پەیامێن (صەدر)ی د بیست و چار دەمژمێرادا

ئەرشەد حاجی
مقەتدا الصدر هەرچەندە زەلامەکە دهێتە نیاسین ب تەمومژاویا خوە و هەردەم ستراتیجیەکا نەدیار یا هەی، دیسان کارێن ئەو ئەنجامددەت نەدچاڤەرێکرینە و حەتا چاڤدێرێن سیاسی و رکابەرێن خوەژی ب رەفتارێن خوە د حەیرینیت و هەردەم وان پێنگاڤا دهاڤێژیت، یێن دهزرا کەسێ دا نەبن. لەوما کەس نەشێت کەسایەتیا وی پێناسەبکەت و ئارمانجێن وی شروڤەکەت، لدەف هندەکا دهێتە نیاسین ب کەسەکێ خوە ل هەلویستێن خوە نەکەت خودان و هندەک ب کەسەک ڕاستگوو نیشتمان پەروەر دزانن و هندەکژی ب بەرژەوندخاز ل قەلەمددەن، کو هەر جهێ بەرژەوەندا وی و تەیارێ وی لێ پەیدابیت لوێرێ و خودان هەلویستە.

لێ دویر ژ ئەڤێ چەندێ هەمیێ، د بیست و چار دەمژمێرێن بوریدا شیا سیاسەتێ بکەت و بەرگیریێ ژخوە و خێزانا خوە و بەرژەوەندێن خوە بکەت. دەمێ لدەستپێکێ و دوهی دەست ژ سیاسەتێ بەردان راگەهاندی، خەلکێ عێراقێ و جیهان هەمی توشی شوکبوونێ کر و هندەکا وەسا هزرکر کو کەسەکە نەشیا خوە لبەر گڤاشتنێن سیاسی بگریت و خوە رادەستکر و ئالایێ سپی هەلگرت. لێ پشتی کونفرانسێ وی یێ روژنامەڤانی ل نیڤرویا ئەڤرۆ، هەمی تشت دیاربوون و خال دانانە سەر پیتا شیا ب سەرکەفتیانە خوە قورتالکەت و ب کەسەک دلسوز و نیشتمان پەروەر و ئایین پەروەر و جەنگاوەرەک بهێز دەرکەت.

هەرچەندە ئەگەر ئەم ل گوتارا وی بنێرین، گوتارەکا ژێک بستای و کورت و دویری سیاسەتبوو و ب ئاسایی و عەفەوی دل صافانە هاتبوو نڤێسین. لێ لپشت وەرچەرخانەکا سیاسی هەبوو و بتنێ ئەو بخوە و ڕکابەرێن وی سەنگا وێ گوتارێ دزانن و کا کارتێکرنا وێ چەندبوو، ئەو سادەیا پێڤەدیار ژی یا مەرەمداربوو.

پشتی دوهی دەولەتا ئیرانێ هەولدای پەنجێن صەدری و صەدریا بشکێنیت و مەرجەعێ وان مەجبورکری دەست ژکار بەردەت، ب هێجەتا تەمەنی و نەخوەشیا و ئەو گوتارا بۆ هاتی نڤێسین ئەو بەڵاڤبکەت و هەمی دویفکەتیێن خوە ئاراستەبکەت بو لدویفچونا خامەنائی و صەدر ژی ب دەرکەتی ژ رێبازا بنەماڵێ دیاربکەت. لێ موقەتدا صەدری ب پلانەکا سەرکەفتی بەرسڤا وان دا ب ڕاگەهاندنا دەست ژکارێ سیاسی بەردانێ و بڤێ چەندێ جادا عێراقی شلقاند و شەڕ و پێکدادانا ل جادێن پەغدا دەستپێکر، مە هەمیا هزرکر ئێدی زورا بزەحمەتە بهێتە کونترولکرن و پشتی نێزیک ٣٠ کەسا کوشتی و پتر ژ ٣٠٠ کەسا بریندارا و لاڤلاڤا سیاسەتمەدار و ڕەڤینا هندەکا ژوان ژ بەغدا و ناوچا کەسک. ئەڤرو بچەند پەیڤێن کێم و سادە شیا جادێ دەملدەست ب ڕاوەستینیت و وەسا بۆ جیهانێ بگشتی و ئیرانێ و لایەنگرێن وێ دا دیارکرن، کو صەدری بتنێ ملکێ وی نە و گرێدانا وان دگەل وی هەی مەزنترە ژ گرێدانا مەرجەعیەتێ ژی و هەمی صەدری فیدایێن وینە، ئەڤێ چەندێژی کارتێکرنەکا خوە یا مەزن لسەر عێراقێ و دەڤەرێ دێ هەبیت و نەدویرە کارتێکرنێ بکەت بۆ لاوازکرنا پێگەهێ ئیرانێ هەی وەک خودانا شیعێن جیهانێ.

هەرچەند بزمانێ سیاسەتێ کارەکێ سەرکەفتیبوو، لێ ب پیڤەرێ رەووشتێ ئایینی و مروڤایەتی کارەکێ زور بێ ووژدانە و بێ بەختیانەبوو، چونکی ئەو گوتارا ئەڤروکە موقتەدای خاندی دشیا شڤێدی ژی بخوینیت و گیانێ پتر ژ بیست کەسا و سێ سەد بریندارا قورتالبکەت، لێ ژبەر بەرژەوەندەکا تایبەت بێدەنگی هەلبژارت و دیسان ئەو کەسێن لسەر خاترا وی ڕژیاینە سەر جادا و گیانێ خوە بەختکری بساناهی و بێووژدانانە کرنە جەهنەمی و گوت (القاتل والمقتول فی النار) و ژبیرکر خودێ یا گوتی (الفتنة اشد من القتل)، ئەڤەژی وێ چەندێ دیاردکەت، کو لدەف سیاسیا بەرژەوەند ژ مرۆڤبوونێ ب بهاترە مخابن.