پەیامێن خوینبارین ژ دەنگێ نهێنیێ مالکى (پشکا دویێ)

جاسم محمد شرنەخى
پشتى پێنج پارچەیێن دەنگی یێن نهێنى ل دویڤهەڤ ڕۆژنامەڤان (عەلی فازل) پەخشکرین، هەر (48) چرکەیێن ئاخفتنێن دزەپێکریێن مالکى بەڵاڤبوون!
  یێن بوورین و تەمامیا وان ژى هەمیا مزگینیا کارەسات و بەڵایێن مەزن ژبۆ عیراقێ هەلگرتینە، چەندین ڕاستیێن ڤەشارتى کەفتنە ل سەر بەڕکێ، ئاخفتن ژى دوو لایەنى بوو:
لایەنێ ئێکێ: سەرکێشێن ملیشایاتێن (لیوا پێشەوایێن بەقیع-لواء أئمة البقیع) یێن ل ژێر چەترێ مەزنێ (أئمة الأخيا)ـدا کۆم دبن، هەڤپەیڤین ل گەل مالکى دکرن، گرنگرترین تەوەرێن ئاخفتنا وان ئەڤە بوون:

- د حزۆرا مالکیدا بەحسێ رۆلێ حەشدا شەعبى ژ بۆ کۆمارا ئیسلامى ل سەر دەمێ شەرێ کەنداڤیێ ئێکێ ژ ساڵا (1980-1988) هاتە کرن، وان گۆتنە مالکى: د ماوێ سێ هەیڤێن شەریدا، صەددامى دکارى سێکا ئیرانێ بستینت، لێ پشتى حەشدا شەعبیا ئیرانی پەیدابووى شیا هەمیێ ژ دەست بینت دەرێ و زێدەبارى وێ چەندێ ژى دەڤەرا (فاو) یا عیراقى ژى داگیر بکت، و هێزێن عیراقێ نەشیان ڤەگەڕینن هەتا شەر ب داویهاتى، عیراقێ ب ڕێیا گۆتۆبێژان فاو ڤەگراند!!
  هەلبەت ئەڤە شاشیەکا مێژوویە، سوپایێ عیراقێ ب شەر و بهاریکاریا ئەمریکا، فاو ژ دەستێن ئیرانیان دەرخست.
- وان دگۆت: خومەینى پشتەڤانى ل حەشدا شەعبیا ئیرانى کر، و کرە وەزارەت (وەزارەتا حەرەس سەورى) ژێ چێکر، و کار و کریار کرنە د لەپێن واندا.
- دیسان ب ئاشکەرایى ژ مالکی ڕا خوەیا کرن: ئەوان پلانەکا سەرانسەرى ژ بۆ عیراقێ هەنە، دێ شۆڕەشەکێ ل هەمى پاڕێزگەهێن وەڵاتى هەلکن.
- گۆتنە مالکى: پشتەڤانیکرنەکا وەکى یا ژبۆ خوەنیشاندانان ناکین، ئەو شۆلەکا ئاڵۆز و پارەپێدان و چەندین پێدڤیێن دن دخوازت، ئەوان تەنها نخافتن (غطاء) دڤێتن.
- دیسان ئەوان کەسان مەرەما خوە ب نخاڤتن و پەردەپۆشیێ ڕۆهنکرن: پیرۆزلێکرنا کۆمارا ئیسلامى و نەخاسمە(خامەنەئى)یە؛ چونکى وەکى ئەوان خوەیاکرین: (12-13) ژ پێرۆزلێکرنێت ناڤخویى و هەتا ژ مەرجعێن شیعەمەزهەبێن سعۆدى ل (قەتیف)ـێ هەنە، لێ وان باوەرى ب سەرکردەیێن شیعە نینن!
- لەوا ئەو داخوازا پشتەڤانیکرنا ئیرانێ یا مەعنەوى (غیتائەک) دڤێن، پاشان یا ماددى ژى.


