زارۆك و قوتابخانە

11/09/2022

رێژین ئەحمەد
‎بابەتێ زارۆك و قوتابخانە، ئێكە ژ بابەتێن زور گرنگ كو پێدڤیە خێزان ب شێوەیەكێ ھشیارانە سەرەدەریێ دگەلدا بكەت، لسەر ڤی بابەتی زورا پێدڤیە لسەر خێزانی گرنگیێ ب زارۆكێ خو بدەت ژ لایێ خواندن و قوتابخانێ ڤە و پێدڤیە لسەر ھندێ بھێتە پەروەردە كرن، كو زارۆك گرنگیێ بدەتە وانە و ئەرك و ئەزموونێن خو ب تایبەت د قوناغا ئێكێ  بنەرەتی. زور جاران خێزان وێ چەندێ دیار دكەت كو ئێكەم قوناغە و زور گرنگیێ پێ نادەن لێ د ڕاستی دا گرنگترین قوناغە ژبەر بنیات و ئاڤاكرنا زارۆكی د قوتابخانێ دا دیار دكەت، د ڤی بابەتیدا دێ ھندەك خالا دیار كەم ژ بوو پتر روونكرنا بابەتی.

‎١ـ  پێدڤیە خێزان گرنگیێ بدەتە نڤستنا زارۆكی، داكو  دڤێ قوناغێ دا بھێتە فێركرن كو نڤستنا دروست ئێكە ژ رێكێن مەزن یێن سەركەفتنا قوتابی.
‎٢ـ خێزان دویڤچوونا زارۆكی بكەت لسەر ئەرك و وانەیێن وی یێن رۆژانە.
‎٣ـ  خێزان گرنگی و بھا و ڤیانا خواندن و نڤیسینێ ژ بۆ زارۆكی دیار بكەت، دا كو زارۆك دویر  بیت ژ ھزرێن نە جھێ خودا دەربارەی خواندنێ.
‎٤ ـ خالا ژ ھەمیا گرنگتر، ئەوە دەما زارۆك جاران نمرەیەكا نە باش دبەت یان ماموستا یێن زارۆكێ تە گازندنا ژ خواندنا زارۆكێ تە دكەن ب ھشیاری سەرەدەریێ دگەل زارۆكی بكەن و دویر بن ژ گوتنا ڤان پەیڤا (تو نا بیە چ، تو نە قوتابیەكێ زیرەكی تو نمرێن باش نە ئینی دێ تە ئیشینم تو ب كێر خواندنێ نا ھیێ ھەڤالێ تە ژ تە زیرەك ترە!)، گوتنا ڤان پەیڤا كارتێكرنەكا زورا نەرێنی لسەر زارۆكی دكەت.
‎٥ ـ د قوناغێن دەستپێكێ یێن خواندنێ دا بۆ زارۆكی دیار كەن كو خودان ئارمانج بیت د خواندنێ دا  لێ خێزان ئارمانجێ ژ بۆ زارۆكی دەست نیشان نە كەت، دا كو زارۆك كەسەكێ خودان بریار بیت د ھندەك قوناغێن  زارۆكینیا خودا.
٦ـ دەما زارۆك نمرەكا باش ب دەست خوڤە د ئینیت یان ئەزمونێن خو باش بەرسف بدەت خێزان ڕابیت ب پێشكێشكرنا دیاریان ھەتا ئەگەر ئەو دیاری د بچیك بن ژی داكو زارۆك ھەست ب پشتەڤانیا خێزانا خو بكەت.