نامەک بۆ پیرەمێرەکی ل دوزەخێ!

5 مانگ پێش ئێستا

دلدار محەمەد
دووازدەی مەها تەباخێ ب رۆژا جیهانیا گەنجان هاتیە نیاسین، دڤێ رۆژێ دا، من ب مەسنجەری ئەڤ رۆژە ل هەڤالان پیرۆز دکر وە راستی دڤێت مەسنجەر نیعمەتەکا مەزنە. د نیڤ دەمژمێرێ دا من نێزیکی پێنجی نامەیا هنارتن، هندەکا وەکی من خۆ ب روتینێ (قانع) کر و نامەکا پیرۆزکرنێ هنارت. هندەک ژ وان جامێرا ژی هێشتا کەرەما بەرسڤدانێ نەکریە، لێ یا ئەز مەندەهۆش کریم، نامەیەک بوو  و گوت ببورە برا تۆیێ خەلەتی ئەز پیرەمێرم!
 کەسەکێ ژیێ وی ژ بیست و پێنجێ بوری هێشتا بێکار، زانینگەهـ خلاس کری و هێشتا چ هیڤی لدەڤ پەیدا نەبوین پیرۆزباهیا چ! ئەز پیرەمێرەکم دناڤ ئاگرێ بێ ئومێدیێ دا ما مرۆڤ پیرۆزیێ ل هەڤالەکی دکەت، کو ژیانا وی ل ناڤ دوزەخێ.من بهوستەک نینە تێدا گۆرێ خۆ ب کولم، پیرۆزیێن خۆ ڤەگەرینە، ئەز دێ ل تە بورم کو تە نامەیا خۆ بؤ ناڤ و نیشانەکێ خەلەت هنارتی!
پشتی ڤێ نامەیێ دەمەکی بێدەنگ بووم، پاشی من پرسیارکر بۆچی بێ ئومێدی؟! گوت برا ئەز بتنێ نینم باوەربکە سەحکە رەخ و دورێن خۆ دێ گەلەکا بینی بێ ئومێدیێ بسکێن سپی پێداینە ڤەهاندن، دەم یێ دبوریت و مە گەنجاتی ب چاڤ نەدیت، من دەست ژی نە داهێلان بەلێ نوکە ئەزێ بێ دەستم ژی، من ژی ئاخینکەک هەلکێشا و روندک بارینێ ژی چ رامان نەمان.