ڕویڤی نە گەھشتە تری گوتی ئەز رۆژنامەڤانم!!!

5 مانگ پێش ئێستا

مەتین عۆمەر
رۆژنامەڤانی ئێک ژ پیشەیێن گرنگ یێن خزمەتکرنێ یە و د بەرژەوەندییا جڤاکی دایە ژ بۆ گەھاندنا گازندە و کێموکاسی و ئاریشێن وەلاتییان، بۆ دەستھەلات و سازیێن وێ، لەورا ژی ھەر بڤێ مەرەمێ ھاتیە بناڤکرن دەستھەلاتا چارێ.

ئەرێ رۆژنامەڤانێن ئەڤرۆ کینە و کارێ رۆژنامەڤانی ل کێ دھێت؟
دگەل بەرفرەھبوونا سنورێن راگەھاندنێ و نوویاتیێن رۆژانە یێن کو ب رەنگەکێ گشتی ب سەر کارێ رۆژنامەڤانی و راگەھاندنێ دا دھێن، ھەر وەسا ھاتنا ڤێ پێلا مەزن و بلەز و بێ سانسور یا تەکنۆلوژیایێ و سوشیال میدیایێ، ھندەک کەسێن بێ کار و خودان واستە و بەرژەوەندی لسەر بنەمایێ مرۆڤایەتی و ھەڤالینی و ھتد...، لبن ناڤێ رۆژنامەڤانیێ کرینە (مەلا، یاسا ناس، دەرونناسێن جڤاکی، بازرگانێن ریکلامێ، نمایشکارێن جلوبەرگان )، من ژ ھەروەی ئەڤ ناسناڤێن د کڤانان دا ھاتین نە نڤیسینە، ل ڤێ دھۆکێ رۆژانە ئەم یێ ھندەک مرۆڤان دبینین ل پشت شاشێن مۆبایلان یێ رۆلێ وان کەسێن ناڤھاتی و ب دەھان ناسناڤێن دی ژی لبن ناڤ و کارێ رۆژنامەڤانیێ ل خۆ دیار دکەن، گێرانا ڤان رۆلان ژی ھەمی ژ پێخەمەت ب دەستڤە ئینانا تەماشەڤانی یان ریکلامەکێ یان ژی بەرژەوەندییەکا تایبەت بوویە، ل ڤێ دھۆکێ کەس ھەبووینە بناڤێ رۆژنامەڤانیێ رەنگ و جورێن نشتەگەریێن جوانکارییێ کرینە، ھەمی ژی بەرامبەری کرنا ریکلامەکێ ل سوشیال میدیایێ بۆ جھێ دکتورێ/ی.

ھەر د چوار چوڤێ سوشیال میدیایێ دا، د شاشا دا رۆژنامەڤانن، د سوشیال میدیایێ دا ھەمی رەنگێن مرۆڤانن، بێھنەکێ ئاموژگاریان دکەت، بێھنەکێ بابەتێ دەرونی شرۆڤە دکەت، بھنەکی سەربور و سەرھاتییان دبێژیت، بێھنەکێ ژی دبیتە پارێزەر و دا ژبیر نەکەین مخابنە ئەگەر ئەڤرۆ نەزانین کا جلوبەرگ چ مارکەنە، بڤێ رێکێ و لبن ناڤ و کارێ رۆژنامەڤانیێ یێ دبووینە رۆیڤی و خۆ ب ھەمی ئارمانجێن خۆ دگەھینن.

