فەستیڤالا رۆشنبیری یا ئێكه‌تیا نڤیسه‌رێن كورد و چه‌ند دیتنه‌ك!!

2 رۆژ پێش ئێستا

جه‌میل شێلازی
دێ ئێكسه‌ر چینه‌ دناڤ كاكلكا بابه‌تی دا بێی پێشه‌كی و هێڤه‌ وێڤه‌، فەستیڤالا رۆشنبیری (5) یا ئێكه‌تیا نڤیسه‌رێن كورد ـ تایێ دهۆكێ ئه‌وا دێ ل ڕۆژێن (25 ـ 26/9/2022)ێ هێته‌ گێڕان، راسته‌ هێشتا فەستیڤال نه‌هاتییه‌ گێڕان، لێ ب دیتنا من ئه‌ڤه‌ هنده‌ك دیتنێن مننن ل دوور رێكخستن و به‌رهه‌ڤكرنا فەستیڤاڵێ، هه‌كه‌ر لیژنا زانستی یا فەستیڤاڵێ ئه‌ڤ پێنگاڤه‌ هاڤێتبانه‌، باوه‌رم دابیته‌ فەستیڤاڵه‌كا جۆره‌یی (نوعي)، و دا وه‌ك فەستیڤاڵێن زانستی یێن زانینگه‌هان بیت، ئه‌وژی:
ل ده‌ستپێكێ هه‌كه‌ر لیژنێ ژماره‌كا تایبه‌ت یا موبایلێ یاكو (سناپ و ڤایبه‌ر و تیلیگرام) لسه‌ر د ڤه‌كری ده‌ستنیشانكربایه‌، دگه‌ل ئیمێله‌كێ، كو بابه‌ت هه‌می ب رێكا وان بۆ لیژنێ چووبانه (سه‌ره‌رایی دوو هژمار هاتبوونه‌ دیاركرن)، لێ نزانم كا وان چه‌ند ئاگاهی لسه‌ر وان بابه‌تان هه‌بوو یێن ب رێكا وان بۆ چووین یان نه‌! چونكه‌ هه‌كه‌ر هه‌ر بابه‌ته‌كێ بۆ رێكا وان بۆ چوویی تنێ ب كومینته‌كا كورت به‌رسڤا وان هاتبا دان (كورتییا ڤه‌كۆلینا ته‌ گه‌هه‌شته‌ لیژنا زانستی یا هه‌لسه‌نگاندنێ، چاڤچلڤەرێ به‌رسڤا وه‌رگرتنێ یان نه‌وه‌رگرتنێ به‌), دا وێگاڤێ ڤه‌كۆله‌ر ژی چاڤه‌رێیی به‌رسڤا وان بیت، لێ مه‌ هنارتن مه‌ نه‌زانی گه‌هه‌شت یان نه‌؟ وه‌رگرت یان نه‌؟؟ چونكه‌ به‌رسڤا مه‌ نه‌هاته‌ دان ب وه‌رگرتن یان نه‌وه‌رگرتن، هه‌تا دوو ڕۆژێن فەستیڤاڵ بهێته‌ گێڕان ژی، مه‌ چوو ژ كورتییا ڤه‌كۆلینێن خۆ نه‌زانی.
خاڵا ده‌ستپێكێ دگه‌ل به‌ڵاڤكرنا ئاگه‌هدارییا فەستیڤاڵێ، مه‌رجێن نڤێسینا ڤه‌كۆلینێ دگه‌لدا هاتبانه‌ به‌ڵاڤكرن، هه‌ر وه‌ك هه‌موو كۆنفرانسێن زانستی یێن زانینگه‌هان به‌ڵاڤدكه‌ن (چونكه‌ باوه‌رم لیژنا هه‌لسه‌نگاندنێ یا فەستیڤاڵێ كه‌سێن مامۆستایێن زانكۆیێ دگه‌لدا هه‌نه‌ و شاره‌زانه‌ لسه‌ر وان پێنگاڤان).
و ده‌ما كو لیژنێ وه‌ك ڕاگه‌هاندن به‌ڵاڤدكر، گۆتبایه‌ هه‌ر ئێكێ دخوازیت ب ڤه‌كۆلینه‌كێ ل دویڤ بابه‌تێن فەستیڤاڵێ پشكداریێ بكه‌ت، كورتییا ڤه‌كۆلینا خۆ هه‌تا (فلان) ده‌می بۆ لیژنێ بهنێریت. (راسته‌ وه‌ك ئاگه‌هداری ب ڤی شێوه‌یی به‌ڵاڤكرییه‌، لێ مه‌ دیتنه‌ ژی هنده‌كان تنێ وه‌ك كومێنت نڤیسابوون (بابه‌ته‌كی بۆ من ژی بدانن!!)، ئه‌رێ ئه‌ڤه‌ یا به‌ر ئاقله‌ بۆ ڤه‌كۆله‌ری ب ڤی شێوه‌یی بیت؟!! یان كورتییا بابه‌تی كا ل سه‌ر چییه‌ و ناڤه‌ڕۆكا وێ چ تێدایه‌، پۆختێ وێ هنارتبایه‌.
