وه‌شانخانه‌یا سیتاڤ (Sîtav) و پشت ب خوه‌گه‌رمكرن

4 مانگ پێش ئێستا

موسه‌ده‌ق تۆڤى
سیتاڤ (Sîtav) وه‌شانخانه‌یه‌كا باكوورێ كوردستانێ یه‌، سالا 2013ێ ل باژێرێ وانێ هاتییه‌ دامه‌زراندن، داوییا  گولانا چوویى د سه‌ره‌دانا خوه‌دا بۆ وانێ، من و هه‌ڤالێ نڤیسكار ئیسماعیل بادى ده‌لیڤه‌ ده‌ست خوه‌ئیخست و مه‌ سه‌را خوه‌دیێ وه‌شانخانه‌یێ م. قاهر باته‌یى دا، كه‌سه‌كێ روحسڤك، ره‌وشه‌نبیر، ڤه‌كرى و خه‌مخورێ چاند و زمانێ كوردى، ب شیانێن خوه‌یێن كه‌سایه‌تى و بێى كو ئالییه‌ك پشته‌ڤانیێ لێ بكه‌ت، ژ دلسۆژییا خوه‌ بۆ ره‌وشه‌نبیرییا كوردى ئه‌و وه‌شانخانه‌یه‌ دامه‌زراندیه‌. ژ 2013 – حزیرانا 2022ێ (273) په‌رتووك ب قه‌باره‌یێن جودا چاپكرینه‌، یا هه‌رى مه‌زن په‌رتووكا (گۆتنێن پێشیێن كوردان) د چوار به‌رگ و پینج هزار به‌رپه‌راندایه‌، په‌رتووكێن وان هه‌مه‌جۆرن، گرنگییه‌ك  دایه‌ په‌رتووكێن زارۆكان و مژارێن دیرۆكى و ئه‌ده‌بى و فۆلكلۆرى.
من نه‌ڤێت ب درێژى ل سه‌ر وه‌شانخانه‌یێ بپه‌یڤم، ژبه‌ركو من راپۆرته‌ك پڕى زانیارى ده‌رباره‌ى وه‌شانخانه‌یێ د هژمارا رۆژا 4/9 رۆژنامه‌یا (ئه‌ڤرۆ) دا به‌لاڤكریه‌. یا من دڤێت ل ڤێرێ به‌راورده‌كێ د ناڤبه‌را وێ و وه‌شانخانه‌ و سازیێن چاپكرنێ یێن باشوورێ كوردستانێدا بكه‌م، به‌رى هه‌رتشته‌كى دێ بێژم د ده‌لیڤه‌یێن چووییدا من سه‌ره‌دانا دو وه‌شانخانه‌یێن دى یێن كوردى ل ئامه‌دێ و سته‌نبۆلێ كریه‌، هه‌مان په‌سنێن ڤێ وه‌شانخانه‌یێ ل سه‌ر وان ژى دگونجن.
وه‌شانخانه‌ و سازیێن مه‌ یێن باشوور، ب درێژییا (30) سالێن چوویى هه‌ر هه‌موو ب پشته‌ڤانییا حكومه‌تێ و حزبان كاردكه‌ن و پشته‌ڤانییه‌كا داراییا باش ژى لێ هاتییه‌كرن، لێ هه‌رده‌مێ پشته‌ڤانییا وان ژ به‌ر هه‌رئه‌گه‌ره‌كى بیت راوه‌ستیابیت و پاره‌ بۆ نه‌هاتبیته‌ مه‌زاختن، پشتى ده‌مه‌كى كورت ده‌ستداهێلاینه‌ و پشتا خوه‌دایه‌ چاپ و به‌لاڤكرنێ. د به‌رامبه‌ردا وه‌شانخانه‌یێن باكوور(Sîtav)وه‌ك نموونه‌ نه‌ حكومه‌ته‌ك و نه‌ حزبه‌ك و نه‌ ئالییه‌ك پشته‌ڤانیێ لێ دكه‌ت، پشتگه‌رما دلسۆژییا خوه‌ و خوانده‌ڤایێ خوه‌یه‌، چ گومان ژی تێدا نینه‌ هند خوانده‌ڤا و هند بكر هه‌نه‌ كو چاپكریێن وان نه‌ میننه‌ د عه‌مبارێدا و ناچار ببن ده‌ست ژ وه‌شانێ به‌رده‌ن. ئێڤارا مه‌ سه‌ره‌دانا خوه‌دیێ (Sîtav)كرى ئه‌و بێهنه‌ك بوو ژ ده‌رڤه‌ى باژێرى زڤریه‌ڤه‌ و هنده‌ك مێشێن هنگڤینى ب خودانكرینه‌ دا داهاته‌كى بۆ خوه‌ و خێزانا خوه‌ پێ دابینبكه‌ت.
ل داویێ دێ بێژم مه‌ دو كاركته‌رێن سه‌ره‌كى د وارێ چاپ و به‌لاڤكرنێدا هه‌نه‌، خوه‌دیێن وه‌شانخانه‌یێ و خوانده‌ڤان، ئه‌گه‌ر خوه‌دیێن وه‌شانخانه‌یێ د دلسۆژ بن بۆ په‌یاما خوه‌ و مه‌ره‌ما وان خزمه‌تا ره‌وشه‌نبیرى بیت، نه‌ مه‌رجه‌ژى هه‌رده‌م پشته‌ڤانى لێ بێته‌كرن ب هاریكارییا خوانده‌ڤاى دێ د ئه‌ركێ خوه‌دا سه‌ركه‌تی بن. به‌لێ ئه‌و خوانده‌ڤایێ بكرێ كتێبێ بیت، پشكه‌ك هه‌رچه‌ند كێم بیت ژ داهاتێ خوه‌ بۆ كرینا په‌رتووكێ ته‌رخانبكه‌ت، نه‌ تنی چاڤێ وى لێ بیت د رێوره‌سمه‌كێدا ب دیارى په‌رتووكێ وه‌رگریت. 
ٍ