ئەڤا بووى دڤیابا نەببا!

20/04/2021

زھێر كورەماركی
هینگێ مە هەمیا خەون و خەیال ب حکومرانیەکا کوردى کوردیڤە دبرن و مە هەر ئاخینک هەلدكێشان و مە دگوت: کەنگى ئەم دێ رزگار بین و بینە خودان دەستهەلات و حکومرانیی لخۆ کەین)، مەبەستا مە ژی بڤێ خوزیێ، داکو باشترین و جوانترین شێوێ حکومرانیێ ل خۆ بکەین و نیشا خەلکى جیهانێ ژى بدەین، کو ئەگەر دەلیڤە بۆمە برەخسسیت، ئەم دکارین شێوەکی هەژى یێ حکومرانیێ پەیرەو بکەین، کو پتریا خەلکێ مە ژمە یێ رازى بیت و ب حوکمرانیا یێ دلشاد و بەختەوەر بیت.

لێ مخابن ئەڤە سێ دەھكێن حوکمرانیی مە بوراندن، مە نەشیا وەکى پێدڤى و وەکى خەلکى هزردکر حکومرانیەکا باش و جوان و هەژى و لایقێ خەلکێ دلسوز و وەفادارێ کوردایەتیی بکەین.

ئەگەر ئەم بێژین مانێ ئەم ژ خەباتا چیایێ هاتینە خەباتا مەدەنى و شارستانى و مەهند زانین و خیبرە درێڤەەبرنا ئیدارەیەکا سەردەمدا نەبوو، لەوا ئەم دحکمرانیا خودا دسەرکەفتى نەبووین! ئەم دێ بێژین راستە مادەم مەدزانى ئەم هند د شارەزا و تێگەهشتى نینن و مە پسپوورو زانا نینن، ئەم کارین مە رێکەکا دى گرتیبا بەرو مە بخۆ خەبیرو زانا ژ دەولەتێن خودان سەربوور ئینابان و پلان و نەخشە بۆ برێڤەبرنا جڤاک و مللەتێ مە دانابان و ئەم فێرى ئیدارەیەکا پاقژى (نەزیھ)کرباین. داکو ئەم وەکى حکومەت و هاولاتى لبەر ئێک نەبینە رەشە و کەرب و کین دناڤبەرا مەدا پەیدا ببا.

هوسا هاولاتى هزربکەت حکومەت ژخویە و بۆ خویە و چ تشتێن دى لبەر نینن، حکومەت ژى هوسا هزر بکەت یا خزمەتەکا ژى پێشکەشى جڤاک و مللەتێ خۆ دکەت و هەمى ئارمانجا وێ خزمەتا خەلکى یە، لێ پا چەوا ئەڤ دیوارێ کونکریتى یێ دلساریێ و بێ هیڤیێ کەفتە دناڤبەرا حکومەت و خەلکیدا و خەلک باوەر ژ حکومەتێ ناکەت و بێ باوەریێ هەمى سکتەرێن ژیانێ لڤى وەلاتى یێن گرتین، خۆ حکومەت چ بکەت خەلک باوەرژێ ناکەت! بۆچى گەهشتە ڤى رادەى؟ کێ گەهاندێ؟ بۆچى سال بۆ سالێ قەیرانا بەروکێن ڤى مللەتى گرتن؟ هیچ پلان و نەخشەکێ پاک و جوان بۆ دەربازبوون ژ قەیرانا نەبوو و مە نەدیت؟!!

ئەو مللەتێن گەلەک دەردە سەرى و نەخۆشى دیتین، دەمێ دبنە خودى دەستهەلات حکمرانیەکا جوان پەیرەو دکەن، چونکە گەلەک نەخۆشى ژ حکومەتێن بەرى خۆ یێن دیتین، دڤیابا ئەو بۆ ببا دەرس و پەند و بۆخۆ سەربوور ژێ وەرگرتبان و نموونەکا جوان و هەژى یا حکمرانیێ ئاڤاکربا، ئەگەر مە دابا دلێ خۆ و مە ژدل ڤیابا ئەم دشیاین حکمرانیەکا گەلەک باشتر ژڤێ ئەڤا 30سالە ئەم دکەین و مەکرى مە باشتر کربا، داکو مە دلێن دلسۆز و وەفادارێن کوردایەتیێ هند نە ئێشاندبا و مە کوردایەتى لبەر دلێ وان رەشنەکربا و هەستێ نشتیمان پەروەرى و وەلاتپارێزیێ لدەڤ خەلکى لاواز و بێ بها نەکربا!

ئەڤ ئاریشێن جڤاکى ئەڤێن هەر رۆژ ئەم دبینین، هەمى ڤەرێژا ڤێ شاشیا برێڤەبرنێ یە دێ بینى لوێراهە ئێکى خۆ کوشت سەرا هەژاریێ، تە هندیت زەلامێ خێزانەکێ زارۆک هەڤژینا خۆ هێلا و ب چولا کەفت ژبەر هەژاریێ....هتد ئەڤە هەمى ئەرئەنجامن!

باشە کەنگى ئەم دێ لخۆ زڤرین و پێداچوونەکێ دێ حوکمرانیا خودا کەین و شاشى و خەلەتیێن خۆ دێ چارەسەرکەین و دێ سیستەمەکێ جوان و بەرکەفتى بۆ حکمرانیا خۆ دانین، دێ هەمى هاولاتى هەست  بهەبوون و ئازادى و ماف و ئەرکێن خو  تێدا بکەت بێ جوداهى.
کەنگى دێ دادیێ پەیرەو کەین و تەخا هەژار و نەدارا دێ ژڤێ دەردەسەریی رزگار کەین، دێ دلێ وان بهندەک بریارێن گرنگ و باش و کو دخزمەتا واندا بیت دەین، داکو ئەڤ  زولم و ستەما لوان دهێتەکرن لسەر رابیت و ئێدى ئەو ژى هەست ب چێژا ژیانەک ئاسوودە بکەن.