پتریا تاکێن جڤاکێ مە ئێشێن دەروونی هەنە

7 رۆژ پێش ئێستا

رۆژھات شاكر
   ل پتریا جڤاکێن جیهانا نویدا، مرۆڤ تووشی ئێش و گرێکێن دەرونی بووینە و ئەگەرێن ڤان ئێشا گەلەکن و بەربەلاڤن، هندەک ژ وانا ئەگەرێن گشتی نە، وەک پەروەردا خێزانێ، گەلەک جارا شێوێ پەروەردەکرنێ دناڤ خێزانێ دا بوویە ئەگەرێ سەرەکی کو ئەندامێن وێ د پاشەروژێ دا تووشی گرێک و ئێشێن دەروونی ببن، دیسا هەبوونا ئاریشا دناڤبەرا دای بابان دا یان ژێکڤەبوونا هەڤژینان یان بکارئینانا توندوتیژیێ ب دژی زارۆکا، هەروەسا جورێ جڤاکێ تاک تێدا دژیت و داب و نەریت ژی ئەگەرن بۆ ئێشێن دەرونی، ئەڤە و ژبلی هندەک ئەگەرێن دی یێن گرێدایی ب کەسایەتیا تاکی بخوڤە، دگەل بارێ ئابووری و قەیرانێن جڤاک تێدا دبوریت.
وەک زانا و نوژدار دیاردکەن، کو نێزیکی 75% ژ ئێشێن لەشێ مرۆڤی ئەگەرێن وان دەرونی نە. ل ڤێرێ دێ ئاماژەی ب وێ چەندێ دەم کو مە دوو ئاریشە هەنە دگەل تێگەهێ نەساخێ دەروونی، یا ئێکێ ئەم کەسێ نەساخ ناناسین و رەفتارەکا توند دگەل دکەین یان خو لێ دویردئێخین دەمێ دبینین نەیێ ئاسایی یە. یا دووێ ئەم شەرم دکەین بێژین نەساخم یان ئێکێ خێزانا مە یێ تووشی ئێشا دەرونی بووی و ئەڤە دبیتە ئەگەرێ ئەنجامێن ترسناک سەر خێزانێ و جڤاکی، چونکی بۆ نموونە ئەگەر زەلامێ مالێ ئێشەکا دەروونی ل دەف هەبوو، دێ هەرو ئاریشە و ناکوکی د وێ خێزانێ دا هەبن و کارتێکرن دێ ل زارۆکا هێتەکرنێ و چێدبیت دوماهیێ ببیتە ئەگەرێ ژێکڤەبوونێ و ژناڤچوونا ڤێ خێزانێ، دیسا ئەڤ مرۆڤێ نەساخ مەترسیدارە سەر جڤاکی چێدبیت تاوانا ئەنجام بدەت، ئەگەر هات و نەهاتە چارەکرن.
ژبەر ڤێ چەندێ پێدڤی یە ئەم شەرمێ نەکەین و دانپێدانێ ب ئیشا دەروونی بکەین و هاریکاریا کەسێ نەساخ بکەین و هاندەین بچیت چارەسەریا خو وەرگریت و دڤێت بزانین مرۆڤێ تووشی گڤاشتنا دەرونی دبن، پتریا وان مرۆڤێن ب وژدان و هەستیار و ژیر و زانانە و خو لبەر گڤاشتنەکێ نەگرتیە و تووشی ڤێ ئێشێ یان گرێکێ بووینە.