دەرگەهێن قوتابخانا ڤەبوون و دڤێت ئەم چبكەین!!

17/09/2022

فوزی بهجت عبدالله
بەری هاتنا دەواما قوتابخانا و قوتابی قەستا خواندگەهان بكەن، ل سەر دایك و بابان پێتڤی یە هندەك شیرەتا ل زاروكێن خو بكەن، داكو كەسایەتیەكا بهێز هەبیت و خودان ئاقلەكێ‌ مەزن و بەرفرەهبیت و خودان رێز بیت ل نك قوتابی و ماموستایان، تنێ‌ نیڤ دەمژمێرێ‌ دگەل زارۆكێن خو ب روینەخار و ڤان خالان بۆ رون بكەن و شرۆڤە بكەن و تێبگەهینن.
- فێربكەن كو ماموستا كەسەكێ‌ خودان رێزە و كەسەكێ‌ پر زانینە، بلا رێزێ‌ لێ‌ بگرن و ئاخفتنا وی نەبرن و ئاخفتنێن نەخوش بەرامبەر نەبێژن.
- فێربكەن كو قوتابخانە مالا وی یا دووێ‌ یە و نابیت كەل و پەلێن قوتابخانێ‌ بشكێنن، بەلكو ب جوانی و سەرەدەریەكا باش ب پارێزن.
- فێربكەن پشتی قوتابخانێ‌ ئێكسەر قەستا مالێ‌ بكەن و خو ب دەوروبەران ڤە مژویل نەكەن.
- فێربكەن مروڤ هەمی چێكریێن خودێ‌ نە و نابیت یاری و ترانە پێ بهێنە كرن، كورت، درێژ، جان، كرێت، كێم ئەندام، هەژار، دەولەمەند، سپی، رەش، هتد.... چ شەرم د وێ‌ یەكێدا نینە كو كەسەك سالێ‌ هەمیێ‌ ب جوتەكێ‌ پێلاڤان بیت یان ژی ب جورەكێ‌ چانتێ‌ بیت، هەمی چێكریێن خودێ‌ نە، یاریكرن ب ڤان كەسان ئانكو یاریكرن ب چێكریێ‌ وان و دبیتە ئەگەرێ‌ نەخوشی و دلتەنگی و بێزاریا وان، لەوران هشیاربن.
- فێربكەن قوتابخانە نە جهێ‌ شەری و دژایەتی و تولڤەكرنێ‌ یە، بەلكو جهێ‌ خواندن و پەروەردە و فێركرنێ‌ یە، بلا سەرەدەریەكا جوان دگەل هەڤالێن خو بكەن و بنە جهێ‌ باوەریا ئێك و دوو و حەز ژ ئێك بكەن و رێزێ‌ ل ئێك و دوو بگرن، بلا بنە هەڤالێن خوشی و نەخوشیان و ئەگەر جارەكێ‌ كەسەك خەمبار بۆ یان ژی توشی ئاریشەكێ‌ بۆ بلا ببیتە چارەسەری بۆ وان كەسا.
بڤێ‌ رێكێ‌ زاروكێن خو فێربكەن و ل داهاتی ژیدا دێ‌ بنە كەسێن تێگەهشتی و كەسێن زانا و د چاڤێن ماموستا و قوتابیان ژیدا مەزن بن،  هەمی دایك و بابان دڤێت زاروكێن وان ب زیرەكی و تێگەهشتی بهێنە نیاسین.