ئەرێ یاسا یا لاوازە یان مرۆڤ درندەنە؟!!

سوزدار رەشید نەرموو
‎هەر چەندە ئەز لگەل هندێ نینم سزایێ سێدارەدانێ د چەندین تاوانان دا بمینیت، وەکی هندەك تاوانێن سیاسی و ئالودەبوون و بازرگانیکرنا ماددێن هوشبەر و سنێلەیێن ژیێ هەژدە سالیێ تمام نەکرین. بەلێ ئەز لگەل هندێ ژی نینم ئەو سزایە ب ئێك جاری نەمینیت، هندەك تاوان یێن هەین چ جارا مێشکێ مرۆڤی قەبیل ناکەت کو ئەو تاوان یێت هاتینە ئەنجامدان یان دێ رۆژەکێ ژ رۆژان ئەو تاوان هێنە ئەنجامدان، ژبەر هندێ ژی پێدڤی ناکەت سێدارەدان ب ئێكجاری نەمینیت، کو یاسایا سزایێن عراقی یا سالا (۱۹٦۹) د مادەیا (٤٠٦) دا راشکاوانە  ئەڤ سزایە دیارکریە، کو من نەڤێت ب ناڤەرۆکا وێ و بابەتێن یاسایی دا بچمە خوارێ، بەلێ لسەردەمێ خو مام جەلال سەروك کومارێ عیراقێ بۆ ئیمزا لسەر جێبەجێکرنا سزای نەدکر و سزا نە دهاتە جێبەجێ کرن، دهەمان دەم دا ل هەرێما کوردستانێ ژی جەنابێ سەروك مەسعود بارزانی ژی ژ سالا ۲٠٠۸ و هێرڤە ئیمزا لسەر سزایێ سێدارەدانێ نەدکر و نوکە ژی جەنابێ سەروك نێچیرڤان بارزانی ژی هەمان رێچکە گرتیەبەر، بەلێ داخوازێ ژ جەنابێ وی دکەین دەستهەلاتێن خو بکار بینیت و هندەك تاوانێن هوڤانە ئیمزا بکەت، دا ببیتە عێبرەت بۆ هندەك کەسێن دی لەورا لڤێرە دێ بەلگە ژی بو ئاخافتنا خو ئینم، کو ئەو بهانە نە یێن رێکخراوا لێبورینا نیڤدەولەتی لسەر وان بنەمایان و ماف و ئازادیان داخوازا نەمانا سزایێ سێدارەدانێ دکەت ئەو ژی لگورەی جارناما جیهانی یا مافێ مروڤی یا لسالا ۱۹٤۸ نەتەوێن ئێکگرتی کریە ژێدەرێ سەرەکی یێ مافێ مروڤی کو ئاماژێ ددەتە هندێ کو هەموو مروڤان مافێ ژیانێ یێ هەی و نابیت توشی ئوشکەنجە و سەرەدەریا نە مروڤایەتی و کێمکرنێ ژ کەرامەتا مروڤایەتی بیت، بەلێ دهەمان وەخت دا یاسایا نیڤ دەولەتی ژی ئاماژێ ددەتە هندێ کو سزایێ سێدارەدانێ بتنێ بۆ تاوانێن درندانە و کوشتنا بهەروە (قتل العمد) بهێتە جێ بەجێکرن کەواتە یاسایا نیڤ دەولەتی رێگر نینە، بەلێ رێکخراوا لێبورینا نیڤ دەولەتی دبینیت کو سزایێ سێدارەدانێ نا بیتە چارەسەر بهیچ رەنگەکی لەورا هەولا نەهێلانا وێ ددەت.
‎ئەمژی ژ لایێ خو ڤە پرسیارێ ژ رێکخراوا ناڤهاتی دکەین، ئەرێ گونەها مروڤایەتیێ چیە ددەستێ نە مروڤەکی دا کو هاتبیتە زیندانیکرن پاشان دەرکەفتبیت و هەمان تاوان ئەنجام دابن؟ بەلێ یاسایێ نەشیابیت گومانلێکری تاوانبار بکەت ژبەر نەبونا بەلگێن پێویست و ژ دادگەها لێکولینێ هاتبیتە ئازادکرن، دیسان جارەکا دی باب و کچەکا شەش سالی بکوژیت کو مێڤان و دوستێن وی بوین!
‎ژبەر هندێ ژی داخوازێ ژ سەروکێ هەرێما کوردستانێ دکەین، دەستهەلاتا خو بکار بینیت و لگورەی مادێ (٤٠٦) ئیمزایا خو لسەر جێ بەجێکرنا سزایێ سێدارەدانێ بکەت بێ دوو دلی، چنكو ئەڤ تاوانبارە ب چاکسازیا دهوکێ نە بویە مرۆڤ و نابیتە مرۆڤ ژی.