ئەوا چەندین سالە بمە نەهاتییەکرنێ خەلکێ عیراقا تەلاقدایی د شەڤەکێدا ئەنجامدا!!!

ئاشتی زیاد
خوپیشاندەرێن بەغدا کێمتر ژ 24 دەمژمێران ب سەر توپبارانا تورکیا بۆ سەر گەشتیارێن عەرەب، دەست بسەر کونسلخانەیا تورکیادا گرت و ئالایێ وان ئینا خوارێ و د نوکەدا کونسولێ تورکیا ڕەڤییە، ل چەند پارێزگەهەکێن دی ژی خوپیشاندان هاتنە ئەنجام دان. ئەنجومەنێ ئاسایشا عیراقێ پشتی کومبوونا خو چەند بریارێن گرنگ دژی تورکیا دەرکرن و کازمی گەفێن توند دکرن. ژلایێ فروکەیەکا بێ فروکەڤان ڤە بارەگایەکێ میتا تورکیێ ل سنورێ ئامێدیێ هاتە بوردومان کرن و دهێتە پێشبینیکرن ددەمێن داهاتی دا کارڤەدانێن مەزنتر و بەرفرەهتر هەبن..

جودا ژ خوپیشاندانا سەر کونسولخانەیێ و ئینانا خوارا ئالایێ تورکیا، کو ئێک ژ مەزنترین فشارانە بۆ سەر تورکیا، خەلکەکێ ئێکجار زور ل عیراقێ نەرازیبوونا خو دیارکریە ل هەمبەر هێرشێن تورکیا ب تایبەت ل تورێن کومەلایەتی و بانگەشا خوپیشاندانێن بەرفرە دکەن و داخاز ژی دکەن هێزێن تورکیا ل عیراقێ نەمینن، ژلایێ حوکمەتێ ژیڤە ل ئاستەکێ بلند و بەرفرە بەرپرسان نەرازی بوونێن خو دیارکرینە و گەفێن جددی کرینە و دویر ژی نینە ئەو گەفە ببنە راستی.

ب راستی ژی خەلکەکێ هوشیار و خودان هەلویستن و نەحەقی و زولمێ قەبیل ناکەن، دبەرامبەر دا هێزێن ئەمنی ژی چ کارڤەدانێن توند نەبوون و تێکڕا بۆ خەلکێ خو دهەڤخەمن و ب ئەرکێ خو ڕادبن، ب کورتی وەلات هەمی ب ئێک دەنگ و ئێک رەنگ دگەل لادانا هەمی جیاوازی و ناکوکیێن خو لسەر پرسەکا نیشتیمانی و ژیانا وەلاتیێن خو بوینە ئێک هێزا مەزن و پێکڤە دبێژنە تورکیا نەخێر و ل دژی وان دراوەستن...

ل هەرێمێ ژی زێدەتر ژ بیست ساڵانە تورکیا توپبارانا گوند و ناوچێن سنوری و خەڵکێ سڤیل دکەتن، تا نوکە ب سەدان کەس کوشتینە و بریندار کرینە ژ خەلکێ سڤیل و بێ گونەھـ و ب سەدان گوند هاتینە چولکرن و ب هزاران خێزان ژ موڵک و مالێ خو دیرکەفتینە. تا نووکە نە خەلکێ هەرێمێ و نەژی بەرپرسان ب دروستاهی چ هەلویست و کارڤەدان نەبووینە و نە هێزێن ئەمنی ژی رێکدایە خەلکی کو ب خوپیشاندان نەرازیبوونا خو دیاربکەن گەر هاتبیتەکرنێ ژی رێک پێ نەهاتییەدان و چەندین تومەت داینە پال وان کو ئێدی کەس جورئەتێ نەکەت خوپیشاندانێ ل دژی سوپایێ تورکیا بکەتن.
بو ماوەیێ چەندین ساڵانە خەلکێ هەرێمێ ب گیان و خوین و مالێ خو د بیتە قوربانیێ فرۆکێن تورکیا، حوکمەتا هەرێمێ ژی بێ دەنگ و بێ هەلویست و بێ کارڤەدان بوویە و ئەگەرێ ڤێ بێ دەنگی و بێ کارڤەدانیا خو ژی بو هەبوونا هێزێن پەکەکێ ڤەگەراندییە کو دئەسلدا هەبوونا شەرێ پەکەکێ ل هەرێمێ نەیا ڕەوایە بەلێ پا حوکمەتێ ژبلی ڤێ گوتنێ هیچ هەلویست و کاڕڤەدانەک نەبوویە. زارۆک و گەنج و ژن و زەڵام و پیر دبوونە قوربانی، ئەو هەر دبێ دەنگ بوون گەر ئاخفتبان ژی بتنێ دا بێژن ئەگەر پەکەکەیە و بێی هیچ پێگوھورەكێ دی هەبیتن و گەر ئێکی ڤیابا خو نەرازی بکەتن ب رێیا هێزێن ئەمنی  رێک نەددایێ.

خەلکێ عیراقێ کو ڕەنگە ئەڤە ئێکەم قوربانیدانا وان بیتن ب توبپارانا فروکێن تورکیا، ئەرد و ئەسمان ل تورکیا گەهاندینە ئێک عەرشێ وان هەژاندییە و مەزنترین فشار لسەر وان دروستکرییە ئەوا چەندین سالە ب مە نەهاتییەکرن وان دشەڤەکێدا ئەنجام دا،
باشە ل هەرێمێ ئەڤە تەمەنەک بوری دگەل ڤان توپبارانان، بوچی تا نوکە خەلکی و بەرپرسان بڤی شێوەیی کارڤەدان نەبووینە؟ بوچی ئەو دەمێن کو بەشەکێ خەلکی دڤیایی خوپیشاندانان ل دژی هێرشێن تورکیا بکەن، ڕێگری لێ دهاتەکرنێ بێ دەنگی واتە ڕازیبوون مە هێزا سوپایێ تورکیا نینە خو مە چەندین رێکێن دی هەبوون و یێن هەین کو فشارێن جددی بئێخینە سەر تورکیا بۆ راوەستاندنا هێرش و داگیرکاریێن خو نزانم کەنگی ئەم دێ فێربین ب ئێک گرتن و ئێک رێزی ب شێوەیەکێ دروست سەرەدەریێ دگەل دوست و دوژمنێن خو بکەین..