ئەرێ ژ راستی کارێ رۆژنامەڤانی یێ ھوسایە؟
جودا کو رۆژنامەڤانی و راگەھاندن دەستھەلاتا چارێ نە ژ پێخمەت خزمەتکرنا جڤاکی، د ئەڤرۆکە دا رۆژنامەڤانی و راگەھاندن ئێک ژ گرنگترین بیاڤێن زانستی و ھونەری نە کو ل ناڤەندێن زانستی و زانکۆیان گرنگی پێ دھێتە دان، لەورا گرنگە رۆژنامەڤان یێ ئاڤا و خودان کەسایەتیەکا بلند بیت، نابیت رۆژنامەڤان ل خۆ گۆھرینێ بکەت، نابیت رۆژنامەڤان لاوازیا یاسایێن کارێ رۆژنامەڤانی و بەرفرەھییا سوشیال میدیایێ بخو ب دەرفەت ببینیت و ھەر تشتی تێدا بکەت ژ پێخەمەت گەھشتنا ھندەک بەرژەوەندییێن کەسایەتی، کارێ رۆژنامەڤانی بتنێ ئەوە زانیارییان ب جڤاکی بگەھینیت و گازندە و ئاریشێن جڤاکی بگەھنیتە حکومەتێ، نەک ببیتە بازرگان و شیرەتکار و بەژنو بالا خۆ نیشا جڤاکی بدەت، لسەر ڤێ راستیێ ژی ئێک ژ خالێن گرنگ یێن ئەتەکێتێن کارێ رۆژنامەڤانی کو بەردەوام رۆژنامەڤانا ھشیار دکەت ئەڤەیە (نابیت رۆژنامەڤان دیاری و شرینی و بەرتیلان وەربگریت، ئەگەر خۆ ب زووری ژی پێ بھێنەدان)، لێ بمخابنیڤە ئەڤرۆ ئەم یێ ب رۆھن و ئاشکرای دبینین پشکەک ژ ڤان مرۆڤێن خۆ ب رۆژنامەڤان دبینن ب زوری و کێشمە کێشما سوشیال میدیایێ یێ داخازا شریناھی و دیاری و بەرتیلان دکەن.

ل دۆماھیێ دێ دوو داخوازان کەن ھیڤیە لبەرچاڤ بھێنە وەرگرتن...
ئێک: داخوازێ ژ سەندیکا و یاساناس و جڤاتا نوونەرێن کوردستانێ دکەم، بلەز کار بکەن ژ بۆ راستڤەکرن و دەرکرنا ھندەک یاساییێن کارێ رۆژنامەڤانی و دەرکرنا یاسایەکا تایبەت بۆ سوشیال میدیایێ، ھەر وەسا رۆژنامەڤانان سنووردار بکەت د بابەتێن ئەنجامدانا ریکلاما و جونکاریا و خۆ دیارکرنێ دا.

دوو: داخواز ژ وان کەسان ژی دکەم، کەرامەتا کار و ناڤێ رۆژنامەڤانییێ ب پارێزن و دیسان ڤێ بەرفرەھییا سوشیال میدیایێ یا بێ سانسور نەکەنە دەرفەتەک بۆ کرێتکرنا دەستھەلا و رۆل و پێگەھێ بلند یێ رۆژنامەڤانیێ، ئەرێ ھوین د زانن ب سەدان سالان بەری ئازادییا ئەڤرۆ ل سالا 1898 د رەوشێن دژوار و گەلەک ب مەترسی دا ل وەلاتەکێ ب ھزاران کیلومەترا ژ ڤی وەلاتی دویر کو وەلاتێ مسرێ یە، رەوشەنبیرەکێ وەکی ماموستایێ مەزن ( مقداد میدحد بەدرخان ) کو دامەزرێنەرێ ئێکەم رۆژنامەیە ب ناڤێ  کوردستان و سەد ھزار جار ژ ھەوە رەوشەنبیرتر و زاناتر بوو، ئەو ژی دشیا بەرگێ رۆژنامێ تا دوماھییا وێ تژی ریکلام بکەت و خۆ پێ ناڤدار بکەت؟
ھزر بکەن وی بۆچی نەکر؟

مانە ئەگەر ھەر ئەو بووینە دا کو خزمەتا جڤاکێ کوردی و دوزا رەوا یا مللەتێ کورد د ھەمی بیاڤێن رەوشەنبیری و  سیاسی و ئابووری و ھونەری و نەتەوەی دا بکەت، لەورا ژی دێ دوبارە بێژم ھیڤیێ ژ ھەوە دکەین خۆ زانا بکەن رێزێ ل کەرامەتا ناڤ و کارێ راگەھاندن و رۆژنامەڤانیێ و یا خۆ ژی بگرن، ڤی ناڤێ جوان و پیرۆز ھەر ب وێ جوانی و پیرۆزییا سەردەمێ بەدرخانییان بێھلن و ب جوانی بێخنە د خزمەتا جڤاکی دا، داکو جڤاک ھەوە جوان ببینیت و جوان پێناسە بکەت.