دووەم: بەرسڤ و پەیڤا مالکى بەحس ل ڤان بابەتێن پیڤەلەز هاتنە کرن:
- مالکى خوەیادکت: شیعە د مەترسیێدانن.
- بەعسیخواز شیاینە بگەهن جهێن ترسناک ل عیراقێ، گەهشتنە هەستیپشتا دەولەتێ.
- بەعسیان پارتێن سیاسى پێکئانینە، ژ وان (تەقددوما) حەلبۆسى، گۆتى: ئێکێ کەسەکێ دویتر ئەڤ (تەقەددومە) چێکربوو، لێ پاشان مر، حەلبۆسى جهێ وى گرت، و دبێژت ئەم بەعسینە و دێ شیعەیان هەلوەشینن.
- دبێژت: من گۆتە سەرۆک وەزیران (مصطفى الکاظمي)، گونەهە (حەرامە) ژ تەرا؛ حەلبۆسى چیە هەتا سەرکردەیا و پارێزگاڕێن پاڕێزگەهان بگوهۆڕتن.
- مالکى (کازمى) تۆمەتبار دکت: ئەو چاڤێ خوە ل (حەلبۆسى) دنەقینت، پێخەمەت وى بکەنە سەرۆک وەزیر.
- مەندەهۆشیا خوە ژ بێ دەنگیا لێڤەگەڕێن شیعەیان (مەراجعان) خوەیاکر و گۆت: هەر وەکى تشتەک نە قەومى، هەچکۆ نزانن دێ مێزە ل وان و ل شیعەتیێ هێتە وەرگێڕان.
- مالکى لایەنێن سیاسى تۆمەتبار دکت: هەمى ب پارەى یێت هاتینە کڕین، هەتا (مەرجع) ژى هاتینە کڕین، بکڕێن وان ژى ب دفنبلدیڤە دبێژن: مە ئەو ب پارەی یێت کڕن.
- حەلبۆسى کونڤەکرن (اختراق) ل ڕێزێن هەڤالێن مالکى و (چارچۆڤێ هەماهەنگیێ – الإطار التنسیقي) کریە؛ دبێژت: من گۆتە هندەک هەڤالان چ تشتێ ئەم د ئاخڤین؛ فلان و فلان دگەهیننە حەلبۆسى، نۆکەرێن وینە!
- مالکێ ل داویێ ئاخفتنەکا ئەردهەژین گۆت: شیعە بێ بوها و ڕەزیلن!
پشتى ئەڤان گۆتنێن ژ هەمى بۆیەران پتر کارڤەدان ب دویڤخەڤە ئانین؛ دوو پرسیارێن زۆر گرنگ خوە فەرز دکن:
ئێکەم: گەلۆ ڕەوشا سیاسى ب دیتنا مالکى دى بەرەڤ کیڤە چتن؟
ـ دووەم چ دسەرێ مالکیدا دگەرت، د ئایندەیێ نیزیک و دویردا ئەو چ ژبۆ عیراقیان بەرهەڤ دکن؟
هەلبەت بەرسڤا هەردوو پرسیاران ئەو ب خوە د دەنگێن دزەپێکریدا ئاشکەرا دکت، سیمایێن پلانەکا دۆزەخى ژى بەرچاڤ دکت:
(ئەو دۆپات دکت: ڕەوش زۆر ترسناکە، عیراق دێ بەرەڤ شەر و کوشتارێڤە چتن، دبێژت من بابەتێ مەترسییان ژبۆ (موستەفا کازمى) ئاشکەرا کر، ئەوى گۆتە من دێ هێزا لەشکەرى و ناڤخویى ئینمە خوار؛ لێ بەرسڤا من ئەو بوو: من باوەرى ب لەشکەر و پۆلیسێن تە نینە، هەر ئێک بلا خوە بخوە بەڕەڤانیێ ژ خوە بکتن)، گۆرەى ڤێ گۆتنا وى شەرێ ناڤخویی و کەفتنا دەولەتێ مسۆگەرە!
- لەوا مالکى ژ هەڤالێن خوە دخوازت:  بەرهەڤیەکا دەرۆنى و کردارى و چەکدارى بکن.
- ژبلى ب کارئانینا حەشدا شەعبى ژى، مالکى دۆپاتیێ ل بەرهەڤکرنا تەڤگەڕەکا چەکدارا حەشدا عەشائیرى ژى دکتن.
- مالکى شیرەتەک ئاڕاستەى هەڤالێن خوە کر: کارێن وان بلا ب حەرەس سەوریڤە گرێداى بن، هەر تشت ب دەستێن ڤێ سازیێنە.

ل داویێ دێ بێژم کیژان سیناریۆ گەرەکە ببت ژیوار:
-  مالکى دێ عیراقێ ژ ڕەوشا دەولەتا شکەستى بەرەڤ چارەنڤێسێ دۆزەخى بتن؟
- یان ژى ئارمانجا وان دەستێن ل پشت شەرمزاریا دەنگێن دزەپێکرى ئەوە: سەرێ وى بخۆن، هۆسان دویماهیێ دێ ب رۆل و ژیانا وییا سیاسى ئینن؟
ئەز بباوەرم یا دویێ ئەم دێ ل نێزیک بینن، لێ ڕامان ئەو نینە پشتى وێ یەکى عیراق دێ ژ دەردێن خوە قورتال بتن.

ــــــــــ  لینكێ ێشكا ئێكێ ژ گوتارێ  (http://www.rwangauraxna.com/ba/detail.aspx?IDNews=6371)