پشتی ب دویماهی هاتنا ده‌مێ هنارتنا كورتییا بابه‌تان، لیژنێ ئێكسه‌ر بابه‌ت هه‌لبژارتبانه‌، ل دویڤ پێدڤیاتا فەستیڤاڵێ، و به‌رسڤێن یێن وه‌رگرتی و نه‌وه‌رگرتی هاتبانه‌ دان، كا ئه‌وێن نه‌وه‌رگرتی هۆكارێن نه‌وه‌رگرتنێ چ بووینه‌، چونكه‌ پشتگۆھ هاڤێتنا یێن نه‌وه‌رگرتی، پشتگۆھ هاڤێتنا ڤه‌كۆله‌رییه‌، به‌لكو دشییان ب كورته‌ ڕۆنكرنه‌كێ به‌رسڤا وان بده‌ن ژ به‌ر ڤان ئه‌گه‌ران ڤه‌كۆلینا هه‌وه‌ نه‌ هاته‌ وه‌رگرتن، ئه‌ڤه‌ بخۆ ژی گرنگیدانا لیژنێ بوویه‌ ب یێن وه‌رگرتین و‌ نه‌وه‌رگرتین. و یێن وه‌رگرتی گۆتبایێ هه‌تا فلانه‌ ده‌می ڤه‌كۆلین ب ته‌مامی بۆ لیژنێ بهێنه‌ هنارتن، داكو لیژنا تایبه‌ت زمانی پێداچوون تێدا كربایه‌ ل ده‌مه‌كێ زویداو راستڤه‌كربانه‌ بۆ چاپكرنێ.
ئه‌و ڕێژا ڤه‌كۆلینێن هاتینه‌ وه‌رگرتن دشییان دوو سێ جار هند لێ بكه‌ن، چونكه‌ كۆنفراسێن زانكۆیان ژی دوو ڕۆژن، لێ تنێ وه‌ك نموونه‌ دێ ئینم، كۆنفرانسێ زانكۆیا زاخۆ (2022)ێ پێتر ژ (84) ڤه‌كۆلینان پشكدار بوون د ماوێ دوو ڕۆژان دا، كۆنفرانسێ زانینگه‌ها وانێ د دوو ڕۆژان دا پیتر ژ (44) ڤه‌كۆلینان پشكداری كرن، ئه‌ڤه‌ هه‌كه‌ر لیژنا هه‌لسه‌نگاندنا فەستیڤاڵێ ل دویڤ هه‌مان شیڕازێ كۆنفرانسێن زانینگه‌هان كربانه‌ (پانێڵ) و بۆ هه‌ر پانێڵه‌كی (4) ڤه‌كۆله‌ر پشكدار كربانه و بۆ هه‌ر ڤه‌كۆله‌ره‌كی (10 ـ 15) خۆله‌ك دانابانه‌، باوه‌رم ب كێمی دوو جار هند ڤه‌كۆلینان دا وه‌رگرن، ئانكو دا پیتر ژ (24) ڤه‌كۆله‌ر پشكدار بن.
ل شوینا گۆڤارا (په‌یڤ) یا هژمارا (89)ێ ب هه‌مان ناڤه‌ڕۆكا (ڤه‌كۆلین و چێڕۆك و هۆزان و پشكا لاتینی) هاتییه‌ به‌ڵاڤكرن، بلا (هژماره‌كا تایبه‌ت بایه‌ ب ڤه‌كۆلینێن فەستیڤاڵێ)ڤه‌، ماده‌م دگه‌ل ده‌مێ فەستیڤالێ چاپ بوو، هه‌می ڤه‌كۆلین تێدا به‌ڵاڤه‌كربانه‌، بۆ ده‌مێ گێڕانا فەستیڤاڵێ، دا هه‌ر پشكداره‌ك د فەستیڤاڵێ دا، وێ هژمارا تایبه‌تا ڤه‌كۆلینێن فەستیڤاڵێ وه‌رگریت، هه‌ر ڤه‌كۆلینه‌كا خواستا وی لسه‌ر بایه‌، دا ب به‌رفره‌هی خوینیت، له‌وما بلا پێشكێشكرنا ڤه‌كۆلینێ تنێ پۆخته‌كێ گرنگێ ڤه‌كۆلینێ هاتبایه‌ پێشكێشكرن، دا ل وی ده‌می پیتر ده‌لیڤه‌ بۆ هێشتا ڤه‌كۆلینان هه‌بیت، چونكه‌ د هه‌می كۆنفڕانسێن زانستی دا ئه‌ڤ پێنگاڤه‌ دهێنه‌ هاڤێتن (كو ئه‌ڤه‌ د پڕانییا كۆنفڕانسان دا دهێته‌ ئه‌نجامدان).