بۆ ئاكنجیبوونێ و ساخلەمیێ و پەروەردێ و ھاولاتی دێ پرسیارا وان ھەمی تشتان كەت، كو بمافێ خوە وەك ھاولاتیەك بزانیت.

ئەگەر ھەبن بەرۆڤاژیا من ھزربكەن، دێ بێژمە وان دا بیر ل سیستەمێ پەروەردێ بكەین و ڤێ پسیارێ بكەین، ئەرێ باشە ھەر ژ داینگەھێ ھەتا دووماھی قوناغا زانكویێ، چەند وانە ل سەر جڤاكەكێ رێكخستی و ساخلەم و پاقژ ھەنە، كو تێدا تاك بزانیت دێ چاوان سەرەدەریا دروست كەت و خێزانەكا سەركەفتی پێك ئینیت؟!! پێنەڤێت ئەگەر جڤاك بدویڤ ڤان جورە بابەتان كەفت، یێن جنسی و ماددێن بێھوشكەر، ھینگێ دێ سیاسەتێ ژبیركەن و دەما سیاسەت ھاتە ژبیركرن و نەبوو بابەتێ ئێكێ دجڤاكیدا، وی دەمێ دێ سیاسی ژی بكەیفا خوە مللەتی برێڤەبەن.
بەرسڤ نینە و چ سمینار ناھێنە دیتن كو چالاكڤانێن سڤیل بچن و ڤان بابەتان بۆ خەلكی شروڤە بكەن، دگەل ھندێ بەرێ خوەبدەینە سمینارێن حزبی، بەردەوام دھێنە كرنێ و كور و چالاكیێن شعری و ئەدەبی دھێنە گێران و دیبەیت ل سەر ئازادیا تاكە كەسی دناڤ جڤاكیدا و تێدا دھێتە دیاركرن كو كەسێ ماف نینە مایێ خوە د سەروبەرێ تەدا بكەت، كا چ بكەیە بەرخوە یان ھەڤژینێ دگەل كێ پێك بینی و ئەڤە ھەمی ژی رێخوشكەرن سنێلە دوی سەقایدا دەركەڤیت و ھزرێن وی بتنێ سكس و خوشییا لەشی بن و ھوسان دەما ئەڤ سنێلە تێكەلی كومەلگەھی دبیت، شیانێن ھندێ لدەف دروست نەبووینە كو ببیتە گەنجەكێ ئاڤاكەر و دوویر بین.

ئەز دێ نمونەكا زیندی بۆ تە و خاندەڤایێ بەرچاڤ كەم، ھەرە ئێك ژ زانكوییان یان ئامادەییان و پێشنیارا پرۆژەكێ ساخكرنا ھەلكەفتەكا حزبی بدێ، یان پشتەڤانی بۆ فلانە بەرپرسی، دێ رێ بۆ تەھێتە دان و د بەرامبەردا بێژێ من پرۆژەكێ زانستی یێ ھەی و ئەز رێكخراوەكم و من دڤێت قوتابی مفای ژێ وەربگرن و ل سەر ھشیارییا قوتابیانە، ئێكسەر دێ ب نەخێر بەرسڤا تە ھێتە دان و دێ بێژن (قوتابخانە نەجھێ ڤان كارایە).
ئەڤە ژبلی نوكە كابیسێ ماددێن ھوشبەر یێ گەفێ ل كومەلگەھی دكەت و حالەت یێن دھێنە گرتن زێدە دبن ھەر ژ بازرگانی و ئەڤێ دبیتە قوربانی و گەنج تژی كافییانە و سوبەھی نەدویرە كارێن خرابتر پەیدا ببن، دزی وووو ئەڤجا دكتورە، دڤێت ئەم گازندان ژ جڤاكی نەكەین، ژبەركو ھیچ ئامادەییەك بۆ بھێزكرن و رێكخستنا وی نەھاتیە كرن، نە ل سەر بنەمایێ تاكی و نە ژی خێزانێ و ئەوا تە گوتی كو ژ خێزانێ دەست پێبكەین، دڤێت ئێكەم جار ژ سیستەمێ حكومەی و ھەمی سكتەرێن وێ دەست پێبكەین.

......