خۆ ھاڤێژتن د سەر کڤانێ حەفت رەنگ را

5 رۆژ پێش ئێستا

أم كلثوم محمد
دنوکەدا من شیا پێکڤە گرێدانەکێ تێبگەھم؛ ل بیرا منە دەمێ ئەم زارۆک و کڤانێ بارانێ ل ئاسمانی دروست د بوو، دگوتنە مە ئەگەر ھەوە خۆ د سەر کڤانێ حەفت رەنگی را ھاڤێت دێ بنە کورک یان کچک، مە ژی لدەمێ ئاڤ دھاتن و ھەتاڤ یا دژوار، دا ئاڤێ بلند کەین دا کو وەک بارانێ بھێتە خار و کڤان دروست بیت ب مەرەما ھندێ پێکولا بکەین خۆ د سەر را بھاڤێژین، دا کو تاقی بکەین ئەرێ ئەڤ چەندە چەند یا درستە، ئەرێ ژ راستا دێ رەگەزێ مە ھێتە گوھورین؟ ئەرێ دێ چ چێبیت ئەگەر رەگەزێ مە ھاتە گوھارتن؟  ل وی دەمی ئەم تێنەدگەھشتین رەگەز گوھارتن بابەتەکێ ب چ شێوە یە و بوچی ب کڤانێ بارانێ ڤە گرێددەن، مە وەسا ھزر دکر تشتەکێ مەزنە رەگەزێ تە بھێتە گوھارتن. نزانم بوچی ئەوان ئەڤ تشتە دگوتنە مە د وی ژی دا لێ ھەر مەزن و خودان پرەنسیپ  بوون ئەڤ ھزرە لدەڤ مە پەیدا کری، کۆ د خۆ ھەلاڤێتنەکێ دا دشیانێن تە دایە رەگەزێ خۆ بگوھوری!

گەر ئەز حەز ژ کڤانێ حەفت رەنگ بکەم دەمێ ل ئاسمانا دروست دبیت، دێ دشیانێن کێ دا بیت  بێژیت تۆ رەگەزبازی یان پالپشتیا وان دکەی؟ گەر ئەز حەز ژ تێکەلکرنا رەنگان بکەم، دێ دشیانێن کێ دا بیت بێژیت تۆ رەگەزبازی؟ ئەرێ ژدل ژی ئەم رەگەزبازی ب ئالایەکئ چەند رەنگڤە گرێددەن؟ ئەرێ ئەم دشێن ژ خۆ پشتراست بین ل دوماھیکێ نابێژین خودێ ژی پالپشتیا رەگەزبازا دکەت، چونکی کڤانێ حەفت رەنگ دروست دبیت ل ئاسمانا؟ 
ئەم  نزانین ئەم بەرەڤ کیڤە دچین ژئەگەرێ دیڤچونێن خۆ یێن بێ رامان! مە دڤێتن بەرگێ پەرتووکەکێ بھێتە گوھارتن ژبەرکو فروکەیەک یان بالونەکا رەنگ و رەنگ لسەرە؟ مە دڤێت وەل زاروکێن خۆ بکەن ئەو ئازادی نەمینیت حەزا خۆ بۆ رەنگان و کڤانێ بارانێ دیارکەت، و وێنە بکەت؟ مە دڤێت زاروکێن مە بێگونەھیا خۆ ژدەست بدەن سەرا وێ چەندێ ئالایێ رەگەزبازا بۆ بدەنیە نیاسین؟ دێ بوچی ئەڤان ھزرا ھەر ژنوکە دمێشکێ وان دا چینین. نە ئەو زارۆنە وەک مە بتنێ پێکولا بکەن خۆ دسەر کڤانی را بھاڤێژن، د ڤی سەردەمی دا، سەردەمێ زاروکێ پێنج سالی تکنولوجیایێ بکاربینیت دشیان دا یە بچیتە دناڤ ھەر سایتەکی دا و ب پێنگاڤەکا مەزن خۆ د سەر ئەوی کڤانی را بھاڤێژیت، ب ھەستەک ئازادی خوازانە. 
ئالایێ سپی ھێمایێ ئاشتیێ یە. لێ دشیانێن کێ دا یە ھزر د ئاشتیێ دا بکەت دەمی مریەکێ خۆ ب کفنێ سپی بن ئاخ دکەت و بێژیت: ئوھ، نابیت ئەڤ رەنگە بۆ مریەکی بھێتە بکارئینان. ب ھەمان شێوە، چ ماموستایەک دشێت ھزر د بانگێشا رەگەزبازا دا بکەت د دەمەکی دا ئارمانجا وی یا سەرەکی فێرکرنا قوتابیایە لسەر تشتێن سروشتی؟ چ ماموستایەکی ماف ھەیە ددەمێ شروڤەکرنا ئەگەرێ دروستبوونا کڤانێ بارانێ دا بێژیتە قوتابیان ئەڤە ئالایێ رەگەزبازا یە، ھشیاربن ڤان رەنگا دگەل ئێک بکارنەئینن؟ ئەرێ ما زاروکێ تە/ قوتابیێ تە د وی دەمی دا پسیار ناکەت ئەرێ رەگەزباز کینە؟ ئەرێ دێ بێژیێ ئەون یێن خۆ ژ کچ دکەنە کور و کور خۆ دکەنە کچ وھتد؟ ئانکو تشتەک دشیاندا یە، ئانکو تۆ، ئەم، ھوین، یێ ئەڤێ چەندێ ب ڕێکا قەدەغەکرنەکا سادە نورمال دکەین. نورمال دکەین کۆ دشیان دا یە رەگەزێ خۆ بگوھوری ھەر دەمێ تە حەز لسەر ھندئ ھەبوو!  
ژبەرھندێ کۆ ھەر دەم تشتێن نامو یێن گەلە دەنگو ھەین و نورمال دبن،  ژبەر پرەنسیپێن خۆ یێن تاکە کەسی و جڤاکی ھەتا سیاسی مێشکێ زاروکێن خۆ ھەر ژنوکە تێک نەدەن. تشتێن دھێنە قەدەغە کرن ھەر دەم ئەو تشتن ئەڤێن ب بورینا دەمی ب شێوەیەکێ نەچاڤەرێکری بەر بەلاڤ دبن و رھ و ڕیچالێن خۆ بھێز دئێخن دناڤ ھزرا کەسان دا تایبەت دەمێ مروڤ یێ تژی بیت ژ مەرەقێ. 
بلا ھەردەم ئەو رەنگ دھزرا زارۆیێن مە دا ھەتا دھزرێن مە  بخۆ ژی دا  ھێمایێ سەقایەکێ جوان بیت. ھێمایێ باران بارینەکا ڕوژا ھەتاڤی.