رۆتینا فەرمانگەھـ و رێڤەبەریان، گێرا ستریا ب ھاولاتی دکەن

3 رۆژ پێش ئێستا

مسته‌فا عه‌بدورحمان ئه‌ره‌دنى
خودێ نەکەت بەرێ ھەوە بکەڤێت فەرمانگە و رێڤەبەریەکێ ژبۆ برێڤەبرنا مامەلەکێ، وێ گاڤێ دێ نەفرەتان ل خۆ کەن. ئەز گەلەک کێم سەرەدانا فەرمانگە و رێڤەبەریان دکەم بۆ برێڤەبرنا (مامەلا) و ل دەمێ من (مامەلە)ک ھەبیت باوەر بکەن (تا) من دگریت.
پێشی چەند رۆژان ژبۆ ب برێڤەبرنا (مامەلە)کێ من سەرەدانا رێڤەبەریەکێ ل دھوکێ کر. ب  ژوور کەفتم و ل پرسگەھێ من پرسیارکر بەرێ من دا ژوورەکێ، چومە وێ ژوورێ، گوت ھەرە ژ دەرڤە (ئیستیمارەکێ) پربکە و بینە. چوم داکو (ئیستیمارێ ) بینم گوت، دڤێت سەنەدا خانی بینی، بابوو ئەڤە پسولە و یا یاسایی یە  پێدڤی ب تاپویێ ناکەت ئەز کرێدارم، نەھەرێ گوت، بێی سەنەدە برێڤە ناچیت، سەنەد دگەل من نەبوو، من پەیوەندی ب خودانێ خانی کر، بۆ من سەنەدا خانی ھنارت و ل رۆژا پاشتر من سەنەد بر و چووم.
 گوت، ھەرە (ئیستیمارێ) بینە، چوم من (ئیستیمارە) ئیناند، گوت ببە ژوورا ژمارە (٢)، چوینە وێرێ گوت ھەر ژوورا ژمارە (٥) درێژناکەم چوار پێنج ژوور مە سەح کرن و پاشی گوت، ھەرە ژدەرڤە ل بەر دەرێ دائیرێ فلان تشتی بکڕە و بینە. چوم من ئەو ژی کری ڤەگەریایم گوت، ببە ژوورا پشکنینێ، ل ژوورا پشکنینێ گوت، پێدڤیە بچی سەرەدانا فلان رێڤەبەریێ بکەی.
ئێ بابوو ژبەر، چ ما چ پەیوەندیا وێ رێڤەبەریێ ب ڤێ رێڤەبەریێ ڤە ھەیە؟!!. گوت، ئەم بێی وان نەشێین چێکەین، ھەما ھەرە پێنج خولەکن و دێ مورەکێ ل پشتا کاغەزا تە دەن و وەرە دێ بۆ تە چێکەین. تاکسیەک من گرت و بەرەف وێ رێڤەبەریێ چوم و ل پرسگەھێ من پرسیار، کر ڤێ (ماملێ) ببەمە لایێ کێ؟ گوت، ھەرە عەریزەکێ بدە.
 باشە عەریزە بو چیە فلان دائێرێ ئەز ھنارتیمە؟!!
 گوت، نابیت بێ پێشکێشکرنا عەریزەکێ.
من عەریزە پێشکێش کر و برە پارەک دا ئەرزوحالچی. گوت ببە ژوورا ژمارە (١)، من برە وێرێ ئیمزایەک لێ کر و گوت، ببە ژوورا (٣) من برە وێرێ وی ژی ئیمزایەک سەر کر گوت، ببە ژوورا (٦)، من برە وێرێ ژی وی ژی نڤێسینەک لسەر کر وگوت، ببە ژوورا ژمارە (٩)، من برە وێرێ ژی وی ژی مورەک لێدا و گوت، کانێ ھندە پاران بدە، من پارە دان و گوت، ببە ژوورا ژمارە(٣)من برە وێرێ ژی ووی ژی ژمارەک لسەر کر و گوت، ببە ژمارە (٨)، من برە وێرێ ژی، وی ژی بەرێ خۆدایێ ونێزیکی نیڤ دەمژمێرێ مامە ل ھیڤیێ، وی ژی تشتەک ل سەر نڤیسی و گوت، ببە ژوورا (٤)، من برە وێرێ ژی وی ژی بەرێ خۆ دایێ وژمارەک لسەر نڤیسی گوت ببە ژوورا (١)، من برە وێرێ ژی وی ژی ئیمزایەک ل سەر کر وگوت خلاس ببە ھەرە وێ رێڤەبەریا تو ژێ ھاتی.
نێزیکی دوو دەمژمێران ب ڤێ مامەلێ ڤە گیروبوم، ڤەگەریام رێڤەبەریا ژێ چویم وان ژی  چوار پێنج ژوورەک ب من کرن،  تا ب دوماھی ھاتی. 
یامن ل ڤێرە دڤێت بێژم، ئەڤ روتین و ئینان و برنە بۆ چیە؟(سەرۆکێ حکومەتێ ئەمر کریە دێ روتینێ کێم کەین، بەلێ ئەگەر ئەڤە بۆ کارەکێ بچووک بیت بیست ژوورا ل دوو رێڤەبەریان و بۆ دەمێ دوو رۆژان بکەم، ئایا پا ئەگەر ئەڤە ماملەکا دیتر بایە دا چەند دا ب زەحمەتر کەڤیت؟.
ھەر چەندە خودانێ خانی سێ رۆژان پێشی بچم وی سەرەدانا رێڤەبەریا دوویێ کربوو و چ تشتەک ل سەر نەھێلا بوو.
ئایا ما دەم نەھاتیە ب(کلیکەکی) ھەمی تشت سەر راست ببن، و ببنە ئەلکترونی؟.
ئایا بۆ کارەکێ بچویک چ پەیوەندیا دوو رێڤەبەریان پێکڤە ھەیە کو نەژ دویر ونەژ نێزیک پەیوەندی پێکڤە نینە؟.
ما دەم نەھاتیە ل شوینا ھند ژووران ب خودانێ ماملێ بکەن ھەمی فایل (دکومپیوتەرێدا) بن وب کلیکەکێ زانیاریێن وی ھەمی بھێن خوارێ وب ئێک لاپەر وئێک ژوور کارێن مرۆڤی سەر راست بکەن؟.
فەرە رێزدار (سەروكێ حكومەتێ و پارێزگارێ دھوكێ) ل سەر دیاردا روتینێ راوستن و روتینێ نەھێلن، خەلکێ ھند دەم نینە چەند رۆژان ودەھان ژووران دوبارە وسێ بارە بکەن ھەتا ماملەکا بچویک برێڤە ببەن.
بێگومان ڤێ روتینێ پەیوەندی ب کارمەند ورێڤەبەرێن رێڤەبەریێ ڤە نینە، بەلکو دڤێت ل سەر ئاستێ وەزارەتێ وحکومەتێ نەھێلانا روتینێ بھێت کرن.
تێبینی: ژمارەێن ژووران من ژ نک خۆ داناینە یێن وان ھەردوو رێڤەبەریان دجودانە.