بوچی تاکێ کورد هشیار نابیت؟

3 رۆژ پێش ئێستا

سەگڤان ئەرتیسی
هەر دیاردەک ژ دیاردێن ژیانا مە، ئەگەرێن خوە هەنە، ئانکو ژ بوشاییەکێ ناهێن! گرێدان و لێکدان و خاندن و ڤەکولین و شرۆڤەکرنا دیاردان ب وان سەدەمانڤە زۆر گرنەگە، ژ بۆ وێ بگەهین دەرئەنجامێن باش.
ژ بۆ پرکرنا هەر بوشایەکێ ژ بوشایێن د ژیانا مروڤیدا هەین، پێدڤی هندەک بویەران هەیە ئان ژی ب شێوازەکێ دی ئاماژێ پێ بکەین، هەر مروڤەکی د ژیانا خوەدا بوشای هەنە وەک (ئەفسانە قارەمان پیروزیێن ئاینیی) و تا دیماهیکێ و بڤێت نەڤێت دێ وان بوشاییا هەر تژی کەت، لەو ل ڤێرێ د مینیت ل سەر هشیاریا رێبەر و سەرکرد و رەوشەنبیرێن وی مللەتی کا دێ چەوا و ب چ رێ شێن وان بوشاییان ب پیروزیێن مللەتی تژیکەن.
ژ بەر گەلەک فاکتەرێن دەرەکی و ناڤخوەی، مە کوردا زوی ب زوی نەشیایە وان بوشاییا تژی بکەین، بەلکو داگیرکەرێن مە ژ مە شارەزاتر و زیرەکتر بینە.
تەماشەی تورکیا نها بکەین دێ بینین نڤشێ ڤان سەد سالا ئەو بوشایی یێت هاتینە تژیکرن ب هندەک پیرۆزیێن دروستکری وەک چ شانازیە بۆ وی یێ دبێژیت ئەز تورکم، ئەوێ زمانێ تورکی نەزانیت ناچیت بهەشتێ، نازناڤێ مستەفا کەمال (بابێ تورکا) و گەلەک پیروزیێن دی. نها ل دەف تورکا مستەفا کەمال پیروزترە ژ هەر مرۆڤەکی، چونکی ئەو بوشاییا دڤێت مرۆڤ ب مرۆڤەکێ پیرۆز تژی بکەت، تورکا ب بابێ تورکا تەژی کر.
هەروەسا فارسا ئەو پیروزیا مروڤا ب (عەلی و حەسەن و حسێن) تژی کر، نها ئەڤە پیروزترن ژ پێغەمبەری ژی ل دەف شیعا.
هەروەسا عەرەبێن سنی و سنیێن نە عەرەب ئەو بوشایی یا تەژی کری ب (عومەرێ کورێ خەتابی).
یان بێژین بەعسیا ئەو بوشایی ب ناڤێ سەدامی تژی کربی.
جهێ مخابنیێ یە ل جهێ وێ کورد ئەفسانە و سەرکرد و ئاینێ خوە پیروزبکەن، ئەو بوشایی ب یێن خەلکیڤە تژی کرنە. هەروەسا کوردێن موسلمان و سنی ب عمەری و یێن شیعی ب عەلی. هەروەسا وەک جهێ پیروزژی ب مەککە و مەدینێ تژی کرییە.
هەروەسا د نهادا زوربەیا کوردا رێک و رێباز و سەرکردە ب وان حزبا ڤە تژی کرینە ئەوێن ئەو دناڤدا مەزن بین،( پارتی و بارزانی، ئێکەتی و تەلەبانی، پەکەکە و ئاپو) ب مخابنیڤە کەس نابێژیت کورد و کوردستان.
مەبەست ژ ڤی بابەتی ئەوە، کو مروڤی پێتڤی تژیکرنا وان بوشاییا هەنە ئەوێن د ژیانا مروڤی دا وەک ئەفسانە مێرخاس پیروزیێن ئاینی و گەلەکێن دی، مەرەم ل ڤێرێ مە کوردا ئەڤ بوشاییە یێت تژی کری ب یێت نە خومالی، ژ بەر وێ ئەڤرو رویدانەک ل فلستینێ رویدەت ئێکسەر دێ لڤینێن ئاینی ڤەلڤن و بێ مروڤی دێ مروڤ ئاجز بیت، چونکی ئەو بوشای ب وی ئاینی یێت هاتین تەژیکرن ئەوێن فلستینییا پێ تژی کرین، ژبەر وێ وەک مەگناتیزەک هێزا راکێشانێ بهێزدکەڤیت،
لێ هەمان رویدان و لەوانەیە ب تراژیدیتر بیت ژی ب سەرێ مللەتێ مە بهێت بەس دێ تشتەکێ زور ئاسایی بیت، چونکی بوشایی ب تراژیدی و پیروزیێن مللەتی نەهاتییە تژیکرن ژ بەر وێ هێزا راکێشانێ دێ یا لاوازبیت ئەگەر ئاجزیەک هەبیت ژی دێ زورا ئاسای بیت.
هەروەسا رویدانا کوشتنا کچا نەمر ژینایێ، ژ بەر تژیکرنا راپێچا ئاینی ل دەف کوردێن مە زوی ب زوی نەشیان خوە ل ڤێ کچێ بکەن خودان، بەروڤاژی هەتا من هندەک نڤیسین دیتن زور ب سڤکاتی و ئیهانە بەحسا ژیانیێ دکر، مخابن ل بن دەستهەلاتا خومالی و کورد ئیهانا جانگوریێ کوردا بکەن، لێ ژ بەر باج زێدەکرن و دزیا گوهـ و چاڤ و ئەزمان مت بینە، ئەگەر هندەکا خوە کربیت خودان ژی ئەون ئەوێن ئەو بوشای ب هندەک پیروزی و هەستێن نەتەوەی تژیکرین.

ژ بو وێ ئەم بشێین تاکەکێ هشیار ئاڤا بکەین، دڤێت دەست ب تژیکرنا وان بوشاییا بکەین ئەوێن مللەت ل سەر ئاڤا دبن، و شووشتنەکا بهێزبکەین ب وان پیروزی و ئەفسانەیێن بیانی.
دویر ژ ڤێ رێکێ مەحالە تاکێ هشیار ئاڤا ب بیت.