مه‌ (حه‌ميد ره‌شاش) هه‌نه‌ به‌لێ مه‌ نڤيسه‌رێن ره‌شاش نينن

6 رۆژ پێش ئێستا

حەمید گراڤی
دۆهى ئه‌م ل هولا مه‌لبه‌ندى ئاماده‌بوون، بۆ گێرانا كوڕێ خاندن و ناساندنا په‌رتووكا (حه‌ميد ره‌شاش و توله‌رێيه‌كانى كوردايه‌تى) ئه‌وا ژلايێ نڤيسه‌رێ هێژا( ستار محمد امين) ڤه‌ هاتيه‌ نڤيسين. پشتى رێ و رسمێن په‌رتووكێ بدۆماهيك هاتين، هه‌لبه‌ت كومه‌كا هه‌ڤال و نڤيسه‌ر و ئه‌ده‌بدۆستان لێ ئاماده‌بوون، هه‌رجار وه‌ك نه‌ريته‌ك و عورفه‌كێ يا لێهاتى كو ده‌رگه‌هێ پسياران دهێته‌‌ ڤه‌كرن و پاشێ چه‌ند پڕسه‌ك هاتنه‌ ئاراسته‌كرن، به‌لێ ئه‌و پڕسا هه‌ڤالێ تێكوشه‌ر (حه‌جى يوسف)ى ئاراسته‌كرى، هه‌مى پسيارێن ديتر بێ ده‌نگ كرن ده‌مێ گۆتى(مه‌ ل بادينان ب ده‌هان خه‌باتكه‌رێن مينا حه‌ميد ره‌شاش هه‌نه‌، پێدڤييه‌ ل به‌ر چاڤ بهێنه‌ وه‌رگرتن). ب راستى پسياره‌كا دجهێ خۆده‌بوو‌، مه‌ بده‌هان پێشمه‌رگێن سه‌ركرده‌ و خۆدان خه‌باته‌كا دوير و درێژ هه‌نه‌، هه‌مى جهێ رێزێنه‌، ئه‌ز وه‌ك ئه‌رك دبينم ژيانناما ڤان سه‌ركردان يا پڕى خه‌بات و قوربانيدان ل كور و سميناران بهێته‌ گۆتن و ئه‌رشيفكرن دناڤا په‌ڕتووكانده‌ تاكو ل پاشه‌ڕۆژێ به‌ره‌باب و گه‌نجێن تازه‌ گه‌هشتى ب قه‌هره‌مانى و ماندوبوونا وان ئاشنابن، ئه‌ڤ جوره‌ پێشمه‌رگێن هه‌ سه‌روه‌ت و سامانه‌كێ هه‌ره‌ گرنگه‌ نابيت بهێته‌ پشتگۆه ئێخستن و هنداكرن.
 ئه‌ڤ وه‌لاته‌‌ ب خوين و خه‌باتا ڤان قه‌هره‌مانا يا هاتييه‌ پێش، ئه‌ڤا نۆكه‌ ئه‌م دبينن به‌رهه‌مێ كه‌د و زه‌حمه‌تا وانه‌. نۆكه‌ ئه‌م خۆدان ده‌زگه‌هـ و چاپخانه‌ و پاره‌ و كه‌سێن خۆدان شيانن‌، ئه‌ركێ ده‌ستهه‌لاتێيه‌ و كاره‌كێ پيڕۆزه‌ نۆكه‌ ب كارێ ئه‌رشيفكرن و تۆماركرنا بيرهاتن و بيره‌وه‌ريێن ڤان سه‌ركردا رابت،‌ هه‌روه‌سا ئاسانكاريان ژى پێشكێشى نڤيسه‌ران بكه‌ت و وان هانبده‌ت بۆ بجهـ ئينانا ڤان جوره‌ پڕۆژا، مه‌ پێ باشه‌ ده‌زگه‌هه‌كێ پسپور بهێته‌ ته‌رخانكرن بۆ تۆماركرنا هه‌مى چه‌پ و چيرێن ژيارا ڤان خه‌باتكه‌ر و قه‌هره‌مانان، نۆكه‌‌ دليڤه‌كا زێرينه‌ و باشترين ده‌مه‌ بۆ ڤى كارى، سه‌رده‌مێ ژيانا چه‌كدارى و چول و چيا و پارتى زانيێ چوو، نۆكه‌ ئه‌م خۆدان وه‌لات و په‌رله‌مان و دام و ده‌زگه‌هن، سه‌ره‌راى دزى و گه‌نده‌لى و خراب بكارئينانا گه‌له‌ك جهان، ئه‌م ژگه‌له‌ك ده‌وله‌تان باشترن. هه‌لبه‌ت پێشمه‌رگه‌كێ وه‌كى حه‌ميد ره‌شاش كو ل چ جهان و حوجره‌يان و قوتابخانان نه‌خواندبت خۆدان فه‌رهه‌نگ و چوار په‌رتووك بت، جهێ ته‌قديرێ يه‌، ئه‌ڤه‌ حاله‌ته‌كێ ده‌گمه‌نه‌‌، وه‌ك نڤيسه‌ر ژزار ده‌ڤێ وى دپه‌رتووكێ ده‌ دبێژت وى خوه‌ بخوه‌ فێرى خواندنێ كريه‌، ئانكو وى پيت پيت يا خوه‌ فێركرى، تا وى رادده‌ى‌ كو  سمينار و وانه‌يان‌ ل زانكويان پێش كێش بكه‌ت، ل نك وى چ واتا بۆ وه‌ستيانێ نه‌بوون، خۆدان دله‌كێ ساڤا و ڤيانه‌كا مه‌زنبوو له‌ورا هێشتا هێز و شيانێن دانێ هه‌بوون، به‌لێ مرنێ رێگرى لێكر، ب راستى سه‌ركرده‌ و پێشمه‌رگه‌كێ بێ وێنه‌بوو، پشتى ئازادبوونا وه‌لاتى، ئه‌ڤ كه‌سه و يێن وه‌كى ڤى سه‌ركرده‌يى گه‌له‌ك يا كێمه‌ تۆ ته‌نها په‌رتووكه‌كێ بۆ چێكه‌ى و ژيانناما وى تێده‌ ئه‌رشيفكه‌ى، ئه‌ڤ‌ جوره‌ پێشمه‌رگه‌ سومبلن پێدڤييه‌ په‌يكه‌ر بۆ بهێنه‌ درۆستكرن و ژيانناما وان ل زانكويان بهێته‌ خواندن و ببيته‌ جهێ فه‌خر و شانازيێ بۆ هه‌ر وه‌لاتپارێزه‌كێ.